Güei, de magar les 11:15 de la mañana na Plaza Mayor de Xixón, podía vese un garrapiellu de xente delantre l’Ayuntamientu. Unes decenes de persones, mesmo artistes con pancartes que respresentantes de medios de comunicación, taben alredor de los músicos que lleíen les declaraciones, y qu’entainaben a esclariar nel so comunicáu qu’aquello nun yera «nenguna concentración nin una manifestación», sinón «namás una rueda de prensa».
La rueda de prensa yera’l resultáu de la recoyida de firmes qu’entamó hai unos díes la plataforma musicaasturiana.com escontra’l vetu a la música n’asturianu de Vox al traviés del manifiestu: música n’asturianu SÍ, y que diba rematar esta mañana cola presentación d’una moción al plenu del Conceyu de Xixón. A la reclamación agora xuníense munchos artistes a títulu individual y tamién asociaciones del sector musical y cultural como la Sociedad Cultural Gijonesa, Asociación Grana, la Caja Músicos, Sociedad Cultural Gesto y l’Atenéu Obreru de Xixón.
L’actu entamó cola afirmación, per parte de los músicos, de que taben «ablucaos y tristes por tener que tar dando esta rueda de prensa», yá que-yos paecía «surrealista» tener que «responder a unes intenciones tan graves como son les de nun querer programar música n’asturianu nos eventos festivos en Xixón», y preguntábense qué pasaría «si en Barcelona se quixera prohibir actuaciones de música en castellano?».
Na rueda de prensa presentáronse les más de 4200 firmes qu’apoyaron el manifiestu música n’asturianu SÍ y ente les que podíen topase, por exemplu, agrupaciones de baille tradicional, bandes de gaites, intérpretes de tonada, centros asturianos, comisiones de fiestes, periodistes, investigadores y profesores de delles universidaes. Según afirmó David Varela, allá nun taba namás «representada la totalidá de la escena musical n’asturianu», sinó tamién munchos nomes y entidaes que faen música n’otres llingües: acordies col comunicáu, «l’ataque nun ye namás hacia la música n’asturianu; ye un ataque qu’afecta a tol sector musical —independientemente d’en qué llingua canten—».
Ente la xente que taba na Plaza Mayor apoyando les acciones de los músicos y qu’asentía cuando David Varela entrugaba «¿Qué imaxe queréis que dea esta ciudá? ¿Una del sieglu XXI o una que discrimina a parte de la población y los trabayadores en función de qué llingua falen?» había artistes como Xune Elipe (Dixebra), Miguel Fernandi (Skama La Rede), Leticia Baselgas (L-R), Horacio A. García o Marga Lorences; escritores como Miguel Barrero o Natalia Cueto Vallverdú y profesores como Enrique del Teso.
Precisamente, esti llingüista y analista políticu declaraba a NORTES, depués del actu, que «Vox está haciendo lo que quería hacer: que sea discutible lo que no era discutible», pero tampoco nun amosaba munchu estrañamientu por que Carmen Moriyón y Foro dean espaciu a esti tipu de práctiques, yá que «tiene sus precedentes» puesto que «ella censuró a Albert Plá, y recordemos por qué: porque dijo que ser español era un asco, por una falta de amor patrio». Acordies con Teso, «ni siquiera estamos hablando de la oficialidá del asturiano ni de la protección del asturiano, estamos hablando de pura y simple censura», no que coincidía con Natalia Cueto, quien pensaba que ye «una postura ideológica ante derechos y libertades que incomodan, y que se pretende democratizar un discurso que para nada forma parte de la legitimidad democrática».
A títulu individual, foron munchos los músicos mesmo asturianos que d’otros llugares los qu’apoyaron la reclamación escontra’l vetu de Vox: dalgunos, por exemplu, como Rodrigo Cuevas, Hevia, Rozalén o Rigoberta Bandini, y inclusive dellos que van actuar esti branu en Xixón, como Vetusta Morla o Desakato, como puede vese nel llistáu de firmas que va facese públicu darréu.
A partir d’esti apoyu al manifiestu, los organizadores esplicaron cuáles van ser los siguientes pasos na llucha escontra la censura de Vox: de mano, presentar una moción al plenu del Conceyu de Xixón pa que se «garantice que pueda haber actuaciones d’artistes y entidaes qu’utilicen l’asturianu como llingua d’espresión».
En segundu llugar, esixir «una declaración per parte de l’Alcaldesa de Xixón, Carmen Moriyón, na que rechace contundentemente les palabres y les intenciones de la so compañera de gobiernu». Acorides col colectivu de músicos qu’impulsa’l manifiestu, hebo «un silenciu intolerable durante 10 díes per parte d’esta nueva corporación municipal y l’alcaldesa namás respondió con un artículu nel periódicu que nun garantiza nada nin rechaza les gravísimes declaraciones y intenciones de Vox».
Y, a lo último, pidir el cese de la conceyala de festexos de Xixón, Sara Álvarez Rouco, porque «la empresa pública Divertia nun tendría de tar en manes de quien comparte esos mesmos planteamientos».
Cuando acabó la rueda de prensa, los músicos que quedaben na plaza comentaben con plasmu y resignación les últimes novedaes del asuntu. Leticia Baselgas afirmaba que, «amás d’inconstitucional», «l’actitú d’esta xente quier imponer una realidad que ía la dellos pero que nun ía la mía», y la cantante y contrabaxista Mapi Quintana afirmaba, con unes pallabres que bien valdríen pa tolos presentes, que’l vetu «afectábala a nivel personal»: «yo esprésome n’asturianu na mio vida diaria, asina que ye una ofensa mesmo personal que profesional. Ye un drama perder derechos que se fueron ganando. Ye de Tribunal Internacional de La Haya. La ciudadanía nun entiende por qué tenemos que perder derechos. Débennos una esplicación».
