“Vox ye un xenerador de votos pa la izquierda”

Asturfalante, de tonu y maneres posaes, Adrián Pumares, diputáu de Foru Asturies na Xunta Xeneral, defínese como “centrista, lliberal y centráu n’Asturies”

Recomendados

Nicolás Bardio
Nicolás Bardio
Es politólogo, escritor y creador de juegos de rol.

Adrián Pumares (Llaviana, 1989) ye l’únicu diputáu que tien Foro Asturies na Xunta Xeneral. Munchos considérenlu’l “diputáu 27” o “diputáu clave” pa facer posible la reforma del Estatutu d’Autonomía d’Asturies y la oficialidá. Asturfalante, de tonu y maneres posaes, defínese como “centrista, lliberal y centráu n’Asturies” anque probablemente l’axetivu de demócrata seya’l que más lu califique: víctima de campañes de señalamientu de la estrema derecha, esprésase con un fondu respetu democráticu pa los adversarios políticos y diz que ta allegre de tar frente al odiu, la intolerancia y la homofobia. Entrevistámoslu nel so despachu de la Xunta Xeneral, llugar onde apara poco, pos ye un diputáu al que-y gusta pisar terrén.

Adrián Pumares, nel Parlamentu asturianu. Foto: Iván G. Fernández

Aceptáronse yá los 3/5 per parte de los otros grupos parlamentarios colos que tais negociando l’Estatutu… ¿Va haber oficialidá nesta llexislatura?

Tamos nun debate que yo creo que ye un debate de derechos pero mui polarizáu y que ta polarizando cada vez más a la sociedá asturiana y onde vemos qu’hai determinaos partíos que refuguen de plano entrar a falar d’estes cuestiones. Lo que buscábemos con esta llei de desendolcu de la oficialidá con 3/5 ye precisamente garantizar esti consensu, tanto nel Estatutu como na llei que desendolque la oficialidá. Punximos esa condición, pero punximos otres tamién. Nesti casu la comisión direutiva propunxo principalmente que la reforma fore más amplia. Y ehí tamos viendo dos posiciones: la de la derecha involucionista que refuga desendolcar l’Estáu de les autonomíes y que ta cómoda tando como tamos y otra posición que ye nun querer abrir reformes fondes. Nós pensábemos qu’hai qu’aprovechar esta oportunidá pa facer una reforma más amplia del Principáu d’Asturies. Creo que la reforma del Estatutu ye importante y necesaria. Nel conxuntu d’España ta falándose de la España multinivel y yo creo que llegar a esi procesu que va abrir el Gobiernu de Pedro Sánchez con un Estatutu de primera ye perimportante. Pero en nengún casu vamos aceptar que se refiera esi Estatutu namás a la oficialidá. Si lo que queremos ye construyir país y actuar con consensu hai qu’abrir les reformes. IU nun quier negociar fiscalidá pa facer la oficialidá pero da’l votu a unos presupuestos que lleven cuestiones fiscales que nun-yos gusten.

Entós si PSOE, Podemos Asturies y IU nun quieren dir más allá de lo que ye la oficialidá, ¿vamos quedar ensin lo uno y lo otro?

Equí munches veces plantégase’l debate dende dos perspeutives que son erronies: Per una parte derecha-izquierda (el plantegamientu históricu nun foi esi, pos les élites d’izquierdes tuvieron en contra hasta va poco) y per otra parte que too depende d’un diputáu. Nun depende d’un diputáu sinón d’un partíu políticu, y yo acato y respeto lo que me mande la comisión direutiva. Compétenos a toos poner lluces llargues y actuar con responsabilidá. Los partíos de derecha tán refugando de plano la reforma del Estatutu, nós pensamos qu’esto nun ye responsable, pero nun vamos dar un cheque en blancu. Pos yá vimos que munchos acuerdos col PSOE son un cheque en blancu, como pasó colos presupuestos, y acaben mal. Tamos dispuestos a falar d’esto, a abordar la oficialidá y a da-y el votu favorable a la reforma del Estatutu con oficialidá, pero creemos qu’hai qu’enanchar esti marcu y faen falta otres reformes.

¿Y la fiscalidá ye una llinia colorada?

La única llinia colorada ye la de los 3/5. Pero una cosa ye que nun seya una llinia colorada y otra cosa ye que se plantegue zarrar esi debate ensin siquiera debatilo.

Hai quien diz que la fiscalidá nun ye una cosa estatutaria, que nun ha llugar nun estatutu.

Pero nun pasa nada por negocialo en paralelo. Yo anuncié esto yá nel mes d’ochobre y tamos en xineru. Pasaron yá unos cuantos meses nos que nun s’abordó nin se fixo nada. Hebo unos presupuestos pel mediu que pudieron ser una oportunidá pa negociar; y al final fixéronse unos presupuestos que nun contenten a naide, porque IU diz que nun son unos presupuestos que-y gusten, que tán pactaos con Ciudadanos y nun se sienten cómodos… Pero al mesmu tiempu vemos que nun tienen problemes en da-y el votu favorable a esos presupuestos nos que nun se sienten cómodos y nun arrancaron gran cosa y que lleven cuestiones fiscales que nun-yos gusten. En presupuestos sí, pa facer la oficialidá non. Ehí refúguenlo de plano.

“El PP n’Asturies na mayoría de les ocasiones déxase llevar pol populismu y déxase arrastrar por Vox”

Si la derecha nun quier reformar l’Estatutu nin la oficialidá y IU nun quier tocar la fiscalidá, ¿qué va facer Foro?

Nós tenemos una comisión directiva esti miércoles pa tratar esti puntu. Propunximos una serie de midíes en fiscalidá y más asuntos que pueden ser discutibles, pero hai qu’entrar nello y falalo. Amás, hai otra cuestión: marcóse un calendariu con IU y Podemos Asturies, pero primero dilatóse porque Podemos nun tenía claros los 3/5 y agora ta tamién parao porque IU refuga la cuestión de la fiscalidá que plantegó Foro. Yo los plazos que se marcaron nun los faigo míos. Si la reforma del Estatutu vien cuando venga, nun tengo previsto dar carpetazu a la reforma. Yo nun me plantego qu’un Estatutu d’Autonomía que ta aprobáu pola Xunta Xeneral del Principáu d’Asturies depués seya refugáu nel Congresu de los Diputaos. Nun ye dalgo que me plantegue.

Sí paez ser qu’hai una mayoría de 3/5 pola oficialidá con Foro y los partíos d’izquierdes. ¿Nun cabría entós buscar una mayoría alternativa pa la fiscalidá? Una mayoría que quiciabes seya más fácil buscar fuera de la mayoría estatutaria.

Bono, yo punxi una serie de cuestiones sobre la mesa. Dende llueu’l PSOE tien que tar, ye necesariu p’articular esta mayoría y ellos dixeron que tolos alcuerdos qu’alcanzaren diben ser colos demás partíos d’izquierdes que tán a favor del Estatutu.

¿Cómo se siente ún depués de ser l’oxetivu de la campaña d’acosu de Vox?

Yo vivílo a lo primero con sorpresa, quiciabes por un poco d’inocencia. Ayeri falaba precisamente con una persona del to entornu en rellación colos tuits y les frases deleznables que fixo’l candidatu de Vox en Castiella y Llión; y dicía-y que nun entiendo cómo depués de ver eses frases siguiere ehí. Qu’a tolos partíos políticos se-yos puede meter dientro una persona que piense d’una manera y actúe d’otra, pero en descubriendo eso lo suyo ye qu’esa persona dexe de ser candidatu. El mio interllocutor lo que me dixo ye que nun entendía de qué “guindo” cayera porque esa persona representa perfeutamente lo que ye Vox. Quiciabes pequé d’inocencia nesi sentíu. Pero creo que tar en contra de los que prautiquen la intolerancia, l’odiu y la homofobia ye dalgo positivo. Depués de la sorpresa inicial (porque yo pensaba que les dos valles yeren fake)


Pumares, nes puertes de la Xunta Xeneral, esta mañana. Foto: Iván G. Fernández

Hai posiciones que son debatibles: podemos discutir d’oficialidá, d’impuestos… pero al final nel conxuntu d’España y nesta comunidá autónoma siempre hebo una serie de consensos. Que cuando se produció un asesinatu machista hebo una condena unánime, que cuando había una agresión homófoba había una condena unánime, el Día de la Muyer Trabayadora o’l Día de la Muyer siempre había una declaración institucional y desque ta Vox nos ayuntamientos y na Xunta eso rompió. Yo creo que cualquier persona demócrata tien que tenelo claro. Y dígolo como persona de centro-derecha y lliberal, yo nun tengo nada que ver con Vox más allá, quiciabes, de la política fiscal. Porque nun tien nada que ver el modelu d’Asturies que queremos construir. Queremos una Asturies onde quepa tol mundu y non una Asturies pequeñina. Nun tengo nada que ver con Vox y tar nesa diana alégrame: toi nel llugar nel que quiero tar.

El PP paez que munches veces déxase seducir por Vox o en delles ocasiones recoyeron los votos de Vox nes investidures, como pasó n’Andalucía y Madrid, y hai quien abrió la puerta a un Gobiernu de coalición PP-Vox. En nengún momentu nengún dirixente del PP descartó gobernar con Vox. ¿Complica esto un pactu col PP como’l que tenéis?

El PP n’Asturies na mayoría de les ocasiones déxase llevar pol populismu y déxase arrastrar por Vox. Eso paezme peligroso. En Castiella y Llión creyo que tolos demócrates habríemos refugar qu’una formación política tenga un candidatu como’l que tien Vox y podríemos plantegar que’l PP dixere claro que nun va pactar con Vox. Pero fadría falta tamién la otra pata, que ye’l PSOE, y que’l PSOE diga qu’en casu de que’l PP gane les eleiciones va da-y los votos al PP pa que nun dependa de Vox. Ye’l PSOE la otra parte de la ecuación. Tamién tengo claro qu’a quien beneficia Vox ye a la izquierda, porque ye un xenerador de votos pa la izquierda mui claru. Y resulta mui complicáu tar en gobiernos con Vox que, pa detrás, nun ye un sociu fiable, como vimos en Madrid, onde nun sofitó los presupuestos. No que me plantegabes del PP, creo que’l PP déxase arrastrar pol populismu de Vox en demasiaes ocasiones pensando que-y va dar réditu eleutoral y, por nun escabullir la pregunta, nun toca falar agora del alcuerdu de coalición, que pienso que ye positivu p’Asturies na midida en que s’escucha la voz d’Asturies nel Congresu de los Diputaos. Tamién cuando gobernó’l PP tuviéronse en cuenta les necesidaes d’Asturies nos presupuestos y cuido qu’eso ye relevante cuando otres comunidaes autónomes alcen la voz con muncha fuercia. Creo que ye importante que s’oya la voz d’Asturies con independencia.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí