Na mesma llínea que yá adelantara el presidente del Principáu d’Asturies, Adrián Barbón, na inauguración del Congresu Mundial de la Cultura Asturiana, pesllólo Vanessa Gutiérrez, conseyera de Cultura, Política Llingüística y Deporte: con un compromiso nidiu d’algamar la oficialidá, fitu que tien de conseguise, dixo, “con dignidá, arguyu y amor” pa qu’Asturies faiga frente a “la globalización y la uniformización”. Foi la llínea siguía mientres tres díes y a lo llargu de más de sesenta ponencies nel Congresu, nel que s’apurrieron conocimientu, idegues y xeitu pa que seya posible que “lo tradicional y lo contemporáneu caminen xuntos”, como defendió la conseyera na so intervención.
La conseyera fizo suyes tamién les pallabres del periodista Damián Barreiro, fallecíu prematuramente el día enantes, cuando dicía que “la cultura popular tresmitióse a lo llargo de los sieglos y de xeneración en xeneración de forma oral, pero nel mundu postindustrial una cultura nun pue vivir namás del folclor”. Modernizar les industries de xeneración del material cultural -una estaya que, no audiovisual, tocaron tamién na xornada de clausura les ponencies de Cristóbal Ruitiña y Francisco Llera Ramo- ye’l retu que tien de siguise. Esa foi la base de la mayoría de trabayos de Barreiro, un militante “intelixente y comprometíu” que, xunto a David Rivas, fallecíu tamién de sópitu nel pasáu mes d’avientu, mereció un sentíu homenax nel actu de clausura d’un Congresu que bien cumplió, o superó, les espectatives de públicu y repercusión. Poro, Xosé Antón González Riaño prometió repetilo dientro d’unos años y de forma vecera. A Barreiro y a Rivas-yos hubiere prestáu sabelo. Los aplausos candiales del públicu nel su recuerdu quiciabes los ayudaren a ello.
