La segunda edición del Reguerada Fest pa promocionar la cultura y l’emprendimientu en llingua asturiana va llevar a Candás alredor de 30 actividaes de baldre, dende recitales poéticos a conciertos pasando per charres o talleres artísticos, toes elles col asturianu como llingua vehicular. El festival, que va tener llugar ente’l 13 y el 15 d’ochobre, va cuntar tamién con una feria con empreses del sector.
Las actividaes, empobinaes a tolos públicos, incluyen una feria, recitales lliterarios, talleres, charres, esposiciones y conciertos, que se van desenrollar na Fábrica d’Ortiz, el Teatru Prendes, el Muséu Antón y la Biblioteca de Candás, acordies colo qu’anunció’l director xeneral d’Acción Cultural y Normalización Llingüística, Antón García.
Va haber una sección de la progamación específicamente dedicada a los rapacinos, llamada Montesinos, que va cuntar con talleres de construcción de títeres, cuentacuentos y conciertos de música infantil.
El festival entamó l’añu pasáu cola vocación d’averar a la sociedá asturiana les actividaes que desenrollen creadores, emprendedores y organizaciones sociales alredor de les llingües del país.
El Reguerada Fest rinde homenaxe col nome al poeta barrocu de Llorgozana, Antón de Marirreguera, nacíu nel conceyu de Carreño y autor de la que se considera la primera obra lliteraria conservada n’asturianu, el Pleitu ente Uviéu y Mérida pola posesión de les cenices de Santa Olaya (1639).
La parte musical del Reguerada Fest va correr al cargu de la Banda de Gaites de Candás, Algaire, Alicia Álvarez y el so espectáculu Kíkiriki, pal públicu infantil y Nacho Vegas, que va tocar los sos Cantares dende’l pie, y tamién contempla un pasucáis al cargu del Grupu de Baille San Félix.
