L’Academia de la Llingua Asturiana apostó esti miércoles por una “respuesta firme y tranquila” de la ciudadanía y los colectivos más directamente afectaos poles “amenaces del radicalismu políticu”, en clara referencia a la intención de Vox de non programar espectáculos n’asturianu nos eventos festivos de Xixón.
La entidá recalcó nun comunicáu que, en virtú del so llabor como curiadora de los derechos llingüísticos, nun se van dar “renuncies individuales nin colectives” nel usu cotidianu o artísticu del idioma.
L’Academia de la Llingua Asturiana mostróse contraria a “cualesquier intentu de censura” o torga de les manifestaciones culturales públiques n’asturianu, asina como de toa estratexa dirixida a “menguar” l’usu del idioma.
Otramiente, demandó’l cumplimientu de la Declaración Universal de los Derechos Humanos, de la Constitución Española, de la Carta Europea de las Llingües Minoritaries, del Estatutu d’Autonomía y de la Llei d’Usu y Promoción del asturianu nesti ámbitu.
La institución esixó a les instituciones públiques una garantía de “cero cesiones” nesti aspectu y quixo amosar el so sofitu a tolos artistes qu’empleguen davezu l’asturianu.
