Periodu bíblicu

Too ello asocedió nun espaciu paralelu al de la mayor parte de La Pola, y sobre manera al de la casa conceyu, pero al empar abiertu a la multitú de cierta Asturies alternativa

Recomendados

Pablo X Suárez
Pablo X Suárez
Filólogu y rapsoda local. Autor, ente otro, de los poemarios "Little Babilonia" y "Cómo evitar el apocalipsis", amás de la recopilación de relatos "Yoni y yo".

La historia muévese pendularmente porque ta fartuca de sí mesma. A la vuelta de siete años contemplo’l tal péndulu alloñase a kilómetros de distancia, y tengo que llamar a Manolo pa concretar les circunstancies d’aquel instante iniciáticu, iviernu del añu 2014, na que’l Llar el Mataderu s’abrió a La Pola y a la escena. Entós la Madreña siguía abierta n’Uviéu y aquel fuelgu inicial que venía del 15M de diba dos primaveres remocicó en xineru d’aquel añu col exemplu de los vecinos del barriu de Gamonal, en Burgos, qu’a fuerza d’acción directa fueron quien pa parar les obres que l’ayuntamientu proyectaba en barriu. Nel propiu conceyu, dende finales del otru añu, les manis semanales escontra la zona azul en Llugones llegaron a axuntar a mil persones y a incluyir escraches, muñecos aforcaos y barricaes n’intensidá creciente a lo llargo’l mes. Diben xestándose les Marches pela Dignidá que percorreríen el reinu y invadiríen la capital d’él el 22 de marzu, y mientres Manolo coincidía nel Judá con nós y andaba chináu con asuntos más polesos, como’l pieslle del centru de día El Sol, que llevaba l’asociación Abierto Asturias y apurría apoyu educativu a menores con riesgu d’esclusión.

Manolo, pela so parte, taba al cargu de l’asociación Mistós, espacios xitanos d’integración sociocultural, a la que l’ayuntamientu tenía recluyíu nel espaciu probablemente más ruinosu y abandonáu col qu’entós contaba en La Pola, l’antiguu Mataderu, onde teníen cedíu’l pisu’l mediu, l’únicu que de raspión cumplía con unes condiciones mínimes pa les actividaes qu’entós desenvolvíen cola comunidá xitana del barriu de La Luz que tenía al par. Conocía a Manolo del Judá, pero foi tanto ehí como n’otros espacios pelos que Manolo proyectaba la so persona y activismu nesi momentu d’efervescencia onde foi biltando la idea de xestionar colectivamente’l conxuntu d’aquel abandonu. D’ehí les primeres asamblees que desembocaron nuna riestra manifestaciones que siguíen el rebufu d’aquelles que taben removiendo Llugones. En La Pola’l proyectu de zona azul nun contaba con un refugu tan xeneral como na so némesis, pero a esta amestábense-y otres demandes como la d’El Sol, que nun evitaron que cola repetición semanal y la pasividá política les movilizaciones fueran poco a poco desinflando. De too ello, sicasí, pasaes les Marches de la Dignidá, que tamién se coordinaron localmente dende’l Mataderu, quedó una asamblea diversa y bastante poblada, y con ella’l Llar como espaciu d’autoxestión, que na seronda d’esi añu 2014 taría yá a plenu funcionamientu.

Daquella, como primero pasara en La Madreña, yera común ver trabayar xunto a xente qu’unos meses enantes guapamente quedaría pa engarrase, y aquello vilo ente xente que conocía y apreciaba y ello reconfortábame, y asina a comuña acondicionaron la sala de conciertos d’abaxo, con esa hermosa estética pa quien sepa apreciala, que depués foi puntu de resistencia d’una escena punk-hardcore que tampoco ye que pasara pel meyor momentu. Los espacios vacíos yeren inmensos como tamién lo yera la gana d’enllenalos. El ximnasiu funcionó bien bastante tiempu, la sala de skate yera ampliamente rodada, y arriba, nel pisu altu, na biblioteca al llau de la sala malabares, apigazaben los llibros qu’un día vinieron na Feve dende La Madreña en carros d’Alimerka.

Col ánimu xeneral, l’asamblea foi menguando por delles causes, ente elles la perda progresiva d’aquella rara capacidá de trabayar xuntos a pesar de les ganes de pegase, pero tamién foi apaeciendo xente nuevo que-y dio diferentes tonos y estilos. Nel so llustru de funcionamientu plenu acoyó tou tipu d’eventos y colectivos, y ehí tuvi’l placer d’entamar cómodo y autoxestionao’l Sacavera Sound, festival d’orientación dispersa, que me regaló, y espero que non solo a mi, momentos perguapos. D’otru palu, la gala de circu petábalo tolos años y los ciclos de branu al atapecer na terracina yeren panchos anque poco concurríos. Y ye una pena, porque ehí estrenamos Alvarín y yo’l nuestru diálogu qu’en realidá ye monólogu y nun vieno nin Crom a venos. A mi obsesionábame la idea de facer un flayer cola programación mensual que recoyera tolos eventos, y a eso namás fui quien un par de veces na primavera de 2015. Quédome con ello, porque metanes tamién hai muncho de quemazu asambleariu, males crónicos, histories o bilordios qu’un cronista elegante ha dexar pal prau de la política privada, y yo echéme a descansar nel 2018 y de los últimos tiempos sé más bien poco.

Too ello asocedió nun espaciu paralelu al de la mayor parte de La Pola, y sobre manera al de la casa conceyu, pero al empar abiertu a la multitú de cierta Asturies alternativa, y yera un mundu que quedaba mui lloñe de la vista de la plaza de Les Campes pero que nos díes buenos yera más productivu y hasta lo pasabes bastante meyor. Siete bíblicos años de zona azul dan pa muncho, dan pa que los neños de cinco años nun recuerden un mundu anterior a la zona azul, pa que yo mesmu lu escaeza y tenga que llamar a Manolo y documentame pa comprender secuencia y distancia. El contraste dexa’l presente bastante triste; col llar perdemos una resquiebra de resistencia pela que s’alendaba, la okupa que nun yera okupa, el gaztetxe qu’Asturies nunca tuvo.

Actualidad

Dejar respuesta

Please enter your comment!
Please enter your name here