Miles de persones participaron esti sábadu n’Uviéu nuna manifestación convocada pa reclamar la oficialidá del asturianu y del eonaviegu nel marcu de la ‘Selmana de les Lletres Asturianes’.
La marcha, entamada pola Xunta pola Defensa de la Llingua Asturiana (XDLA), partió con unes 4.000 persones, según les primeres estimaciones de la Policía Nacional, dende la estación de tren de la capital del Principáu al son de les gaites y les panderetes.
El voceru de la Xunta, Xosé Candel, aseguró que la oficialidá ye la “única vía” qu’hai pa resolver una situación de “inxusticia” y pidió a les fuercies que la defenden que “vuelvan a intentalo”, dempués de que l’añu pasáu nun saliera alantre la modificación del Estatutu d’Autonomía pa dar la máxima proteición a estes llingües.
La reforma estatutaria pa la oficialidá del asturianu y del eonaviegu plantegada pol PSOE, Convocatoria por Asturies-IU y la diputada del grupu mistu Covadonga Tomé foi refugada na Xunta Xeneral del Principáu ante la oposición del PP, Vox y el parllamentariu de Foro, Adrián Pumares. La proposición de reforma estatutaria nun salió yá que se precisaba una mayoría reforzada de 27 de los 45 diputaos que formen l’hemiciclu y los votos de los diputaos del Gobiernu de coalición y Tomé nun fueron abondos.
Candel pidió al PSOE qu’“abasne a la derecha más razonable a un alderique en condiciones, onde nun tenga más remediu qu’aceptar que la oficialidá” ye’l camín a siguir. Per otru llau, criticó les pallabres del líder del PP d’Asturies, Álvaro Queipo, y aseguró-y que l’asturianu nun precisa “mimos”, sinón “derechos”, en sosteniendo que’l PP “se porta como un maltratador cola llingua asturiana”.
A la manifestación tamién allegó la conseyera de Cultura, Política Llingüística y Deporte, Vanessa Gutiérrez, quien aseguró que la oficialidá ye un compromisu “irrenunciable” del Gobiernu del Principáu y, hasta que pueda llograse, solliñó que l’Executivu trabaya nel ámbitu de la normalización y la difusión. La titular de Cultura llamentó la posición del PP de cerrar la puerta a la oficialidá, una actitú que calificó de “bien decepcionante”.
Pela so parte, el voceru de Convocatoria por Asturies-IU —sociu del Gobiernu asturianu—, Xabel Vegas, reivindicó la importancia de que les llingües asturianes tengan el “reconocimientu llegal que merecen”.
A la manifestación tamién allegó la secretaria xeneral de Podemos, Ione Belarra, quien aseguró que el Gobiernu del Principáu “podría facer muncho más pa protexer l’asturianu y nun se ta faciendo, y ye una cuestión básica de voluntá política”. Tamién dixo que ye competencia de l’Executivu central reconocer la especialidá docente del asturianu que estos profesionales vienen reclamando “dende fai munchu tiempu”.
