Pasaron les eleiciones gallegues y, arriendes d’ello, Nortes ta convirtiéndose nun espaciu nel qu’estremaes persones de distintos ámbitos políticos faen análisis d’elles. Artículos, como los de Xune Elipe, Alejandro Suárez o Faustino Zapico y entrevistes como la que fexo a esti mediu Xandru Fernández tienen un valir que nun suel ser avezáu nos medios que marquen tendencia nel país: falar de la política netamente asturiana…lo que, visto lo visto, nun ye poco. A la escontra d’ello, la política d’Asturies ta fondamente desasturianizada, con un sistema políticu amadrileñáu, pendiente de los últimos temes de moda na capital del Reinu, de les intrigues polítiques nos noyos de la izquierda y, en xeneral, de la política autonómica y conceyil de Madrid, qu’acaba llegándonos de segundes, viciada y con tol pescáu vendío, como si fuere “la midida de toles coses”.
Nesti espaciu n’abertal qu’ufre la tribuna de Nortes, y que ta siendo ocupáu, como cásique siempre, por figures masculines -señalo y nun arreniego de l’autocrítica– tamos pudiendo conocer les opiniones de firmes que faen parte de la cultura política asturianista y d’izquierda, en trés d’elles, y d’un dirixente de la principal organización a la izquierda del PSOE n’Asturies: IU y les sos families polítiques. Nesi sen, los posicionamientos asoleyaos son paradigmáticos y espeyen realidaes incontestables que tienen muncho que ver colo que nos pasa. Yo, voi facelo como militante soberanista y miembru de la Mesa Nacional d’Aína, un partíu con poco más d’un añu y que tien por enfotu’l rexenerar la política del país dende una óptica asturiana, d’izquierda, cercana, apostando por crear un espaciu políticu soberanu, non dependiente de dinámiques ayenes, que resista y tenga capacidá pa ilusionar a un asturianismu que se siente nel aire pero que vive na orfandá política, abellugándose n’estremaes opciones nes que “más que ser” busca “condicionar”.
Na riestra d’opiniones vertíes nesti mediu, emplégase la composición del sistema políticu gallegu pa falar de lo que ye, o habría ser, l’espaciu a la izquierda del PSOE n’Asturies y la so autonomía o soberanía organizativa respeuto de les dinámiques centralistes, col pesu que-y pueda apurrir a ello l’asturianismu. Sicasí, avanzo cuestiones: el gallegu y l’asturianu son sistemes políticos dafechu enfrentaos, por más que’l país vecín pueda paecenos asemeyáu al nuestru en términos culturales, xeográficos o históricos. Nin la derecha gallega tien un res que ver cola asturiana y el so auto-odiu, nin la izquierda bebe de les mesmes fontes que la d’Asturies. Asina, entamo, nun m’abulta qu’aquella seya meyor o peor que la nuestra: ye estremada y nun val de gran cosa querer xugar n’Asturies a analizar la realidá con unes cartes que nun tán enriba la mesa. Con too y con ello, siempre hai deprendizaxes que podemos treslladar dende ellí, que nos valgan p’avanzar equí, n’Asturies, como defendemos n’Aína, la mio organización política.
Discusión
¿A Asturies vendría-y bien un BNG? En realidá, más bien, podríemos dicir qu’a Asturies falta-y un BNG. Resulta una anomalía notable nel contestu estatal la non esistencia, equí, d’una fuerza de puxu eleutoral que tenga raigañu nel país, que tea formada y pensada dende y p’Asturies. Pero ello nun quier dicir que nun flote, sistemáticamente, nel ambiente esa posibilidá y/o necesidá nes últimes décades…y más nun contestu estatal nel que les organizaciones soberanistes, apegaes a la so tierra, cada vegada tienen más capacidá tresformadora en términos sociales y económicos nos sos ámbitos y, tamién, nel Congresu. En Galicia, como nel restu de territorios onde la exa “cerca-lloñe” opera fonderamente, esta ye clave pa condicionar los discursos de los partíos del sistema. N’Asturies esto nun vien funcionando asina -y asina nos va, analizamos coleutivamente n’Aína-, supeditando la capacidá política d’Asturies a dinámiques ayenes qu’en munchos casos son inxustes: nin les eleiciones asturianes tienen calandariu propiu, polo que sufren del arrastre mediáticu y políticu de les municipales a nivel estatal, nin la sociedá ye mesmamente consciente de la capacidá d’autogobiernu de les nuestres propies instituciones y el papel qu’estes podríen tener y al qu’arrenuncien conscientemente. Asina, el sistema políticu asturianu acaba siendo una réplica en piquiñino de lo que pasa en despachos a casi 500 km d’equí y poco más. Con esti panorama ye col que tien que frayar un movimientu alternativu qu’aspire a entender l’escenariu y les posibilidaes que tien Asturies y esti pueblu delantre de sigo mesmu.
Y ye que l’asturianismu modernu, como movimientu sociopolíticu que tresformaría l’Asturies que pudo nun llegar a ser ensin él, cumple esti añu 50 años, cuestión que nun ye anecdótica. Por más qu’atopemos una llínia histórica trazada nel pasáu -de la que bebe la xeneración qu’en 1974 ruempe la dinámica histórica de la política asturiana– [recomendamos equí la llectura con bolígrafu y papel al llau de Nunca Vencida de David Guardado (La Fabriquina, 2023)], l’asturianismu modernu tien, tolo más, 50 años. Ye nesi momentu, nos 70, nel que s’afiten social y, llueu, institucionalmente una serie de cuestiones que pudieron, lliteralmente, nun ser. Ye gracies a la fuerza de Conceyu Bable que güei munchos de los consensos y realidaes na política asturiana, muncho más alló de lo puramente llingüístico, esisten. Y foilo, por oposición social y militante a otres espresiones y cultures polítiques qu’esistíen n’Asturies y que se vieron influyíes -y presionaes- pol trabayu d’aquella xeneración d’asturianes y asturianos que dexaron un camín abiertu que güei quier siguir andando Aína.
D’entós p’acá, trunfos sociales y culturales valoratibles y, tamién, la incapacidá pa da-y forma-partíu a esi sentir que ta, como dicía enantes, nel aire y que partíos d’izquierda -y tamién de la derecha- n’Asturies nagüen por cooptar en caún de los procesos eleutorales. ¿Nun ye esta llucha por atropar l’asturianismu, tamién, un síntoma del puxu que tien -y pudiere llegar a tener- un asturianismu modernu, axeitáu a la realidá del país, que faiga por xenerar condiciones oxetives de cambiu social, políticu y económicu nesta tierra?
Y ehí ta’l noyu del alderique: l’asturianismu nació pa da-y otra traza a Asturies, pa poner el focu equí, pa tresformar la realidá económica, social y cultural d’esta tierra, pa entender y p’atender a los problemes específicos del Pueblu Asturianu y dotanos d’estructures propies dende les que facer palanca. Y féxolo, poles propies carauterístiques polítiques del país, dende una óptica d’izquierda, falando a les clases populares de les que surdió: non de les élites burgueses, dacuando importaes, dacuando enfotaes en ser reconocíes nel km 0 de la Puerta del Sol. Esti ye un puntu central, porque l’asturianismu modernu nun nació pa caltener les estructures polítiques de la izquierda o la derecha estatalistes n’Asturies, nin pa salvales en momentos de crisis esistenciales como esti nel que nos atopamos, metanes d’un gran ciclu de reconfiguración d’espacios y maneres de facer política nel que’l partíu en que milito quier intervenir activamente. Por más qu’heba un trabayu de méritu, estratéxicu y de formiguina, de decenes d’asturianistes dientro de los partíos del establishment pa qu’estos acueyan retóriques y discursos asturianistes, ello nun ye abondo. Nun lo ye, porque pa qu’esi pressing tenga credibilidá tien d’haber un espaciu que marque’l pasu ensin complexos: una casa común del asturianismu que tenga puxu, referencialidá social y sindical y, tamién, representación institucional. Eso ye lo que pasa en Galicia -y non n’Asturies- y amuésase imprescindible porque cuando llega’l momentu y hai que dar la talla política -eso venimos de velo na albortada reforma estatutaria-, l’asturianismu d’Izquierda Xunida, de Foro o, mesmamente, de la FSA, queda nun tercer, cuartu o quintu planu, diliéndose y operando como chapa de solapa cola que facer un selfie más que como un apueste estratéxicu.
En política, los atayos nun suelen funcionar
En política, los atayos nun suelen funcionar: vímoslo na reforma del estatutu del 98, conocímoslo col gobiernu de la “izquierda plural” al serviciu del proyeutu políticu antiasturianu de Tini Areces nel 2003, quedó claro cola esperiencia presuntamente asturianista de Foro que termina metiendo a VOX nel ayuntamientu de Xixón y tamos viendo nos últimos años cómo, anque nos digan que l’asturianismu añera en gobiernos de coalición, poques coses camuden a nivel políticu, institucional y presupuestariu y les reformes que-y dean otru aire al país siguen ensin abrise. Más qu’atayos, p’algamar cambios paez que va facer falta emburriar con puxu y organización dende les tribunes y les instituciones con voz propia, non con una emprestada.
En Galicia, la izquierda tienlo claro: pue disputa-y la hexemonía al PSOE porque ta apegada al país, porque lu lleva dientro, porque los sós son sindicatos propios, porque la Cultura (con mayúscules) xuega a favor d’ello. Los clivaxes sociales vixentes en Galicia, los que faen de venceyu ente sociedá y partíos, son de clas…pero tamién pasen, y cada vegada más, por sentir el país. Y sentilu ye muncho más que poner “Asturias” nel nome d’una candidatura, allugar una bandera asturiana debaxo del logotipu de la organización o usar dos o trés pallabres totémiques n’asturianu nun discursu, como si espolvorear de xemes un cuando un “xente” o un “folixa” al altu la lleva fuere abondo. Tampoco se siente más el país por llendar esi sentimientu a la señaldá histórica d’una Asturies que yá nun ta equí o a propuestes de máximos que nun ye posible algamar nun solu saltu.
Pero ye que xenerar una cultura política propia, como pasa en Galicia provoca, amás, otru efeutu rebote non necesariamente esperáu: los discursos d’odiu nun son quién a entrar nesi sistema políticu porque la lóxica na que xueguen nun tien encaxe direutu siquiera na derecha gallega. Hasta neses sal ganando l’apueste pol modelu alternativu, pola creación d’esa habitación propia pal asturianismu qu’en nome de la plena autonomía reivindicaba Virginia Woolf pa les muyeres.
Futuru
En más de 40 años, la izquierda sucursalista n’Asturies nun movió un deu por crear estructures propies que-y valgan p’averase a una idea mínimamente decente de país, nin pa nun depender de lo que pase cola xente que se cuela nos platós d’Atresmedia y con quien agora quier axustar cuentes tres d’un ciclu políticu que cásique los lleva a la irrelevancia. ¿Va facelo agora? ¿Daveres? ¿Va sentir el país? Lleendo con atención les sos declaraciones nesta tribuna pública -y los fechos mesmamente de la última llexislatura- resulta, oxetivamente, inxenuo creyelo. Y de pallabres guapes y mui pocos fechos sabemos muncho nel asturianismu.
Tenemos una oportunidá histórica pa facer de 2027 l’añu nel que l’asturianismu entre a camudar la cultura política d’Asturies con voz propia: nin subarrendando discursos, nin siendo la cuota azul y mariella d’un espectáculu nel que lo pasen bien otros. Ha facelo con paciencia estratéxica y el puxu d’una xeneración nueva que vien de la orfandá política y de votar coles narices tapaes. L’asturianismu, esta batalla ha diseñala entendiendo’l momentu con xenerosidá y cálculu, abriéndose a falar con tol mundu ensin ser nin más nin menos que naide, estimando al pueblu que vive nesti cachín de tierra y faciendo por que’l focu se mueva de lo que pasa lloñe a lo que vemos énte nós, acaldía. Hai qu’ilusionar y atraer a munches y munchos qu’entá nun saben que son asturianistes o que nagüen por un votu útil en clave de país.
Tenemos, entós, trés años pa diseñar una ferramienta amplia y plural que garre lo meyor de la tradición política democrática asturiana, que tome nota de les meyores esperiencies sociales y reivindicatives de la última década y media, que sepa interpelar a la sociedá pa qu’esta nos dea una oportunidá. L’oxetivu ta claru: algamar esa meyor versión d’Asturies que toes y toos sabemos que podemos llograr. Hasta aquellos qu’inda nun creen nella.
