El día en que’l “bable” entamó a salir nos periódicos

Recomendados

David Artime
David Artime
Periodista y escritor. En 2009, ganó el premio de narrativa en lengua asturiana de la editorial Trabe con la novela "La Bufanda", en la que aborda el mundo de los ultras de fútbol.

Güei que namás los partíos políticos d’izquierdes paecen apostar pola oficialidá del asturianu, resulta curioso pensar que fai 50 años foi un periódicu católicu de dereches el pioneru n’introducir la llingua asturiana de forma regular na prensa xeneralista. Trátase del diariu uvieín Región, que’l 17 de xineru de 1971 entamaba a publicar la páxina quincenal Amigos del Bable, xestionada pola asociación del mesmu nome que naciera dos años antes.

Anunciu d’un concursu de Tonada organizáu pol diariu Región en 1971.

Cuéntalo’l periodista y escritor Inaciu Galán na so tesis La llingua asturiana nel franquismu, y tamién se refieren a ello José Luis Campal y Aurora Sánchez nun estudiu de la Universidá d’Uviéu. La edición d’esta páxina, tando’l diariu daquella baxo la dirección del periodista y escritor Ricardo Vázquez Prada, considérase ún de los grandes llogros d’Amigos del Bable. Yera esta la primer asociación que nació, dientro de los círculos franquistes, con un enfotu claru de recuperar y dignificar l’usu del asturianu.

Llorienzu Novo Mier yera’l responsable de la publicación

L’escritor Llorienzu Novo Mier, fundador de l’asociación, yera’l máximu responsable d’esta publicación. Nun se trataba d’una fueya esclusivamente n’asturianu, pues incluyía a veces artículos en castellanu sobre temes asturianistes. Tamién noticies, poemes, relatos y tou tipu de testos en llingua asturiana recuperaos de dellos autores como Pachín de Melás, Antón de Marirreguera, Enrique García Rendueles o Emilio Palacios, y hasta traducciones d’Iriarte, Samaniego, Cervantes o Juan Ramón Jiménez.

La fueya ‘Amigos del Bable’, pasó dempués a llamase ‘La Página del Bable’ y a lo último sería simplemente ‘Bable’, y editóse mientres cuatro años, hasta’l 14 de mayu de 1975. La so periodicidá nun foi regular, pues hubo époques nes que salía cada dos domingos, y époques nes que se publicó miércoles y vienres.

Sicasí, la vinculación del diariu Región cola llingua asturiana nun entama nesti tiempu. En 1925 resultó nomáu director Constantino Cabal, ún de los mayores estudiosos y difusores de la cultura y el folclor asturianu. El periódicu, nesta época d’un calter marcadamente facista (nos años 70 les sos postures yeren mucho más moderaes), llega a incluyir en 1939 una poesía n’asturianu dedicada a la La Santina, y de calter abiertamente franquista.

Muestres de Estaya Rexonal y Alitar Asturies nos años 70.

Tanto la tesis de Galán como l’estudiu de Campal y Sánchez refiérense a esta páxina como un finxu históricu na llegada de la llingua asturiana a la prensa xeneralista. Posteriormente vinieron otres esperiencies, como la Estaya Rexonal d’El Comercio, que pasaría a ser Alitar Asturies en 1978, o la seición de Conceyu Bable que dende 1974 publicó Asturias Semanal.

- Publicidad -

Actualidad

Dejar respuesta

Please enter your comment!
Please enter your name here