Puru Remangu, la iniciativa de la entreguina Enar Areces, ye bien conocida pola so ropa y por publicaciones como Güeli, colo que trabayen pa reivindicar el papel de les muyeres con remangu. Agora que se cumplen cinco años del so entamu, Puru Remangu ta acabante d’abrir una segunda tienda física n’Uviéu (calle del Postigu Baxu, 1).
L’espaciu uvieín de Puru Remangu echó a andar el miércoles 8 de payares, y ta acabante de celebrase la so inauguración con «pinchotéu, bebida y musiquina» arriendes de, por supuestu, la pandereta, que foi la protagonista del eventu, en concordancia col envís de Puru Remangu de xuncir tradición y modernidá.
El nuevu llocal de Puru Remangu tien, de mano, un plazu bien zarráu: ye un pop-up, una tienda qu’abre por un plazu llimitáu de tiempu (de payares a xineru). La esplicación ye cenciella: «Abrir la tienda física de Puru Remangu ye un retu, un proyectu que nos presta pola vida y tamién un pasín en firme que queremos dar con muncho procuru y cuidando al máximu esti bebé que se llama Puru Remangu y que nun dexa de medrar».
El llocal nuevu cuenta con tol stock de la marca, amás de dellos llibros y discos distribuyíos por Musicaasturiana.com, y presenta tamién una imaxe mui cuidada: bona prueba d’ello son los probadores de la tienda, pintaos pola ilustradora Nieves González.
L’espaciu onde ta asitiáu’l pop-up ye mui significativu polo que representa pal barriu: primero de la nueva llocalización de Puru Remangu, foi un ultramarinos de tola vida, una frutería y una llibrería anarquista. «¿Qué meyor manera que siguir apostando pol comerciu llocal y de barriu?», entruguen dende la marca.
