Davezu, la fiesta pacifista asocede al empar que los cazabombarderos esnalen pel cielu de Xixón: la Folixa pola Paz qu’entamen dende hai años delles organizaciones —la Coordinadora Asturiana d’ONGD, el Conseyu de la Mocedá de Xixón y Acción en Rede Asturies— tien llugar, normalmente, el mesmu día que’l desfile aereu qu’entamen el conceyu de Xixón y l’Exércitu del Aire.
Por embargu, la exhibición, que ye un mecigayu de propaganda bélica y publicidá de la industria armamentísitca, nun tuvo llugar güei. La razón: les elecciones xenerales del estáu. Javier Arjona Muñoz, responsable del grupu de sensibilización y educación pa la ciudadanía global («Sensi») de la coordinadora d’ONGs, rellataba a NORTES qu’«el ejército del aire, que es el que organiza, nos engañó y nos dijo que no iba a cambiar, pero evidentemente tuvieron que hacerlo», y el festival va tener llugar el próximu 30 de xunetu.
Sicasí, la Folixa pola Paz fízo’l so actu güei: hai unos díes que s’entamó a calecer con una serie d’actividaes y a lo llargo de tol día, la xente tremó’l Muséu del Pueblu d’Asturies pa participar de la serie d’actividaes, esposiciones, xuegos, conciertos y llectures de manifiestos pacifistes que conformen la Folixa.
La solombra de les elecciones xenerales que teníen llugar al mesmu tiempu nun dexó de percibise: el manifiestu que lleó una representante del Conseyu de la Mocedá mencionaba la coincidencia de los valores democráticos y los pacifistes y falábase, asina, d’un día «sin duda decisivo para votar teniendo en mente valores de democracia, justicia, paz, e igualdad. Un día para votar contra los discursos de odio, el belicismo, contra la desigualdad y la pobreza. ¿Ya nos hemos olvidado del Xixón asediado por las bombas?».
La percepción de Javier Arjona Muñoz yera asemeyada: «cuestionamos, del gobierno actual, el gasto enorme en defensa que tenemos actualmente. Y a cualquier gobierno le pedimos que le dé la vuelta. Es un gasto enorme que alguien tiene que pagar, y que lo acabará pagando la clase trabajadora. La vieja consigna de gastos militares para escuelas y hospitales sigue funcionando».
El día, asina, entamó con esposiciones que facíen por remembrar los bombardeos del bandu subleváu sobre Xixón demientres la Guerra Civil, asina como con cuentacuentos infantiles y col conciertu de Dr. Balkan. Poco primero de xintar, lleóse’l manifiestu per parte de la organización, que daba los seis motivos polos que s’oponíen a la celebración del Festival Aereu: de mano, pola inmoralidá de la exhibición belicista; pero tamién pola «opacidá» del gastu municipal que conlleva, pola contaminación que supón, pol sufrimientu que xenera nes persones vulnerables, pol sofitu a la industria armamentística y polos fallos de seguranza que puede haber, como se vio de recién en Zaragoza cola cayida d’un F18.
Javier Arjona Muñoz señalaba, nesti sen, una coincidencia inquietante: «nuestro ayuntamiento, el día de Gandhi y de la paz escolar hace muchas actividades [el 30 de xineru], pero el 30 de julio vuelve a hacer actividades para la guerra».
El día continuó con xuegos tradicionales, un taller de baille entamáu por Paulino Santirso y el conciertu de 6 Riales, y la folixa revelóse como más necesaria que nunca pa xenerar una alternativa a la guerra, qu’agora tenemos bien cerca n’Ucraína.
Al entrugar a Javier Arjona, precisamente, poles posibilidaes que’l pacifismu presenta na situación actual frente al lema clásicu que dicía si vis pacem para bellum (‘si quies la paz, prepara la guerra’), la so respuesta ye, según diz, la «natural»: «si quieres la paz, prepara la paz».
La reflexón del organizador bien puede valir pa reflexar el calter de la oposición al belicismu implícitu nel Festival Aereu de Xixón: «no se puede acabar una guerra con un avion eurofighter no sé cuanto que va a sobrevolar el cielo de Xixón, como anunciaron ayer sin un asomo de vergüenza. Es un gasto y es propraganda para asustarnos y para incentivar el gasto de armas. No se puede echar más combustible al fuego».
