La escritora ya historiadora xixonesa Arantxa Margolles Beran resultó ganadora del II Premiu «Muyer» de Narraciones Trabe cola obra Santo Amaro, un testu que’l xuráu calificó como “frutu d’un trabayu rigorosu, con una narrativa suxerente amás d’un llinguaxe que busca’l valir lliterariu”.
El xuráu, que se reunió’l pasáu día 18 de payares y que formaron Natalia González Menéndez, Laura Marcos Domínguez, María Dolores Rodríguez Vázquez y Marina Paniagua Cuesta, baxo la presidencia d’Esther Prieto Alonso y col secretariáu de Samuel Castro González, valoró los cinco orixinales presentaos y decidió por mayoría conceder el premiu a Santo Amaro.
La obra ganadora ye una novela fonda que, valéndose de la historia d’una saga familiar, entra a nelos sentíos más humanos del viaxe vital: la busca del paraísu, los retornos eternos y, inclusive, l’eco del mitu d’Ulises.
Nacida en Xixón en 1982, Arantxa Margolles Beran ye historiadora pola Universidá d’Uviéu y posgraduada n’Arqueoloxía y Padreñuñu pola Universidá Autónoma de Madrid. Especializada na divulgación de la historia, la n’hemerografía y la xeneloxía, ye collaboradora habitual de dellos medios asturianos, entre ellos NORTES, y preside la asociación Iniciativa pol Asturianu.
Margolles ye tamién autora del trabayu d’investigación Fuimos granos d’arena. La solidaridá n’Asturies entel desastre d’Annual. Santo Amaro marca la so primera incursión na lliteratura de ficción, un campu nel que —según destacó’l xuráu— entró “con rigor y aciertu”.
El Premiu «Muyer», promovíu por Ediciones Trabe col sofitu del Principáu d’Asturies, tien como oxetivu reconocer y potenciar la escrita lliteraria en llingua asturiana realizada por muyeres.
