La tercera edición de les Xornaes del Vigulín Tradicional, que van tener llugar en L’Infiestu (Piloña) ente’l 15 y el 17 de setiembre, ta acabante d’anunciar la so programación y el so cartelu. Nesti últimu, que ye obra de la fotógrafa Leti Cernuda, inclúise una semeya de la mesma Cernuda na que se puede ver al caberu vigulineru vivu de la tradición piloñesa, Antonio Espina Montoto, del llugar de Villar (Espinaréu).
Les xornaes, entamaes pola banda de gaites Lakarma, ufren una programación amplia que va allugase en dellos escenarios como’l teatru de La Benéfica, la cervecería artesanal La Traviesa y el centru El Prial.
Les Xornaes del Vigulín Tradicional inclúin, por supuestu, alcuentros d’instrumentistes, conferencies académiques y cursos de formación nesti instrumentu, pero tamién conciertos, como los d’Alicornio y Llan de Cubel que van tener llugar el sábadu 16.
Amás, va haber tamién actividaes empobinaes al públicu infantil, como los «Cantares de y pa neñes» de Fernando Valle Roso y Silvia Moreno, asina como unes olimpiaes tradicionales coordinaes por Sergio Buelga y un taller de baille tradicional con Santi Galguera.
