Oficialidá y política llingüística: desfaciendo la rede

Equí una guía rápida pa nun se perder nesti engedeyu terminolóxicu d’oficialidá, llingua, política llingüística, obligatoriedá del enseñu, inmersión llingüística...

Recomendados

Nicolás Bardio
Nicolás Bardio
Es politólogo, escritor y creador de juegos de rol.

Falar d’oficialidá, llingua, política llingüística, constitución, imposición, obligatoriedá del enseñu, inmersión llingüística… ye siempre un baturiciu. Equí una guía rápida pa nun se perder nesti engedeyu terminolóxicu.

¿Qué ye la oficialidá?

La oficialidá d’una llingua implica el poder emplegala y que mos atiendan nella en toles circunstancies públiques. Dende la declaración de la renta hasta un permisu d’obra pa una casa pasando per Correos, la RENFE, l’aeropuertu, un xuiciu… etc. La oficialidá d’una llingua implica namás l’usu alministrativu d’ella per parte de los ciudadanos y de l’alministración pa con ellos. Exemplos de llingües que son oficiales y tán amenazaes sobren nel mundu, anque quiciabes el casu del gaélicu irlandés seya’l más claru.

¿Qué implica que l’asturianu lo seya?

Que l’asturianu podría emplegase, amás del castellán, a la hora de facer una declaración de la renta, de pidir un permisu d’obra, de mandar una carta en correos…

¿Qué ye una llingua vehicular?

Una llingua vehicular ye una llingua que s’emplega como “vehículu” pa tresmitir conocimientu. Dicho d’una manera más cenciella, ye l’idioma nel que “se dan” les asignatures. Qu’un idioma seya vehicular nel enseñu nun tien nada que ver cola so oficialidá: el castellán foi la única llingua vehicular bien d’años y ye oficial y l’inglés ye tamién una llingua vehicular en munchos colexos públicos y nun ye oficial.

¿Qué implica que l’asturianu lo seya?

Que delles (o toes les asignatures non llingüístiques) podríen dase n’asturianu como se dan anguaño en castellán o n’inglés.

ILUSTRACIÓN: Lucía Mybro

¿Qué ye la inmersión llingüística?

La inmersión llingüística ye un sistema educativu pel qu’en comunidaes con más d’una llingua, toles enseñances se dan nuna d’elles y la otra llingua queda únicamente pa la so propia asignatura.

¿Ónde hai inmersión llingüística?

N’España namás hai inmersión llingüística en dos comunidaes autónomes: Cataluña (onde en castellán namás se da l’asignatura de castellán y tolo demás dase en catalán) y Asturies (onde n’asturianu namás se da l’asignatura d’asturianu y tolo demás dase en castellán). Les demás comunidaes autónomes billingües opten por diversidá de modelos. Como datu interesante, en Cataluña danse más hores de castellán que n’Asturies d’asturianu.

¿Qué ye la obligatoriedá d’una asignatura?

Les asignatures obligatories (o troncales) son les que formen parte del plan d’estudios pa tolos alumnos. Son asignatures obligatories la llingua castellana, les matemátiques, la educación plástica, la educación musical, la educación física, les ciencies naturales… etc. Si l’asturianu fore oficial, sedría una asignatura más como toes eses.

¿Qué ye’l PIN parental?

El PIN parental ye una midida que propón VOX pa munches asignatures y conteníos educativos na que los padres han d’autorizar al colexu a que-yos enseñen esos conteníos a los neños.

¿Tien l’asturianu un PIN Parental?

Sí. La enseñanza del asturianu n’Asturies ye esautamente la que defende Vox pa estos conteníos: Un PIN parental na que los padres pueden sacar a los sos fíos d’estudiar esta asignatura.

¿Qué requier la oficialidá pa ser aplicada?

El drechu a la oficialidá reconozse na Constitución Española dende 1978. Pa declarala, fai falta reformar l’estatutu y poner que l’asturianu ye oficial. Esta reforma del estatutu requier d’un alderique  y una aprobación por 3/5 del parllamentu asturianu y por mayoría absoluta del Congresu de los Diputaos.

ILUSTRACIÓN: Lucía Mybro

¿Qué drechos y obligaciones pue trayer la oficialidá?

La oficialidá nun da más derechos a los asturianos que’l de poder emplegar la so propia llingua na esfera política. Tampoco implica más obligaciones pa la propia alministración que la de cuntar con personal preparao pa poder emplegar l’asturianu. Tolos demás derechos y obligaciones nun parten de la oficialidá, sinón de la política llingüística.

¿Qué ye la política llingüística?

El conxuntu d’aiciones polítiques coleutives qu’una comunidá garra pa cola so llingua o coles sos llingües. Dientro de la política llingüística entraríen les polítiques educatives, les sovenciones, la política de medios de comunicación… etc.

¿Va ser amable la oficialidá del asturianu?

Nun ye que vaiga o nun vaiga selo, ye que nun-y queda otra: La oficialidá del asturianu namás puede ser amable porque tolos derechos llingüísticos que tán reconocíos anguaño a los falantes de castellán van siguir reconocíos. La declaración de llingua oficial del asturianu nun implica alteriar en nada’l calter d’oficial del castellán nin los drechos de los falantes. Ye siempre una oficialidá amable.

¿Cuánto cuesta la oficialidá?

Cero euros (0 €). Una oficialidá, como yá vimos, namás implica tener personal capacitao nes dos llingües. Esto pue consiguise poniéndolo como requisitu o faciendo un esame ensin implicar un gastu mayor al Principáu. Estos esámenes esisten (el famosu Certificáu de Llingua Asturiana B2 y C1) y pa poder facelos hai que pagar, colo que l’alministración gana perres con ellos. Poner como requisitu p’algamar una plaza’l tener esi esame, tien un coste de 0€.

¿Cuántu dineru produz la oficialidá?

La oficialidá nun produz ganancies económiques per sigo mesma. Con too, l’Estáu Central nos Presupuestos Xenerales del Estáu establez unes partíes presupuestaries pa les comunidaes autónomes billingües a les qu’Asturies tendría accesu de tener l’asturianu la condición d’oficial.

ILUSTRACIÓN: Lucía Mybro

¿Cuánto cuesta la política llingüística?

El coste de la política llingüística ye variable: nél entraríen les sovenciones, traducciones, la formación y, en xeneral, el promover l’accesu a la cultura propia y estranxera en llingua asturiana. Les polítiques más ambicioses como les de Cataluña pueden ser decenes de millones d’euros, mientres qu’otres ser muncho menores. Asturies, por exemplu, nun gasta nin 2 millones d’euros na so llingua, muncho menos de lo que cuesta, por casu, una orquesta pública.

¿Produz ingresos una llingua?

Lo cierto ye qu’en xeneral una llingua produz munchos más ingresos que gastos. Ye’l casu del estudiu económicu que se fixo en Valencia col valencianu. Anguaño, más del 97% de los llibros que s’editen n’España edítense en Madrid o Barcelona. La industria en llingua propia ye un re-llocalizar la industria cultural. Les películes n’asturianu ye da-y emplegu a los actores asturianos, los videoxuegos n’asturianu ye da-yos emplegu a los programadores asturianos etc, etc.

¿Hai rellación ente oficialidá y independentismu?

Non. La declaración d’una llingua como oficial nun implica en nada qu’esporpolle’l nacionalismu. La Comunidá Valenciana tien una llingua oficial y nun tien partíos independentistes mientres que Canaries tien partíos independentistes y nun tien más llingües que la castellana.

Artículo anteriorEsto nun ye una canción
Artículo siguienteVoluntarios limpian el Nora

Actualidad

Dejar respuesta

Please enter your comment!
Please enter your name here