De magar la nueche de güei, entama na Fábrica d’Armes d’Uviéu la cuarta edición del festival LINK, que pretende esplorar los llinguaxes artísticos más avanzaos. La primera pieza del festival va ser la instalación lumínica Ataraxie, de Maxime Houot, que busca tresformar La Vega nun «espaciu de paz mental onde’l visitante va poder investigar les llendes de la so propia percepción» y que va poder vese dende les 22:00 hores.
El LINK cuenta, amás, con otres dos esposiciones inmersives que van tar de forma permanente a lo llargo de tol festival: Qu4dr4nt, del Collectif Arbuste, una pieza de lluz y soníu xenerativa y interactiva, na que ye’l públicu’l qu’intervién sobre’l soníu techno, y Library Of The Winds, de Haseeb Ahmed, qu’asonsaña l’efectu del aire sobre los sentíos pente medies d’eolífonos automatizaos, un sistema que s’emplega davezu nel teatru y la ópera dende’l sieglu XVI.
Arriendes d’ello, el LINK propón una conexón cola programación musical, yá que’l sábadu 26 d’agostu a les 21h va presentase Animus, el primer álbum en solitariu de Sara Muñiz (Cicada), qu’amiesta neo-clasicismu y música ambient.
Amás, va haber ocho propuestes de realidá virtual nes que’l públicu va poder «metese», y ente elles destaquen From The Main Square, que llevó’l Gran Premiu del Xuráu nel Festival Internacional de Cine de Venecia; o The Scream VR, una esperiencia interactiva y sensorial basada na famosa obra El gritu d’Edvard Munch.
Toles actividaes del LINK son de baldre; los aforos son llimitaos y l’accesu va facese por orde estrictu de llegada, sacante les esperiencies de realidá virtual y cinema 360º, que riquen inscribise na mesma Fábrica d’Armes.
