Dende l’asociación d’Empreses d’Artes Escéniques del Principáu d’Asturies, EscenAsturias, tán acabantes de mandar una carta abierta a Carmen Moriyón, alcaldesa de Xixón, a cuenta del mensaxe difundíu pola conceyala de Vox Sara Álvarez Rouco, que quier torgar la música n’asturianu «si se puede».
EscenAsturias, que s’amuesa como conocedor de les polítiques culturales, entruga nel so escritu: «¿Camudó Foro los sos oxetivos? ¿Camudó’l so venceyu cola llingua asturiana? ¿El Conceyu de Xixón va defender una actitú antidemocrática?» y desíxese a l’alcaldía que s’esprese con claridá no que fai a la política cultural de los años vinientes, en sintonía col manifiestu que tán difundiendo los músicos asturianos.
EscenAsturias refuga «cualquier tipu de política cultural que promueva la censura nos procesos de creación» y esixe «certidumes», puesto qu’«ensin elles too indica que nun va pagar la pena crear nin xenerar riqueza» y, en consecuencia, solicita «la rectificación pública de diches afirmaciones que suponemos que naide más del so equipu de gobiernu comparte».
A lo último, EscenAsturias alcuerda a Carmen Moriyón que ye’l principal representante de les empreses del sector de les artes escéniques n’Asturies y afirma que nun va tolerar «un perfil de gobiernu autoritariu y llendador de derechos fundamentales, ente ellos la llibertá d’espresión, que ye ún de los pegoyos incuestionables de la cultura».
