Nes próximes eleiciones va votar xente que tará viva nel añu 2100.
Nesti tiempu del cortoplacismu olvidamos poner les llueces llargues y pensar cuántu tiempu mos queda.
Esti ye un artículu llargu pensando que vamos facer agora pa la xente que va conocer el siglu XXII y que tan ente nos y votará nes próximes eleiciones.
¿Qué – y ofrecemos políticamente a esa xente? ¿La axenda 2030? ¿La alcordanza de 1934? ¿pesimismu?
Ye verdá que hay guerres que mos amenacen. Ye verdá que asusta’l cambiu climáticu. Ye verdá que el turbo-capitalismu depredador paez hexemónicu.
¿Rendímonos?
Si miramos pal añu que vien sí. Si miramos más alantre, podemos imaxinar nuna sociedá meyor y empobinar entre tós pa construila.
Hay que entamar por dicir que tamos meyor que va 50 años. Va 50 años la esperanza de vida yera 9 años menor que agora, esi ye un indicador, ente otros munchos, de que estos 45 años de democracia supusieren un progresu per grande pa la población asturiana.
Ye mentira que la xente mozo viva peor que vivimos nosotros. Vive meyor porque agora vivise meyor que va 40 años en casi tos los sentios.
Partiendo desi análisis, ¿Cómo enfocamos el futuru?.
Yo quiero Asturies pa vivir y vivir bien. Yo tengo esperanza, creo que’l futuru va a ser meyor que´l presente. Quiero trabayar pa esi futuru, nun solo por altruismu, nun solo porque tenga fiyos, si non porque mientres preparamos el futuru tamos meyorando el presente y porque vivir con esperanza ye vivir y vivir feliz. Instalase nel pesimismu o nel tactismu cortuplacista acaba con la salú mental.
Por eso necesitamos un proyeutu políticu y social pa Asturies que tenga como oxetivu aumentar la esperanza de vida n’Asturies per encima los 90 años nel añu 2100. Nun ye un imposible y esi oxetivu sirvenos pa tirar de la sanidá y de les condiciones de vida de la clas obrera y de la ecoloxia y de cualquier otru tema que miremos. Meyorar la esperanza de vida ye meyorar la sociedá entera.
Yo nun milito pa que un partíu concretu gobierne y coloque los sos fieles en puestinos. Aunque sian la mio xente. La mayoría de les persones militamos porque queremos transformar la sociedá pa meyor.
¿Qué Asturies proponemos pa dientro de 50 años? Casi mediu millón de los asturianos vivos agora, tarán vivos nel añu 2060. Nun val tar escontra nun sé qué o nun sé quién. ¿Qué Asturies me propones pal añu 2050 que voi tar vivu?.
Nun pensemos nun camín curtiu, sinon en dir seliquino y lloñe.
Queremos una Asturies llibre y rebelde, defensora los derechos humanos nel mundu. Una Asturies onde ca ún reciba según su necesidá y aporte según la so capacidá.
Una Asturies que defenda el so territorio y lu cuide. Que cuide el agua y el aire y el monte.
Una Asturies que entienda que la igualdá nun existe si nun tan les muyeres.
Una Asturies que acueye al que vien a trabayar a la nuesa tierra. Hermanos del mugor. Toos obreros asturianos.
La Asturies nunca vencida, obrera y campesina, trabayaora, non especuladora.
Una Asturies orgullosa de la so tierra y que la defende, por exemplu, de les mines a cielo abiertu.
Una Asturies con tradición de llucha feminista.
Una Asturies per orgullosa de ser una tierra de acoyida
El feminismu, el ecoloxismu, la defensa de los derechos de la clas obrera y la acoyida de persones migrantes formen parte de la identidá histórica d’Asturies. Podemos construir un suxetu políticu, un movimientu, identitariu, al rodiu de esos encontos. Esi movimientu tien que entroncar con la globalización porque necesitamos un mundu multipolar basau na resolución pacífica de conflictos, los derechos humanos y la defensa de la clas trabayadora pa desarrollar el bienestar d’Asturies.
Tenemos el banderín de enganche de la Asturies del futuru, la igualdá, el ecoloxismu, la acoyida y el internacionalismu que tamién forma parte la nuesa identidá, nun hay que inventar una bandera nueva, solo iguala un poqueñín.
Y esi movimientu tien que ser social, nes asociaciones vecinales, ecoloxistes, feministes, sindicatos, plataformes. Tenemos que creer nel nuesu futuru y trabayar per él.
¿Y la política institucional qué facemos con ella?
Sin el movimientu social nun podemos avanzar, pero sin política institucional tampucu
La política institucional ye pa dir a les instituciones y facer lo que mos dexen. La política institucional ye necesariamente pragmática. El purismu nun ye pa esti trabayu. Tenemos que entender la necesidá de entendese ente diferentes. Y a delles vegaes muy diferentes.
Agora mismu el gobiernu ta negociando col PNV que ye un partíu democristianu. Nun creo que y faga gracia, nin a Sumar nin al PNV, pero ye lo que hay, la otra opción ye dexar al fascismu y al narcotráficu gobernar.
Si Foro nos abriere la puerte de la oficilidá o fuese necesariu pa una votación de investidura, nun dudaría ni un minutu en sofitar la negociación con ellos.
Lo que nun se pue repetir ye el yerru del añu 2015 en Xixón dexando gobernar a Moriyón pa nun se contaminar col PSOE. Dexar gobernar a Moriyón encima a cambiu de ná. Fizo más IX en 2019 con un conceyal que XsP con 6 ente 2015 y 2019. Aurelio moyose, contaminose, equivocose, pero fezo.
Y esa contaminación tien que traducise en daqué más que mirar si el partíu tal o el partíu cual saca más o menos votos. Tamos equí pa trabayar pol futuru.
Cuando veo imáxenes de la guardia civil escoltando a los inspectores de trabayu en Murcia o enterome que Yolanda Díaz ta recibiendo amenaces de muerte de patronos de los mares de plástico, acuérdome de Lula da Silva. Cuando llegó al gobiernu la primer vegada, resulta que les leyes brasileñes yeren muy suaves col delitu de esclavitú y encima nun se facín inspeciones nin se perseguía el delitu. Nel so primer mandatu liberó a 70.000 persones de la esclavitú. Lula fezo munches coses mal, claro que sí y agora pa gobernar tien que pautar con xente claramente de derecha. Pero liberó a 70.000 persones de la esclavitú. Merez la pena vivir una vida entera pa facer solo la mitá deso.
Necesitamos políticos y polítiques que sacrifiquen la so pureza pa conseguir oxetivos.
¿Y cómo emparexamos esi oxetivu de futuru y de ilusión de Asturies 2100 que bebe nes sos fontes históriques col pragmatismu políticu?
Pues dende la diversidá y la paciencia. Entendiendo que el camín ye llargu y pindiu. Con paciencia porque tenemos tiempu y entendiendo que nun toles persones tenemos que tar en mismu sitiu nin votar lo mismo. Sin el respetu a les diferencies que hay ente nos y sin entender que tien que haber varies formaciones “compitiendo virtuosamente” nun podemos salir alantre. Y que pue haber persones que lleven una militancia política pero non nos partíos. Tien que haber una gran coalición social al estilu americanu. En EE UU llamen coalición a que diferentes grupos sociales, con intereses a vegaes contrapuestos voten una misma candidata, porque entienden que nesi momentu ye necesario xunise al rodiu de esa candidatura.
Fagamos equí una gran coalición social y política pa gobernar Asturies col oxetivu de la hexemonía nes elecciones de 2047. Respetando la diversidá de visiones, tiempos y espacios.
Lo primero de tó ye trabayar n’Asturies y pa Asturies. Estos últimos años enseñen que ye muy difícil por nun decir imposible tener una fuercia política verdaderamente federal y democrática nel estau español. Por eso val más nun perder tiempu y recursos y dir a una fuercia asturiana que busque dempués los acuerdos confederales que meyor vea.
Necesitase por tantu un movimientu políticu que aglutine diferentes sensibilidaes y que te afincau n’Asturies y que tenga como mayor honor gobernar Asturies. Que trabaye por y pa Asturies, pero que parta de una ideoloxía internacionalista de búsqueda de un mundu sin fronteres y que considere la cooperación política como un preseu básicu del movimientu.
Izquierda Xunida que ta dientro del gobiernu de Asturies y dientro de un proyeutu estatal tien el so propiu nichu eleutoral. Demostrolo sobradamente estos años y debe seguir el so propiu camín.
Podemos, que tien persones muy válides como la conceyala de Siero, ta mediatizau por una camarilla madrileña que impide de factu la cooperación si nun te subordines a ellos. Si nun cambia ye complicao cuntar con él.
Pa constituir esi movimiento queden tres fuercies que pueden confluir y montar un Compromisu por Asturies que pueda tener esa proyeción de futuru. Son Aína, Verdes Equo Asturies y el grupu de Cova Tomé. Y ende pueden enganchase persones que ten descolgaes.
Son tres fuercies diferenciaes y con visiones a vegaes contrapuestes. Pero nestos momentos nun podemos mirar eso porque tamos en peligru. En 2027 la derecha pue gobernar Asturies. Ye preciso xuntase pa impedilo. Nun podemos dexar de mirar la correlación de fuerces sociales y polítiques desti momentu nin despreciar el dañu que pue facer un gobiernu d’ultraderecha n’Asturies.
Va ser preciso acordar cola FSA y con IX pa gobernar y cortar el pasu al fascismu. El enemigu nun ta n’otros grupos de izquierda. El enemigu ye el fascismu que ta equí ya. Tener un oxetivu a llargu plazu tien que damos la paciencia pa trabayar agora a un sen y col tiempu llegar a situaciones con una correlación de fuerces más favorable.
Hay que ponese ya con les eleiciones de 2027. Na demarcación central caben IX, FSA y otra fuercia. Nes otres demarcaciones ye preciso buscar un acuerdu a la francesa a cambiu del sofitu de IX a la reforma eleutoral de 2012.
Nos conceyos, habrá que ver qué se faz. En ca conceyu buscando el meyor resultau posible pa intentar que la izquierda mande na mayoría de los 78 conceyos. Incluyendo acuerdos teóricamente contra natura.
Agora bien, tien que notase. Esto nun ye llegar a les instituciones pa llegar y ya tá. Tien que notase en realidaes materiales. Tendría que tar notándose que hay diferencies ente Mieres o Llangreu y Uvieu. Como pienso que se ta notando el trabayu de Cova Tomé na Xunta o que el gobiernu de Asturies faz coses diferentes a les de Cantabria. Al cabu de cuatro años hay que presentar avances materiales que sirvan pa la vida de la xente, nun valen solo les pallabres.
El oxetivu pa 2027 ye entrar na Xunta y ser decisivos. Y tener dangunos conceyales repartios por Asturies. Hay que trabayar pa aprobar la reforma eleutoral de 2012 na próxima llexislatura porque eso, en 2031, daría unos resultaos munchu meyores pa una fuercia pequeña.
Hay que trabayar con realismu y pragmatismu. Queremos que los rapacinos y rapacines que vemos enrear nos parques vivan dignamente nel añu 2100, y pa eso tenemos que cerrar un acuerdu y entamar a trabayar en lo que queda de añu. 2025 pa consolidar l’acuerdu y 2026 la campaña eleutoral. Trabayar, trabayar y trabayar. Y entamar agora que mañana ye tardi.
