Va pocos meses Erik Harley asoleyaba Pormishuevismo. Un movimiento artístico (Blackie Books, 2023), llibru nel que l’autor atropa parte del trabayu d’investigación del que yá venía dando cuenta en medios de comunicación y redes. L’espertu n’estudios urbanos y xenial divulgador bautizó d’esti mou, pormisgüevismu, a esi fenómenu urbanísticu tan typical spanish compuestu pol abondante conxuntu d’obres que, desproporcionaes en tamañu y costu, salieron dalgún día del calenturientu y megalómanu maxín de dalgún políticu. Obres llevantaes por alcaldes y presidentes escontra l’interés popular y a favor del propiu. Obres que naide nun pidía y que’l xacíu común nun aconseyaba, pero que salieron alantre gracies a esi tipu de gobernantes testerones que faen política poniendo los sos atributos viriles enriba la mesa.
Quixo’l destín que la publicación d’esti llibru coincidiere casi nel tiempu col alzamientu n’Uviéu d’esi pirulu de dimensiones escomanaes que dende agora n’adelantre va dar la bienllegada a quien decida allegase a la capital d’Asturies. Más qu’involuntariu actu promocional de la obra lliteraria d’Harley, el pirulu vien a ser muestra d’una política urbanística tan antiestética como voluminosa que se resiste a desapaecer y que, lloñe d’ello, da señes de caltenese bien viva nesa raza d’alcaldes que, como Canteli (y magar que nun tien carné), guarden les esencies más pures del municipalismu popular (el del partíu d’esi nome, evidentemente, non el del pueblu).
La construcción de la pasarela que tien al pirulu como puntu de sofitu nun atiende a les necesidaes espresaes polos vecinos y les vecines de los barrios de la contorna, que vindiquen dende cuantayá la urbanización del antiguu tramu de l’A-66 que da entrada a Uviéu y la so integración na ciudá como un boulevard que coneute distritos y favoreza la movilidá sostenible y l’esfrute vecinal del espaciu. Con esti envís y dende l’impulsu de la participación coleutiva lleva trabayando dende va más d’una década la plataforma ciudadana Imaxina un Boulevard. Sicasí, la pasarela qu’agora se pon en pie allóñase dafechamente d’esta idea, calteniendo intauta la histórica fienda que supón pa la interconexón de los barrios el trazáu de la vieya autopista y anteponiendo’l fluxu del vehículu priváu al tránsitu de peatones. Falamos entós d’una infraestructura megalómana que nun respuende a otru qu’al antoxu del alcalde y que nun satisfaz más nada que’l so narcisismu. Porque, n’efeutu, ye difícil nun ver en tan bultable obra una muestra del narcisismu de Canteli; una proyeición, podíemos dicir, del so egu fálicu (arquiteutónicamente falando, claro ta). Una especie de monumental autohomenaxe erixíu por un rexidor que, en verdá, vien faciendo del pormisgüevismu’l so habitual modus operandi en tolos tarrenos y a tolos niveles.
Los icónicos chiringos dieron pasu a les homoxénees casetes de feria
Y ye que, dende la so instalación na casa conceyu, Canteli fexo del so caprichu política. Pocu amigu, a lo que se ve, de la policromía propia del arcu la vieya, desanició de color una Plaza de la Escandalera na qu’agora namái puen vese’l marrón y el negru de los bancos de misa qu’enllenen el recintu y el coloráu y el mariellu de la banderona qu’ellí llantó, tonos que de xuru-y presten más al alcalde. Contrariu a les fiestes populares, arrampló con un modelu festivu social, reconocible, d’ésitu y de consensu p’arriquecer, entá más, a la patronal hostelera. Los icónicos chiringos dieron pasu a les homoxénees casetes de feria (y a esi insoportable filu musical monocorde), convirtiendo la gayola en tristura y el beneficiu coleutivu en negociu d’unos pocos. Emperráu en facer un Uviéu a la midida de so, lo mesmo fura per una paré que per un monte. Los proyeutaos tuneles que tienen a la escontra a los y les vecines del Narancu constitúin una agresión mediuambiental qu’amenaza con enllenar d’asfaltu ún de los principales pulmones verdes de la ciudá. Como d’asfaltu y lladriyu va enllenar la fábrica de La Vega, atentando contra la integridá d’una de les principales ayalgues del patrimoniu industrial del conceyu y perdiendo una oportunidá pa la so entera reconversión como espaciu públicu y social; nesti casu, amás, col vergoñosu combayéu de la ¿izquierda? estatal, autonómica y municipal.
Canteli pon en marcha estes y otres midíes dende’l poder que-y da la mayoría salida de les urnes; pero, tamién, dende’l despóticu despreciu que-y concede a quien nun piensa como él. Y, asina, Uviéu ye, a cada pasu, una ciudá menos plural, más gris y más murnia; una cosa rancia que cada vegada s’asemeya menos a la diversidá de la so xente y más a la figura monolítica del so rexidor. Asistimos agora a un nuevu episodiu –tarrezo que nun va ser l’últimu– d’esi despotismu al que nos tien yá avezaos l’alcalde d’Uviéu: frente al boulevard qu’imaxinó l’asociacionismu vecinal, el pirulu de Canteli. El pormisgüevismu lleváu a la so máxima y mas esplícita espresión.
