Más vos val entamar a nadar pa nun dir pal fondu como piedres…porque los tiempos tán camudando”. La voz y la guitarra de Bob Dylan entemécense con imáxenes d’una dómina pasada que nun va tornar yá. Esti ye l’entamu de la película Watchmen, una distopía creada por Alan Moore na que se nos muestra en sepia un pasáu recién que queda mui lloñe.
Como na película, vivimos tiempos de cambiu permanente. Pasen tantes coses que fechos d’hai pocos años abúltennos como si fueren d’hai sieglos: el crack de 2008 y los retayos, el ciclu de movilizaciones, les eternes convocatories eleutorales… Tiempos d’aceleración histórica, lo llamen, nos que pasa muncho en mui pocu tiempu. Esta crisis que tamos viviendo anguaño pon enriba la mesa, otra vegada más, un nuevu fracasu del sistema social y económicu nel que tamos; un capitalismu y una globalización antihumanos que se ven, otra vegada, incapaces de garantizar la salú y, a la fin, una vida decente nesti planeta.
Dixéronnos que’l progresu yera desllocalizar la producción industrial pa poner a la clas obrera a producir al menor costu económicu posible pal patrón. Que daba igual si lo que precisábemos taba a miles de kilómetros, nun país onde robar la riqueza del so subsuelu yera inda más fácil. Que nun pasaba nada por tirar comida a la mar si eso valía pa garantizar el caltenimientu de los precios. Que la xestión que faen de los servicios esenciales pa la población como la salú o l’enseñu yera muncho meyor si esta taba privatizada. Que los empresarios yeren los más preparaos de la sociedá, que son a xestionar de manera eficiente la so economía pa caltener sueldos ya inversiones nueves… y, nestes, llega una emerxencia humanitaria y queden tolos sos argumentos en chasis. Con ella, aporten a Asturies les primeres midíes d’una “nueva normalidá” de diseñu urbanu y central español qu’en dellos casos rinchen al aterrizar nel nuesu país.
Blindar la sanidá y los cuidaos a dependientes y mayores tien de ser el primer pasu, tres d’esti andanciu
Pero hemos ser optimistes. Hai alternatives, equí y agora… y non: nun facía falta que llegare esta pandemia pa que n’Asturies, hubiere xente calteniéndoles, (re)pensándoles y tornando a poneles enriba la mesa, faciendo d’espeyu nel que miranos.
Con too y con ello, tenemos una oportunidá d’oru pa da-y la vuelta a la situación. Nun ye una frase fecha: Asturies tien unes carauterístiques económiques, ambientales, demográfiques y culturales -toes elles materiales- que bien podíen valinos pa salir d’esta crisis con ferramientes pa dotanos d’un futuru meyor. Si hai dalgo que ta amosando esti COVID-19 ye la necesidá de mirar más por y pa nós, emponderando lo propio y la producción de cercanía por xusta y sustentable pa col mediu y pa col nuesu pueblu y tolos pueblos del mundu, enfotándonos en facer más caltenible la nuesa subsistencia.
Blindar la sanidá y los cuidaos a dependientes y mayores tien de ser el primer pasu, tres d’esti andanciu. Que quede claro que’l sistema de sanidá públicu y la so xestión asturiana ye lo más importante y ha espardese territorialmente, ameyorándolu y afayándolu a la nuesa realidá. Garantizar que naide, enxamás, va quedar atrás: nin pol so orixe nin pola so estracción social. Que vamos ser trataes y trataos como merecemos.
Amás, Asturies tien la oportunidá, nesti contestu, de promover midíes que vayan camín de la soberanía alimentaria, dependiendo cada vegada menos de redes xestionaes poles grandes centrales de compra transnacionales, amenorgando la buelga ecolóxica y apostando por una xestión humana del mediu a favor de los intereses de toes. Puxar pola agroganadería y pesca asturiana ye da-yos vida a los nuesos pueblos, a les redes de consumu de kilómetru cero. Defender que tolos servicios públicos d’alimentación como los comedores escolares, los de les residencies o d’hospitales dependan lo menos posible d’alimentos producíos fuera del país habría ser una prioridá; lo mesmo que consumir más de mercáu y menos de Mercadona, favoreciendo la posibilidá de crear servicios de distribución xustos -dende l’almacén de los productores a les cases- nos que demandar productos de marques nueses; el yá denomáu “Amazon a l’asturiana”. Facer de la nutrición un procesu xustu, ensin intermediarios, saludable y asturianu. Facer que l’Asturies vaciada pueda ser, como nesti confinamientu, l’Asturies naguada.
Tolos indicadores socioeconómicos dícennos que fomentar el texíu cultural propiu d’un país ye invertir en mayores cotes de xusticia social, d’igualdá y de bienvivir
Pero nun vamos quedar na alimentación namás. Si dalgo ta quedando claro nesti momentu ye la irrupción del teletrabayu, tres del que s’escuenden situaciones, dacuando, mui perverses como la realidá de los horarios 24/7 o l’apaición de fenómenos del tipu “falsos autónomos” qu’hai qu’evitar. Sicasí esti teletrabayu, tamién habría ser una oportunidá pa que la población asturiano dexe de tar obligao a vivir en macrociudaes como la exa Madrid-Barcelona, -recuperando a eses asturianes emigraes- y, tamién, pa que nun faiga falta vivir o desplazase a los puestos de trabayu del centru d’Asturies tolos díes, favoreciendo la posibilidá de re(habitar) les villes y pueblos del país. Pa too ello, el gobiernu asturianu habría facer un esfuerzu por allegar les telecomunicaciones a tolos nuesos valles, reforzando tamién el tresporte públicu que guapamente podía recuperase cola asunción de competencies sobre la FEVE.
Hai que señalar otros retos: apelar al control públicu sobre la enerxía -pa favorecer la producción competitiva ensin retayar les condiciones llaborales-, afitar rentes básiques que garanticen derechos y afalen el consumu en redes de proximidá, fomentar la conciliación familiar al traviés del refuerzu del enseñu públicu -incluyendo’l tramu 0-3 años-, diseñar un plan d’accesu a la vivienda digna… polítiques toes a tener en cuenta na nueva Asturies que vamos tener que refundar xuntos.
Pa finar, nun podemos dexar arrequexada la cultura asturiana. Ensin ella, nun somos más qu’un pueblu ensin norte, identidá nin referentes. El papel que pue xugar na cohexón social, na xeneración d’inercies positives y na meyora de l’autoestima coleutiva la nuesa cultura y la defensa de la llingua asturiana y el gallego-asturiano ye clave. Nesti sen, el protagonismu de los conceyos -colos sos espacios culturales-, de l’alministración asturiana y de la Radiotelevisión Pública del país tien de ser máximu. Tolos indicadores socioeconómicos dícennos que fomentar el texíu cultural propiu d’un país ye invertir en mayores cotes de xusticia social, d’igualdá y de bienvivir. Ye’l momentu d’enllenar d’espresiones culturales feches equí los equipamientos públicos, de promover circuitos, espectáculos y arte al algame de tolos públicos. Un ociu alternativu, que refuerce’l sentimientu coleutivu y que mire pa la nuesa realidá, tresformándola.
Pero pa too ello, pa rectivar a la sociedá asturiana en positivo, ye imprescindible que pongamos los finxos pa tener una fiscalidá realmente progresiva y xusta, recuperando una banca pública asturiana, perdida hai casi una década, que podía tener un papel central nel sofitu a tolos seutores económicos que busquen arimar l’hombru socialmente nel ámbitu de les economíes sociales, l’agroganadería, el diseñu y la publicidá, les producciones culturales, el deporte…
Estes son delles idees fuerza coles qu’entamar a trabayar. Namás depende de nós el llograr que d’esta crisis salga una Asturies refundada y meyor. La nuesa responsabilidá coleutiva ye la d’organizanos, la d’emburriar p’avanzar haza un modelu más caltenible y xustu de país. Otra Asturies, segura de sí mesma. Una que pague la pena ser vivida.
