La moción escontra la censura al asturianu llega al plenu de Xixón

La iniciativa «Música n'asturianu SÍ», que propunxo la plataforma de músicos y entidaes, va votase'l próximu 1 d'agostu

Recomendados

Xaime Martínez
Xaime Martínez
Ye filólogu, poeta, músicu y narrador en castellán y n’asturianu.

El pasáu 5 de xunetu, la plataforma «Música n’asturianu sí» presentaba nel Ayuntamientu de Xixón una propuesta de moción escontra la censura propuesta por Vox. Esta moción, qu’axuntaba un númeru bien bultable de firmes d’artistes y asociaciones de toa triba y diba acompañada d’un manifiestu, yera una respuesta a les declaraciones de la conceyala de festexos, Sara Álvarez-Rouco, que declarara la so intención d’implantar un sistema de censura previa pa evitar les actuaciones n’asturianu nel conceyu.

Agora, pente medies de los cabezaleros de Podemos, PSOE y IU-Convocatoria por Asturies, la moción llega al plenu de Xixón. La votación, que va tener llugar el próximu martes 1 d’agostu, ye, acordies colos promotores del manifiestu Música n’asturianu SÍ, «mui fácilmente asumible por tolos grupos municipales que tán comprometíos col patrimoniu cultural asturianu inmaterial y material y colos derechos culturales, llingüísticos, llaborales y de llibertá d’espresión».

Precisamente, los responsables de Música n’asturianu SÍ afirmen nuna nota de prensa qu’ aconceyaron coles agrupaciones polítiques favorables a la llingua y cultura asturianes del conceyu (Foro Asturias, FSA, IU-Convocatoria por Asturies y Podemos), asina como col PP, y que se percibe «una bona predisposición».

Los tres puntos básicos de la moción que va votase’l martes son: garantizar el cumplimientu de la llei —yá que la censura previa propuesta por Álvarez-Rouco ye illegal dafechu, como informó NORTES—; caltener y, inclusive, aumentar la programación de música n’asturianu nel conceyu, y promover de manera afayadiza estes actividaes programaes

D’aprobase, la moción supondría «un reconocimientu per parte de la ciudá de Xixón hacia les persones, empreses y agrupaciones que trabayaron, trabayen y van siguir trabayando pola riqueza de la nuestra cultura autóctona y pol dinamismu social, cultural y económicu que xenera», amás de sofitar la creación y programación nesta lllingua y l’espoxigue de la so industria cultural.

Cola ayuda del Gobiernu del Principáu d'Asturies.

 

Actualidad