L’autor Héctor Braga ganó la vixésimonovena edición del premiu Máximo Fuertes Acevedo d’ensayu en llingua asturiana que concede la Viceconseyería de Cultura, Política Llingüística y Deporte cola obra titulada Nel cantu la memoria. Ensayu sobro l’asturianada tradicional, dotáu con 6.000 euros.
El xuráu destacó que’l trabayu d’Héctor Braga ye una aportación al estudiu y divulgación de la música y de la cultura asturianes nun trabayu “rigoroso y bien documentáu” sobre l’asturianada, nel que “s’atiende a tolos ámbitos qu’intervienen nesta gran seña cultural” d’Asturies.
Amás, el fallu resalta “l’usu d’un llinguaxe natural, fluyíu y correctu qu’imprime axilidá y amenidá a la llectura de la obra”.
Anguaño dedicáu a la docencia, Braga (1980) ye doctor n’Historia del Arte y Musicoloxía pola Universidá d’Uviéu, profesor de Música y Etnomusicoloxía polos conservatorios d’Asturies y Castilla-León, títulu profesional de Gaita y máster en Comunicación Cultural.
Nel ámbitu de la interpretación vocal de l’asturianada foi campeón en toles categoríes (aficionaos, renovación y absoluta) y ganador en concursos en Xixón, Mieres y Samartín del Rei Aurelio, ente los años 2007 y 2015.
