La ilustradora porruana Nieves González (conocida nes redes sociales como @nieve_sita) entamó hai tres branos con una iniciativa que revela les posibilidaes artístiques del rural asturianu: depués de ver un fardu de yerba pintáu en Francia, qu’anunciaba dalgo, a Nieves González ocurrióse-y cómo tresportalo a la realidá del so pueblu nel conceyu de Llanes: «nel 2020 pinté yo, con una amiga de la carrera, tres boles de silu pa ver cómo aguantaben, y como aguantaron tol branu decidimos facelo con artistes pal añu siguiente».
Asina entamaba «Porrúa en bolas», el certame artísticu que coordina González cola Asociación Cultural Llacín de Porrúa, y que nes trés ediciones que yá tien desenrollao fai por axuntar ganadería, arte efímeru, xente llocal y artistes de técniques, estétiques y oríxenes bien estremaos. Y failo pente medies d’obres gráfiques pintaes enriba de fardos o paques de yerba de plásticu negro —lo qu’en Porrúa llamen «bolas de silu»—, que duren hasta la fin del branu, cuando l’agua o la necesidá de los ganaderos por alimentar al ganáu obliga a esfacer les obres.
L’Asociación Llacín ta mui venceyada tamién col llabor que fai’l Muséu Etnográficu del Oriente en cuantes a la recuperación d’actividaes tradicionales: poro, «Porrúa en bolas», acordies con Nieves González, «encaxa perfectamente cola asociación porque reivindica la ganadería, que ye l’actividá tradicional principal del pueblu», al empar que fai por dinamizar el pueblu.
El ciclu funciona, en dalgún sentíu, como una antoloxía del arte contemporaneu n’Asturies, yá qu’amiesta obres de pintores llaniscos coles de xente nacío o afincao nel país. La diversidá ye, asina, ún de los criterios fundamentales de «Porrúa en bolas» y busca representar les tendencies estremaes de lo que se fai anguaño n’Asturies: na edición de 2023, por exemplu, pudieron vese boles pintaes por Guillermo Menéndez Quirós, que representó la batalla del Mazucu en 360º col estilu figurativu que tien investigao nos sos cómics; pero tamién hebo aproximaciones testiles, como’l busgosu de Made by kÖs, de Constantino Menéndez, que se rellaciona col diseñu de vestuariu que fixo pal videuclip de Rodrigo Cuevas «Casares»; asina como otres cercanes al graffiti y a l’abstracción.
Según Nieves González, «una de les idees del Porrúa en Bolas ye que la xente d’allá conozca, y que se lleve l’arte al pueblu». Ún de los llabores del ciclu, d’esti mou, ye dialogar col públicu del propiu llugar: «al principiu solo quieren realismu y lo que vieron tola vida, pero metiéndo-yos otres coses van conociendo, van entrugando… La idea ye meter tou tipu d’artistes: nun se busca la calidá nin la fama, sinón mostrar distintos tipos d’arte qu’heba n’Asturies. Tattoo, realismu, abstraccción… Préstame que los paisanos puedan ver pintar los artistes».
Y ye que, de fechu, la iniciativa de l’Asociación Llacín entamó con mieu de que nun se llograre involucrar a la xente de la redolada, pero nada más lloñe de la realidá: masque a lo primero González pensaba que quiciabes los ganaderos nun-yos diben emprestar los fardos «porque si ruempen ye un problema», depués de pintar la propia Nieves González el primer añu, a los ganaderos gustó-yos, «y agora cuasi peléense por dexales, porque los artistes pinten, y tán arguyosos. Hebo la mesma ilusión per parte del sector ganaderu que per parte del sector cultural, y cuasi más». Y sentencia González: «Eso sí que creo que foi munchu éxitu».
L’éxitu d’esta efímera modalidá artística, sicasí, nun ye namás ente la xente de la zona: cada añu lleguen más propuestes d’artistes que quieren collaborar, y el públicu llega a Porrúa dende llugares mui estremaos pa ver les boles pintaes. A la fin, como diz Nieves González, «buscar los oríxenes ye de lo poco que nos queda, porque en tol mundu too ta convirtiéndose no mesmo».
