Iniciativa pol Asturianu celebró esti xueves que les llingües non oficiales puedan utilizase a partir d’agora nel Congresu de los Diputaos, anque consideró discriminatorio que los diputaos tengan traducir les sos intervenciones.
Nun comunicáu, la entidá remembró que la Constitución Española reconoz la pluralidá llingüística y aboga por respetar y protexer toles llingües como patrimoniu cultural independientemente de si son o non oficiales.
Iniciativa pol Asturianu destacó que “la única ferramienta que va poder garantizar la plena igualdá ente tola ciudadanía independientemente de la llingua qu’use ye la oficialidá”.
“Ensin una reforma del Estatutu d’Autonomía que reconozca los drechos llingüísticos, los asturianos y les asturianes tamos condergaos a ser ciudadanos de segunda”, espresó’l presidente de la entidá, Iván Llera, nel comunicáu.
Llera consideró como “una bona noticia” el debate llingüísticu nes Cortes porque “la visibilidá que puede tener l’idioma nesi foru tien un valir especial como elementu normalizador”, anque insistió en que “únicamente cola oficialidá s’atayaría de manera definitiva cualesquier tipu de discriminación”.
La Mesa del Congreso alcordó ayeri colos votos de la mayoría progresista que les llingües cooficiales —catalán, euskera y gallegu— puedan utilizase dende’l plenu del próximu martes, 19 de setiembre, con traducción simultánea, mentes que los diputaos que lo deseen van poder falar n’otres llingües non oficiales, como l’aragonés o l’asturianu, siempre que’l propiu parllamentariu s’autotraduza utilizando’l tiempu d’intervención.
