Hai selmanes que nun se miden en díes, sinón en memoria compartida, en emoción fonda, en compromisu que caltiénse. La Selmana de les Lletres Asturianes ye una d’eses selmanes que trescienden lo simbólicu y construyen país. Nun ye solo una cita cultural, ye una vindicación colectiva, un momentu de reconocencia y de reafirmación d’una comunidá llingüística que, a pesar de les dificultaes, nun dexó nunca de falar, d’escribir, de crear.
Celebramos les nueses pallabres. Pallabres que nomaron los sentimientos, la tierra, les xeneraciones que mos precedieron. Pallabres que ficieron camín na poesía, nes noveles, nel teatru, nel ensayu, na traducción de grandes obres de la lliteratura universal. Pallabres que fueren arma y amparu, memoria y futuru. Cada llibru n’asturianu ye una semeya de quien somos, una declaración d’esistencia, una espresión d’identidá y tamién d’enfotu pa lo que vien.
Nesta edición, ponemos cara y nome a esi arguyu. El homenaxe a Xosé Álvarez “Pin” ye más qu’un reconocimientu individual: ye l’alcuentru con una trayeutoria que representó l’entrega a la lliteratura como ferramienta d’activación cultural. Y ye, tamién, momentu d’afondar nel recuerdu a Damián Barreiro, qu’acabamos de perder y qu’encarnó, con allegría, rebeldía y firmeza, la entrega a la causa de la nuesa llingua, de la nuesa cultura cola so militancia na Xunta Pola Defensa de la Llingüa Asturiana. A ellos, y a tola xente que, como ellos, trabayaron por un país más llibre y con voz propia, debemos-yos esta celebración.
La Selmana de les Lletres ye, tamién, un territoriu pa la reivindicación. Les lletres n’asturianu tienen de facese fuertes como parte imprescindible del nuesu sistema educativu, del accesu a la cultura, de la producción creativa con igualdá de condiciones. Nun queremos vivir nos márxenes, más silencios nin más desprecios. Queremos que se reconoza’l derechu a vivir n’asturianu, a lleer, a crear y a trabayar nel nuesu idioma. Queremos dignidá, pero tamién puxu. Queremos respetu institucional, pero tamién compromisu ciudanu.
Porque les nueses lletres son camín, memoria y futuru. Son ferramienta de cohesión, d’alcuentru, d’inclusión. Son escuela de ciudadanía. La cultura n’asturianu ye un escenariu onde toles voces tienen llugar, onde nun se espulsa a naide, onde la pallabra tien valor pa tolos sentíos. Una cultura pa criar, pa emocionar, pa confrontar idegues, pa construyir realidaes meyores.
Defender les nueses lletres ye tamién una forma de facer patria. Esa patria que nun se mide por fronteres nin banderes, sinón por sentimientu compartíu, por valores comunes, por reconocencia mutua. Una patria filada con pallabres que nos amuesen lo que fuimos, lo que somos y lo que podemos llegar a ser.
Ye nel papel, na voz, na pallabra onde mos faemos fuertes. Ye na nuesa llingua onde la dignidá cobra forma. Y ye nesta selmana onde tamos toos y toes: los que fueron, los que son y los que tan por venir. Porque si queremos un futuru pa Asturies, tien de ser un futuru que se diga, que se llea y que se viva tamién n’asturianu.
