“Con la llegada de la democracia y el Estado de las autonomías, Asturias se diluyó en España incondicionalmente renunciando a su personalidad, a su identidad. No parece que fuera una decisión acertada”. A esto que digo en No hay país, Crónica política (y sentimental) de Asturias (1975-2022) podría añedi-y: “Aunque esto no es ninguna novedad y lleva siglos ocurriendo, en especial desde el siglo XIX”. Pero cuando escribí’l mio llibru inda nun apaeciera Nunca vencida, una historia de la idea d’Asturies, de David Guardado, qu’amuesa, con un ablucante trabayu d’investigación y rigorosa divulgación, que la historia d’Asturies nun ye otra cosa que la d’una renuncia.
Vuelve’l pensamientu sobre Asturies, al que tamién se renunciara dende la Transición, coincidiendo, y de xuru que non por casualidá, col fracasu del asturianismu políticu. Y failo con un puxu y una fondura sorprendentes dende la primera páxina de Nunca vencida, “una summa espléndida y llúcida sobre les idees sobre Asturies”, diz el medievalista Javier Fernández Conde. “Una obra monumental”, la denomina Pedro de Silva, que ta ente los ensayistes de la Transición a los que David garra’l relevu. “Un trabayu revelador” pa la prologuista Pilar Sánchez Vicente, a la que y-paez “imprescindible”.
Revelador ye inclusive pa los que tamos enfotaos na “cuestión asturiana”, una xera, davezu ingrata, que puede ocupar toa una vida ensin recompensa dalguna, porque’l pensamientu dominante n’Asturies ye implacable con toa disidencia y nun consiente la mínima heterodoxa. Y failo con gran eficacia, porque controla les instituciones, la vida académica y los medios de comunicación. Pal gran públicu la revelación que supón el llibru de David Guardado va ser extraordinaria. Pa muncha xente hasta traumática, como’l que descubre, yá de mayorucu, que’l so padre nun ye’l que creía, sinón otru paisanu bien distintu, del que malpenes y-falaron.
Yá dende’l títulu queda bien afitáu’l conteníu del llibru de Guardado, editáu por La Fabriquina, una pequeña editorial impulsada pol propiu autor. Les idees sobre Asturies, que marquen les que tenemos los asturianos y los nuestros comportamientos coleutivos, caltienénse sobre una montonera de mitos, eses fabulaciones de la realidá, davezu interesaes, que deben ser les primeras falsedaes de la historia, les “fake”de l’actualidá, esos grandes vehículos del fanatismo y la irracionalidá que inunden les sociedaes democrátiques modernes.
El primer gran mitu d’Asturies ye’l de Nunca vencida. Una tierra aislada por una xeografía xabaz, ente “un muro de elevadísimas montañas” y el “turbulento Océano”, como diz en 1859 Justo Álvarez Amandi nun artículu tituláu “La independencia de Asturias”. Porque son eses característiques físiques, venceyaes al enfotu pola independencia de los asturianos, que tienen un “sentimiento que bien podemos llamar de nación o pueblo”, les qu’espliquen xestes como la de los astures contra los romanos, Pelayo en Cuadonga y la francesada de 1808. Como los mitos son poliédricos y tresversales, que diríemos angüaño, más tarde se añediríen al de Nunca vencida les xestes de la revolución de 1934 y la resistencia al Exércitu franquista en 1936 y 1937.
Nenguna d’estes xestes resiste la más mínima comprobación historiográfica, tantos años dempués y con tantu trabayu d’investigación detrás, como dexen bien nidio’l llibru de Guardado y les sos propies aportaciones. Los romanos vencieron a los astures, pesie a la so rebeldía y el so heroísmu, y el so territoriu foi romanizáu, como amuesa l’arqueoloxía, anque los invasores nun paecíen tener otru interés nestes tierres que la estracción del abondante oru. De la escaramuza de Cuadonga, encabezada por un misteriosu personaxe que debía ser un líder llocal, Pelayo, nun salió Reconquista dalguna, sinón el Reinu d’Asturies, que llueu espardióse hacia’l sur. N’Asturies apaeció la primera Xunta Suprema frente a la invasión napoleónica, pero la derrota del invasor nun foi una victoria asturiana que marcara’l camín. La derrota de los revolucionarios en 1934 ye bien conocida, porque llegó con una dura represión. Dos años dempués los republicanos asturianos xuraron defender Asturies y resistir frente a los golpistes franquistes, hasta glayar al altu la lleva como lema que taba prohibido mirar al mar, como dicíen los comunistes, pero pelos puertos de Xixón y Avilés acabaron fuxendo los cabezaleros del Conseyu Soberano d’Asturies y Lleón.
El mitu de los mitos
De toes estes llectures épiques de la historia d’Asturies la más importante, el mitu de los mitos, ye Cuadonga, que marca’l rellatu del pensamientu dominante hasta l’actualidá. Guardado nun s’ocupa tanto d’afitar lo evidente, porque eso yá lo lleva faciendo la moderna historiografía dende cuantayá: en Cuadonga, una escaramuza de la que nun hai testimonios escritos hasta sieglos dempués, y toos interesaos, nun nació la nación española, que apaecería coles Cortes de Cádiz decimonóniques, sinón el Reinu d’Asturies, el primeru d’otros de la Península, xerme polo tanto de la pluralidá del actual Estáu español.
No que s’enfota Guardado en Nunca vencida ye nel contestu históricu nel que apaez el mitu de Cuadonga, el “covadonguismu”, nel sieglu XIX, na dómina de la Restauración, xusto cuando los poderes más conservadores, inclusive reaccionarios, tán na xera “de la construcción del Estáu nación unitariu y monárquicu n’Asturies, y el consiguiente procesu de nacionalización”. Nesta llectura histórica y política Cuadonga ye pegoyu básicu pal conservadurismu, ye la esencia del “triángulu relixón-monarquía-nación unitaria que’l nacionalismu español asocia a la idea d’Asturies”.
Amás de “cuna de España”, a Asturies se la presenta como modelu y exemplu de la “españolidá”, una madre sacrificada qu’arrenuncia a too, hasta a la so propia identidá, pola fía, que ye la gran nación española. Ye’l rector de la Universidá d’Uviéu, Félix Aramburu, el que suelta nun artículu una frase que acaba siendo dichu popular: “Asturias es España: todo lo demás, es país conquistado”.
Aramburu ye ún de los munchos intelectuales conservadores qu’algamaron un gran éxitu na contrucción d’esti relatu qu’acabó siendo hexemónicu. Tamién otru rector asturianu que pasa como Aramburu por asturianista, Fermín Canella, del que se diz que diba al rectoráu en madreñes. David Guardado, falando de mitos, tamién refuga esti: Aramburu y Canella se ocuparon d’Asturies, pero nun fueron asturianistes, sinón grandes defensores del relatu nacional-católicu covadonguista, que contribuyeron activamente a esparder.
Muncha más influencia nesta idea de subordinación ya inmolación d’Asturies nun proyeutu nacional español más eleváu, porque foi l’intelectual más relevante ente los sieglos XIX y XX, túvola’l filólogu y director de la RAE Ramón Menéndez Pidal, casáu con una asturiana.Y políticos asturianos como Alejandro Pidal y Mon y José Posada Herrera, grandes caciques asturianos dende Madrid, onde vivíen.
Verde, negra y roja
El sacrificiu d’Asturies nel XIX foi total, hasta’l puntu d’arrenunciar al so propiu nome, al pasar a ser Provincia de Oviedo en 1821, y perder la Xunta Xeneral en 1835, daqué que’l poder central borbónicu compensó col títulu de “Principado”. Y por supuestu, coincidiendo col romanticismu y la recuperación del patrimoniu llingüísticu y cultural de Cataluña, País Vasco y Galicia, tamién s’arrenunció al entós nomáu “bable”, consideráu un dialectu del castellanu, anque son llingües hermanes y romániques. En cambio vascos y navarros caltuvieron les sos instituciones y los sos fueros.
Pero nada hai que llamentar nesos arrenuncios, porque a una madre siempre-y compensa sacrificase polos suyos. Guardado esplica asina como la “Nunca vencida” se fixo sumisa y conformista:
“Asturies pierde les sos instituciones, el nome y la identidá, tamién la llingua; renuncia y sacrifícase cuando otros nun lo faen, pero la imaxe de la maternidá fai esa perda entendible y asumible porque tien razones poderoses y ta destinada a algamar un bien superior, el de la so fía, España, que, ye, en definitiva, lo que y-tien qu’importar a una madre”.
Los que nun lo faen, los que nun tán pol arrenunciu y el sacrificiu son los grandes enemigos de los impulsores del Estáu nación unitariu que se ta formando, ente ellos los federalistes de Pi i Margall, que tuvieron presencia n’Asturies, tamién nes instituciones, sobre too en Xixón, y qu’en munchos casos acabaron confluyendo col anarquismu, que llegaba xunto al socialismu y al comunismu col movimientu obreru a finales del sieglu XIX. Taba xorreciendo l’Asturies roja, dempués de la verde y señaldosa de los tradicionalistes, que foi sustituida pola negra del carbón, cola que vinieron la industrialización y la emancipación obrera. Mitos de la modernidá, que tamién tienen el so llugar nes páxines de Nunca vencida:
“Nesti nuevu marcu, los enemigos a combatir sedrán el provincianismu, el federalismu, el rexonalismu, l’autonomismu, el nacionalismu y el separatismu, adversarios de la prosperidá y la llibertá d’Asturies, o, meyor agora, d’España, que se verán como distintes espresiones d’un monstruu antisistema bicéfalu, que tendrá como otra manifestación la revolución social, la secularización y, en definitiva, el modelu rupturista col qu’irrumpe como un argayu a final de sieglu un movimientu obreru que cuestiona’l sistema establecíu y qu’impugna radicalmente’l triángulu relixón-monarquía-nación unitaria que’l nacionalismu español asocia a la idea d’Asturies, o más concretamente, a Cuadonga”.
Cola perda de les colonies, el nuevu discursu españolista qu’esparde la xeneración del 98 y el rexeneracionismu de Joaquín Costa, pa David Guardado’l sieglu XX ye’l del camudamientu del nacional-catolicismu al nacional-lliberalismu, un nacionalismu español unitariu, lliberal y laicu que defenden n’Asturies los profesores krausistes del famosu Grupo de Oviedo de la Universidá, con Fermín Canella nel rectoráu. Tamién bona parte de la izquierda y les elites culturales de la II República. La variante asturiana, la idea d’Asturies que llega col nacional-lliberalismu aporta una novedá. La renuncia xenerosa sigue siendo la xera d’Asturies, pero l’aportación asturiana al nuevu marcu estatal tien una característica propia, que ye’l so gran fechu diferencial: l’universalismu. El escritor Ramón Pérez de Ayala ye’l gran teóricu d’esti universalismu, que pa David Guardado resúmese en non molestar:
“Esti discursu ye un exemplu canónicu de la nueva idea d’Asturies que va convertise nel discursu oficial de les élites asturianes y que va condicionar la realidá política y social hasta anguaño: Asturies ye ‘universalista’ y por eso nin molesta, nin tien reivindicaciones propies, y les causes poles que se llevanta y llucha nun son asturianes específiques, son españoles, porque, en realidá, la so única causa, la so misión histórica, ye España”.
Dempués de la revolución del 34 y la guerra civil, cuando’l mitu de los mineros y la dinamita tamién se convirtió nun fechu diferencial, la fía disgustóse cola madre y Asturies pasó a formar parte de l’anti-España. Nun duró munchu la engarradiella, como suele pasar en toles families. Volvió’l nacional-catolicismu, esta vez impuestu pela vía militar, y el propiu Franco y-rindió pleitesía en Cuadonga. Asturies yera pa España una fía descarriada que llevaba dos sieglos perdida na vanguardia y la heterodoxa, pero que volvía a casa. Ún de los más destacaos intelectuales del franquismo, José María Pemán, describe como una desgracia lo que pa los asturianos reprimíos o exiliaos d’entós debía ser motivu d’arguyu. Pal escritor andaluz Asturies tenía un problema, “un reloj adelantado”:
“Cuando España era católica, ya ella era laica; cuando España fue laica y republicana, ya ella era roja; cuando España ha sido roja…ella ha sido, como veterana, tierra de feroz resistencia”.
La dimisión histórica
Cola nueva Restauración borbónica a la muerte de Franco y la llegada de la democracia surde l’asturianismu modernu con Conceyu Bable, qu’impugna’l relatu oficial sobre Asturies, el de la cuna d’España y la renuncia histórica, compartíu por izquierdes y dereches. Na I Xunta d’Estudios Rexonalistes Asturianos, en 1976, un abogáu bien mozu y líder entós de Democracia Socialista Asturiana, Pedro de Silva, plantégase si esa impugnación tendrá un sofitu popular na España de les autonomíes que yá se camienta:
“Lo que deben preguntarse los asturianos es, simplemente, si existen razones suficientes para sobrevivir como región, esto es, como colectividad, o ha llegado la hora de la dimisión histórica”.
Y eso foi lo que llegó, la dimisión histórica, precisamente con Pedro de Silva, el primer presidente salíu de les urnes na autonomía asturiana, que, como foi canon na Transición, nun cuestionó’l mitu de la renuncia y la maternidá. Recuperóse col estatutu’l nome ‘Asturies, pero venceyáu a “Principado”, denominación ensin la menor tradición popular, lo que pa David Guardado foi un auto-gol que se metió la izquierda parlamentaria asturiana, identificada dafechu col nacional-lliberalismu de principios del sieglu XX. Asturies accedió per primer vegada a l’autonomía, pero la idea tradicional, decimonónica y conservadora sobre ella y el so papel n’España siguía en vigor. Pal autor de Nunca vencida ye ún de los consensos de la Transición:
“Esta otra idea, la dominante na mayor parte de los sieglos XIX y XX, foi articulada en distintes capes discursives por Posada Herrera, Alejandro Pidal, Fermín Canella, Pérez de Ayala, Ramón Menéndez Pidal o Claudio Sánchez Albornoz, ente munchos otros y, anque españa de forma violenta cuando ye impugnada pol movimientu obreru, foi aceptada como parte del consensu de la Cultura de la Transición poles fuercies mayoritaries y pol establisment sturianu, garante y beneficiariu de la difusión d’esi discursu”.
El llibru de David Guardado, nesta dómina de regresu del nacionalismu español escluyente dempués del Procés, la cabera intentona independentista catalana, tien una llectura más allá d’Asturies, que nun ye namás qu’ún de los escenarios del vieyu conflictu ente una concepción d’España plural, federal y republicana, históricamente derrotada, tamién polos sos errores y escesos, frente a la unitaria, monárquica y tradicional. La cuestión nacional, la única pendiente de les que provocaron la guerra civil.
Superada y cuestionada la Transición, David Guardado ye de los que cree que, “anque sía con cuarenta años de retrasu”, inda ye ceo y los asturianos tovía tamos a tiempu de superar la “dimisión histórica”. O polo menos de plantegámoslo. Mesmo No hay país que Nunca vencida, si ye qu’activen un debate públicu, fairíen guapamente por ello.
