El tiempu ya nun ye un recursu nel ascensor pa entamar la conversación con desconocíos o pa tirar de tópicu colos vecinos. Esti branu ye’l tema recurrente de la xente. Los medios tán encirricaos en llamar oles de calor a lo que ye un xabaz, rápidu y vertixinosu cambiu climáticu.
Asturies tien agora’l clima que va pocu, a últimos del sieglu pasáu, yera característicu de munches partes del Mediterraneu peninsular. A mi, que pasé, daquella, bien de branos nes Pitiuses, estos díes tráenme la señaldá d’otros cálidos, llargos y lluminosos naquelles isles maravilloses. O de les nueches, qu’agora, pel Norte, paecen tropicales, ensin falta salir con una chaquetuca, como tola vida.
La temperatura del agua de la mar anda otro tanto. N’Asturies ya nun ta fría hasta mancar los todiyos, como de neños. Y, col agua fresco, desapaecieron les laminaries, l’alga cantábrico que formaba grandes alfombres verdes nos pedreros, esenciales pa la vida marina. Agora, peles Pitiuses anden col clima que daquella teníen en Túnez o Arxelia, ye la tendencia que se da en tol planeta. Pel Norte, malpenes llueve esti branu. El cielu gris y les sos llárimes tiñendo de verde viesques y altos podíen convertise, bien lluego, n’alcordances de vieyos y de poetes si’l cambiu climáticu sigue avanzando como hasta agora, a la velocidá del fueu desafranao en monte.
N’Asturies inda nun canten les cigarres, pero too s’andará. Animales totémicos, símbolos d’un pueblu atlánticu milenariu, tán desapaeciendo pasu ente pasu. Tiren más pal Norte, que ya ye’l so hábitat natural. Primero fue el gallu montés, agora’l salmón o l’angula. Nun-yos presta esta Asturies qu’esti branu nun ye verde, ta marrón y mariella como los campos castellanos.
Animales totémicos, símbolos d’un pueblu atlánticu milenariu, tán desapaeciendo pasu ente pasu
Lo que ta pasando, incluyendo les muertes pol calor, desastres como la DANA de Levante o los incendios d’Almería, o los de Madrid y Castiellla, ya lo albidraben y lo anunciaben los científicos cuantayá: la naturaleza rebélase polos escesos de la industrialización y el desarrollismu, mayormente poles emisiones de combustibles fósiles.
Les alvertencies y los conseyos de los científicos cayeron en sacu rotu. Gobiernos y empreses nun rebaxaron les emisiones nin atendieron a alarmes y desgracies, que pa los afectaos ya son apocalíptiques. Al revés, cola ola reaccionaria, que s’esparde pel mundiu al mesmo ritmu que’l cambiu climáticu, gobiernos ocupaos o condicionaos pola estrema derecha echen más maera a la foguera y ponen inda más enfotu na destrucción del planeta con tal de refugar a la izquierda y a los ecoloxistes, dos de los sos oxetivos na cruzada d’odiu que tienen entamada. El cabezaleru ye Trump y el so lema una frase que’l presidente de los Estaos Xuníos soltó va unes selmanes, cuando anunció que se volvía a abrir el estrechu d’Ormuz: que fluya el petroleu.
La xente nun acompaña a La Tierra na so rebelión. Hai fanáticos negacionistes ente los que sofiten a la estrema derecha, ya sía por inorancia o por ciegu seguidismu. Ya nun s’atreven a negar el cambiu climáticu, tan evidente, pero agora dicen que ye natural como los anteriores, que se desarrollaben a lo llargo de cientos d’años, non nunos pocos como esti, nel que nun quieren ver la mano del home.
Hai otra parte de la ciudadanía que nun ye tan testerona nin tan fata, pero considera’l colapsu medioambiental un peaxe a asumir pol progresu material al que llegó bona parte de la humanidá, de la que forma parte. Xustifica la coldicia, la propia o la de los ricos que se beneficien d’un modelu de desarrollu insostenible, y ye egoísta y insolidaria, como si nun hubiere un mañana. “El que venga detrás que arree”, piensa, convencía, ensin fundamentu, de que personalmente nun va tar ente les víctimes del desastre, indiferente ante el mundiu que-yos va dexar a fíos y nietos.
Pero’l grupu más numberosu debe ser el de los resignaos y los fatalistes, los que piensen qu´esto nun tien igua y casi val más nun lo mentar nin pensar nello, porque ye deprimente. Camienten que’l sistema ye irreformable y el suicidiu colectivu inevitable. Nun ye que dean la razón a Marx, qu’albidraba’l final del capitalismu por refalfiu, pol crecimientu descomanáu incontrolable. Marx creía que’l crack diba traer el socialismu (nun pensaba nel de la naturaleza, solo nel de la economía) pero taba equivocáu: la mayoría silenciosa, resignada, ye nihilista. Enterraes les utopíes en favor de les distopíes, los resignaos ven bien nidio que ye más fácil imaxinar el final del planeta que’l del capitalismu.
Tamién tamos los que nun vemos mayor prioridá, social, política y económica, que face-y frente al cambiu climáticu, como fain los bomberos colos incencios que provoca. Somos, pamidea, una minoría d’idealistes que priorizamos la vida sobre la economía, unos radicales que pensamos qu’hai que dir a la raíz del problema: les emisiones que tán envenenando la naturaleza, que respuende a la agresión y va ganar la batalla, porque ye muncho más poderosa que la humanidá. Una minoría que, equí arriba, nun requexu ente la mar y los picos, nun nos resignamos a vivir la distopía d’una Asturies qu’un día fue verde.
