Lo asocedío nes elecciones autonómiques gallegues últimes tien una doble vertiente, per un llau namás s’entiende en base a cuestiones endóxenes, propies de la socioloxía y idiosincrasia del país vecín; pero per otru tamién se pueden estrayer delles conclusiones de cara al esterior, más xenerales y xenériques. Los asturianos y asturianes de sentimientu progresista habríemos de miranos nesi espeyu gallegu y deprender de les llecciones que nos ta ufiertando. D’un análisis urxente d’ello podríen sacase conclusiones como estes:
- Dende hai un tiempu ta abriéndose un escenariu nuevu nel que les fuercies de calter territorial del Estáu van ser l’exe sobre’l que va xirar la política nél. El Bloque Nacionalista Galego (BNG) pasó a principios d’esti sieglu XXI la so particular travesía del desiertu, con rotures, escisiones, perda d’apoyos y l’apaición de les marees, que cásique lu lleva per delantre y raspió la desapacición institucional; sicasí, resistió y dedicóse a recomponer, texer complicidaes, crear infraestructura y reimplantase territorialmente.
- N’Asturies, les opciones netamente asturianistes siempre foron febles, institucionalmente irrelevantes y con una implantación mui reducida. Coalición Asturiana (de la que facíen parte Unidá Nacionalista Asturiana y Partíu Asturianista) foi’l mayor llogru -sacaría un diputáu- y la gran oportunidá perdida. La irrupción de Podemos Asturies nel 2015, cola participación individual de personalidaes asturianistes y colectiva d’organizaciones como Compromisu por Asturies, foi un momentu d’esperanza, cola entrada de nada menos que nueve diputaos na Xunta Xeneral. Coyuntura que nun se supo o -lo que ye peor- nun se quixo aprovechar pa crear dalgo propiu, situación que se repetiría nel 2020 con un Grupu Parllamentariu de cuatro diputaos. Les engarradielles internes, la falta de visión, los egos… echaron al traste cualquier intentu d’entamar nada nuevu y de calter asturianu equí.
- Sumar salió mui mal parada nesos comicios, con una candidata impuesta dende Madrid (por muncho que Yolanda Díaz seya gallega), una campaña floxa abondo y ensin saber alcontrar l’espaciu propiu. Amás, Esquerda Unida en Galicia ye prácticamente testimonial, colo que nun pudo sofitase nella.
- Lo de Podemos foi un verdaderu esperpentu, con unos resultaos irrisorios que muestren un proyectu acabáu dafechu, finiquitáu, pero que prefier morrer matando… a los que tien más cerca. Fíalo too a les elecciones europees y a llograr «colocar» a Irene Montero. Yá’l recién escoyíu Coordinador n’Asturies, Diego Ruíz de la Peña, enfatizaba nel calter estraparllamentariu y fuera de les instituciones que diba tener Podemos nos próximos años.
- L’oxetivu en Galicia yera desbancar al PP y afalar un cambiu qu’abriera un pocesu de tresformación progresista; agora nun s’algamó pero sentáronse les bases pa un futuru esperanzador. N’Asturies, les próximes elecciones autonómiques -previstes pal 2027- tienen un aquello perdistinto, equí trátase d’evitar que’l PP, xunto con Vox, se faigan col gobiernu y entremos nuna fase de retrocesu nos derechos civiles.
- Les ganes de cambiu en Galicia agrupáronse alredor del BNG, recoyendo les espectatives de la mayoría progresista, tresversalizando’l so discursu y llegando a sectores non estrictamente nacionalistes. N’Asturies, tovía nun hai una opción qu’axunte voluntaes polítiques diferentes que pueda llegar a condicionar fondamente un gobiernu autonómicu. Equí, Izquierda Xunida ye una fuercia implantada, con trayectoria y bien de representación institucional; en cuantes a Convocatoria por Asturies, tien que safase tovía del sambenitu de «marca blanca» d’IX, abriéndose decididamente a otros sectores socio-políticos y propiciando la participación dientro d’ella ensin tuteles internes nin esternes.
- Asturies necesita un mecanismu políticu propiu, ampliu, plural, poliédricu, con voluntá institucional y de gobiernu. Necesitamos implantación territorial, salir de los despachos, los llocales, los medios afines y los círculos reducíos nos que los y les que naguamos por facer país podamos conectar con un espaciu que ta ehí, esperando por una propuesta inequívocamente asturiana y comprometida socialmente.
Podríemos siguir apuntando conclusiones relevantes o, cuanto menos, interesantes de les elecciones gallegues y la so aplicación al contestu asturianu, pero una güeyada rápida dexa a les clares éstes. Saber aprovechales yá ye fariña d’otru costal…
