Apocayá escomenzaben les negociaciones ente la FSA y los distintos grupos parllamentarios asturianos pa l’aprobación -o non- de les cuentes del añu 2024. Conque pue ser esti un bon momentu pa reflexonar y abrir la visión sobre lo que signifiquen, más allá de les pormenoridaes y epígrafes específicos que contengan. A la mio parecencia los Presupuestos Xenerales d’un país tienen una triple vertiente: per un llau una mui xenérica, que ye precisamente’l modelu de país y de sociedá al que nos queremos empobinar, per otru les llinies xenerales coles que facer vidable esi oxetivu (partíes presupuestaries) y, por último, les midíes y acciones concretes que faen parte d’eses exes centrales. En resume, los Presupuestos Xenerales son l’instrumentu clave pa implementar la política económica y social d’un país; un diseñu y execución amañosu d’ellos ye fundamental p’algamar los oxetivos que se marcaren como referentes del modelu de país concretu hacia’l que se quier dir.
Los Presupuestos Xenerales d’Asturies habríen de contener les respuestes que necesitamos ante los problemes que tenemos (despoblación, desllocalización industrial, avieyamientu social, falta de cohesión territorial, desequilibriu xeográficu, etc.), amás de ser una ferramienta pa l’amenorgamienrtu de la desigualdá col fin de construyir una sociedá más próspera. Otra manera, esi ideal de Presupuestos hai que lo rellacionar con un conceptu del que n’Asturies habría qu’escomenzar a falar ensin mieu y d’una manera desprexuiciada: soberanía o, más bien, soberaníes. De mano, hai que ser conscientes que la noción d’esti conceptu nun ye la mesma qu’hai dos sieglos, cuando surde al abellugu del nacionalismu románticu n’Europa, pol que se creen los estaos-nación como los conocemos anguaño. Nel momentu presente, falar de soberanía ye facelo nun sentíu plural y variable, pero con un núcleu central común que ye’l poder de decisión, y venceyao con esto tamién la cercanía y l’empoderamientu social. A los asturianos y asturianes fainos falta repensanos en clave soberanista, una sociedá como la nuestra, pequeña demográfica y territorialmente, con pocu o nulu pesu políticu nel conxuntu estatal, necesita dotase de ferramientes coles que poder incidir nel so devenir como comunidá humana singular; precisa, si quier tener viavilidá nel futuru, tener la capacidá real de poder intervenir en toos aquellos asuntos que-y afecten. Faigamos nuestra la idea de soberaníes: alimentaria (productos de cercanía, distribución llocal, sostenibilidá…), enerxética (planificación de la esplotación de los nuestros recursos acordies a les nuestres necesidaes cola mayor eficiencia), comunicativa (tresporte públicu, rede de cercaníes, conexones esteriores…), financiera (banca pública), industrial (participación pública asturiana nun sector estratéxicu, llucha contra les desllocalizaciones…), mediática (medios de comunicación públicos fuertes al serviciu de les llingües y cultura del país), cultural (potenciar les escenes artístiques y referentes autóctonos), partidaria (mecanismos políticos propios -partíos, organizaciones, plataformes, movimientos…-) y, ta claro, política (capacidá de la Xunta Xeneral y del Gobiernu Asturianu pa tomar decisiones concluyentes sobre toos aquellos asuntos qu’afecten al país).
P’avanzar hacia esi ideariu, nel contestu políticu nel que ta enxertada Asturies, nun queda otro que puxar pol llogru d’un Estatutu d’Autonomía que nos facilite la capacidá de decisión y la posibilidá de dir dando pasos cara a un autogobiernu real y efectivu. La situación parllamentaria actual nun ye precisamente proclive, con unes fuercies mayoritaries rehenes d’unes inercies centralistes mui marcaes. Poro, toos/es aquellos/es que tenemos una idea d’Asturies como país y creemos na soberanía como preséu de tresformación social, independientemente del llugar político-partidista nel que trabayemos o nos asitiemos, hemos empezar a texer redes de confianza, comunicación y collaboración, cola vista puesta nuna futura respuesta electoral conxunta.
Volviendo al tema presupuestariu, les cuentes añales d’un país son la prueba del algodón de cuáles son les prioridaes que los sos representantes políticos y, especialmente, gubernamentales tienen. Detrás de les cifres y los númberos hai una doble vertiente, per un llau ta la individual, con persones concretes que pueden ver afectaes les sos condiciones de vida y per otru ta la colectiva, col modelu de país al qu’aspiramos. La importancia d’esta cuestión ye tanta que nun podemos arrenunciar a influyir nella de manera seria y fonda nun futuru… ¿quiciabes na próxima llexislatura?
