Con un calor —y unes folixes— tovía a mediu camín ente’l branu y lo que tea por venir, el día 8 de setiembre entama n’Asturies, tolos años, un nuevu cursu políticu, y la organización asturianista Aína quixo dar empiezu a esti periodu con una xornada «política y de xermandía» en La Casona de la Montaña (Uviéu).
L’actu comenzaba con una charra ente Isabel Á. Fernández y David Guardado alredor de la so obra Nunca vencida. Una historia de la idea d’Asturies (La Fabriquina, 2023) que constituyó, en bona midida, el sofitu ideolóxicu pal actu y pal so usu de símbolos asturianos tresversales como’l de la Santina.
Silvia Fernández, de la Mesa Nacional d’Aína, citaba precisamente a Guardado al dicir que nun ye conveniente pensar en «resignificar» el Día d’Asturies, porque «ye comprar la llectura derechista del mitu». Hai qu’usalos, ensin más: «los mitos existen, son anteriores a la historia oficial y de lo que se trata ye de da-yos otra llectura dende agora. L’ocho de setiembre ye’l día d’Asturies y nun pasa nada por reivindicalu. Como dicía Donna Haraway, hai que situar el conocimientu, y too depende d’ónde tu te sitúes».
La xornada siguió con un conciertu acústicu de Nacho Vegas, al que otra integrante de la mesa nacional d’Aína, Elena Gutiérrez, definió como «un referente dientro de la música asturiana»: apoyar la música asturiana, afirma, tamién «ye facer país». Y darréu entamó l’actu políticu, coles intervenciones de la mencionada Silvia Fernández, asina como d’Iyán González y Claudia González.
El discursu que lleeron estos partía d’unos versos de Manuel Asur («Y ensin acordanza un pueblu / nun tien futuru a la llarga») y plantegaba una conexón del nuevu asturianismu políticu con movimientos de la segunda metá del sieglu XX, como Conceyu Bable, pa facer un análisis de la situación social y política n’Asturies d’anguaño y proponer delles llinies d’actuación.
Depués de l’actu políticu vinieron la sesión vermú cola DJ Sandrasian d’Abres y una espicha porque, a lo último, les redes que se formen n’actos informales como esti nun contradicen el so enclín políticu: como alcordaba Elena Gutiérrez, «hebo muncha política, pero tamién hebo tiempu pa conocese y esparder, porque al final lo personal ye político».
