Ángel García, alcalde de Siero, quier tener lo que seya nel conceyu que lu faiga ver como un creador d’emplegu y nun tolera que naide lu contradiga. La última engarradiella de so foi colos comerciantes y los sindicatos asturianos polos 200 puestos de trabayu que va xenerar Costco nel polígonu de Bobes; pue que dalgún más porque habrá que construyir accesos pa beneficiu del xigante americanu, amás de proporciona-y servicios de llimpieza.
De mano, tolo que seya crear puestos de trabayu suena mui bien, sobre too nuna economía tan pequeña y fráxil como l’asturiana. Por desgracia, son les economíes pequeñes y fráxiles les que nun tienen oportunidá nenguna de sobrevivir a la entrada d’un actor como Costco, afectando negativamente a proveedores, comercios y, al final, tamién a los trabayadores.
Costco opera con márxenes de beneficiu mui pequeños porque trabaya con volúmenes descomanaos y porque cobra cuotes a los socios pa poder comprar na tienda. Eso da-y pa imponer a los proveedores los precios que quiera. El problema ye que les esplotaciones y pymes asturianes son de les más pequeñes del Estáu español y nun tienen capacidá pa xenerar los volúmenes y precios reducíos que requier Costco. De fechu, la viabilidá de munches explotaciones ye yá mui precaria polos márxenes tan baxos colos qu’operen.
¿Y los comercios locales, sobreviviríen? La respuesta curtia ye non. Si miramos el casu del Costco en Bilbao, ciudá con una economía mui deversificada, un plan estratéxicu de defensa del comerciu local, un sector terciariu mui cohesionáu y un consumidor vascu mui concienciáu de consumir lo propio, vemos que dende que Costco abrió ellí les puertes en 2021 Bilbao perdió miles de comercios, amás d’espardise esa perda a les demás capitales vasques.
Los consumidores tienden a concentrar les compres en Costco pol so modelu de ventes en grandes volúmenes y descuentos atrayibles, lo que va dexar menos presupuestu pa gastar nos negocios locales. Los pequeños comerciantes, sobre too los qu’operen nos sectores d’alimentos, electrodomésticos, moblame y productos básicos van esperimentar una perda de clientes polos precios baxos y la gran variedá de productos de Costco. Los comerciantes locales que faigan por competir con Costco van tener que baxar los precios y eso va afectar la so rentabilidá.
La única opción pa los comercios locales va ser la d’ufrir productos artesanales y especiencies personalizaes y úniques que Costco nun puea replicar. Pero ensin unes polítiques públiques sólides de defensa y promoción del comerciu local, el centru de Siero va vaciase entá más d’establecimientos. Quiciás esa perda nun fuere tan grande si la nueva superficie comercial tuviere nel centru la villa, pero yá sabemos que se quier llantar nel polígonu industrial de Bobes. Y ehí tenemos otra gran contradicción. Una empresa comercial, del sector terciariu, va llantase en tarrén acutáu pa industries del sector secundariu industrial, menguando asina la superficie pa esi sector productivu y acabando al empar col sector terciariu local. Pero non namás el del conceyu de Siero. Como la filosofía de Costco implica un cambeu de vezos de consumu coles families comprando grandes volúmenes pa tou un mes, lo más fácil ye qu’atraiga a families de tol centru d’Asturies, afectando a los comercios de toa esa fastera igual qu’a los de la Pola Siero.
Sobre l’emplegu, pesie a que se van crear dalgo más de 200 puestos de trabayu, lo más fácil ye que se destruyan más de los que se creen. La presión sobre los precios pue poner el ramu al zarru d’esplotaciones del sector primariu porque nun puean baxar los precios a les desixencies de Costco y siguir siendo rentables. Amás, eses esplotaciones van perder mercáu porque Costco va buscar proveedores fuera d’Asturies. Ehí piérdense un puñáu de puestos de trabayu. La ocupación d’espaciu industrial nel Polígonu de Bobes va torgar que s’instalen industries, obviamente porque nun puen instalase enriba de Costco. Ehí nun se van crear puestos de trabayu nel sector secundariu. Y nel sector terciariu, onde Costco va crear puestos de trabayu, van zarrar munchos comercios que contrarresten los creaos. Ye verdá que les condiciones llaborales en Costco davezu son bones, pero la pérdida de diversidá d’emplegadores locales va llendar les opciones de los trabayadores, cosa que siempres acaba por producir un deterioru del mercáu llaboral y de les condiciones de los trabayadores.
Tou esti escenariu esmolez fondamente al partíu soberanista, d’izquierdes y feminista Aína. De mano, porque esti análisis que facemos de la situación demuestra que la instalación de Costco en Siero va deteriorar el texíu económicu asturianu y va destruyir más puestos de trabayu de los que va crear. Tamién mos esmolez porque’l popularizáu Cepi nun quier o nun ye a facer esti análisis. Si nun ye a facelu, malo porque ye señal d’incompetencia. Si nun quier facelu, peor porque ye señal de megalomanía y de poner primero les sos ambiciones personales a curtiu plazu en perxuiciu del bientar de los sierenses y tolos asturianos. Vistes les últimes declaraciones del alcalde sierense, n’Aína enclinámonos más por esta segunda opción. Cuando un sindicatu critica esta iniciativa suya, él, un alcalde supuestamente d’izquierdes, envede entamar un diálogu colos representantes de los trabayadores, atácalos como un Milei cualquiera diciendo qu’él “crea puestos de trabayu y los sindicatos destrúinlos”. Por eso creemos que Cepi ta enllenu de mesianismu y nun ve sebe. Tou un peligru.
