Esti miércoles, día 21, va llevase a cau la presentación online de 108 metros (Hoja de Lata, 2021), el segundu títulu de la triloxía Working Class del italianu Alberto Prunetti. Nesti alcuentru virtual, que va poder siguise a traviés del canal en YouTube del sellu asturianu Hoja de Lata, van intervenir, amás del autor toscanu, el diputáu de Podemos Asturies y escritor Ricardo Menéndez Salmón, qu’escribió’l prólogu, y Francisco Álvarez, traductor de la obra y redactor de Nortes.
Alberto Prunetti, escritor y traductor lliterariu d’inglés y español, nació en 1973 na ciudá industrial de Piombino, na provincia toscana de Livorno. En 108 metros narra les sos vivencies como emigrante italianu esplotáu llaboralmente en Gran Bretaña, país al que marchó al acabar los estudios universitarios en Siena y onde trabayó como pizzeru, llimpiador de váteres, pinche de cocina y xornaleru agrariu. L’autor afirma que n’Inglaterra como trabayador “nun tenía derechu a nada. Solo había d’emplegar pallabres como «Yes, sir, I will», «Of course I do»… Nun había de cuntar la historia. Solo había d’entender los verbos n’imperativu qu’emplegaben los encargaos”. Pol contrario, añade, “en 108 metros la historia cúntola yo coles mios propies pallabres”.
Esti llibru ye’l segundu títulu d’una triloxía obrerista qu’entamó con Amianto (Hoja de Lata, 2020), onde relata la so infancia nos años 70 nuna familia livornesa de clase trabayadora y la vida de so pá, Renato Prunetti, un obreru del metal que morrió a edá temprana por mor del amiantu al que tuvo sometíu mientres trabayaba como tuberu soldador percorriendo fábriques y plantes industriales a lo llargo de tola bota del mapa d’Italia. La obra d’Alberto Prunetti ta tornada yá a cinco llingües: español, catalán, francés, inglés y griegu.
