Nuna rueda de prensa que tuvo llugar güei pela mañana, la conceyala de festexos de Vox, Sara Álvarez Rouco, quixo matizar les sos declaraciones sobre la voluntá de torgar la presencia d’artistes que canten n’asturianu nel conceyu porque, según afirmó, «se terxiversaron». Lo que dixera la conceyala, como ye bien sabío, ye que diba evitar «si se podía» la contratación d’artistes n’asturianu, polo que nun queda mui claro qué puntu exactamente quería esclariar.
Depués de que la so alcaldesa, Carmen Moriyón, espublizara ayeri domingu una carta de compromisu col asturianu na que desautorizaba indirectamente a la conceyala y afirmaba que na so ciudá «nun va dexase de contratar a artistes qu’usen l’asturianu nin va retrocedese en cuestiones de igualdá», y que gran parte de la sociedá civil y del mundu de la cultura esixera esplicaciones por esti casu flagrante de censura previa, la conceyala de Vox quixo facer unes puntualizaciones nel so vetu.
Según dixo na rueda de prensa Sara Álvarez Rouco —que, por cierto, dexó otres perlles, como que nun entiende por qué’l colectivu LGTBi ha ser un colectivu—, Vox nun quier efectuar una censura llingüística: acordies cola conceyala de Festexos, Vox ta a favor de que s’usen los bables (yá tardaba en salir la pantasma de los milenta bables), pero en contra de la cooficialidá y del usu de la llingua (entendemos qu’asturiana).
Al marxe de que la distinción ente esos supuestos bables y l’asturianu sía una construcción ensin apoyu científicu dalu, puesto que munches llingües viven procesos d’estandarización y normalización —ente elles, el castellanu—ensin qu’eso-yos quite derechos llingüísticos a los sos falantes, la cosa ye qu’esti vetu tamién tien una naturaleza llingüística: Vox, paez ser, quier metese a prescriptor o normalizador de la llingua asturiana y decidir qué podemos y qué nun podemos dicir, escribir y cantar.
Pero, d’otra manera, ello ye que la so propuesta de censura sigue vixente en términos igualmente preocupantes. Según dixo Álvarez Rouco, lo que se va torgar nun va ser l’usu del asturianu, sinón la defensa nos espectáculos de la oficialidá del asturianu: «si los espectáculos van ser un sofitu a la cooficialidá, nun vamos apoyalos». Poro, esta censura previa —que, recordemos, ta espresamente prohibida pola Constitución nel so artículu 20— ye agora non llingüística, sinón ideolóxica. Polo demás, la so propuesta ye igual de mezquina, probetaya y, claro, illegal: anque quier antroxar les sos idees censores, a Vox vése-y la patuca.
Ta por ver cómo s’organiza agora la sociedá pa dar respuesta a esta inconstitucional amenaza a la llibertá ideolóxica y llingüística: de mano, cabe esixir la espulsión de Sara Álvarez Rouco del gobiernu de la ciudá. Y pa siguir, el procesu de captación d’apoyos habría continuar colos artistes nacionales y internacionales que visiten Xixón, porque esti tipu de vetos ye incompatible con una política cultural mínimamente digna.
