“Sedría obsceno falar d’una baxada d’impuestos cuando tenemos dificultaes na atención primaria”

Víctor Suárez, responsable de política llingüística y autogobierno d´Izquierda Xunida, tresllada la negativa de la coalición a rebaxar sucesiones pa consiguir la oficialidá.

Recomendados

Nicolás Bardio
Nicolás Bardio
Es politólogo, escritor y creador de juegos de rol.

Víctor Suárez Piñero (Uviéu, 1988), ye’l responsable de política llingüística y autogobiernu d’Izquierda Xunida. Comprometíu personalmente col asturianu en milenta actividaes, ye traductor, escritor, collaborador de radio y ún de los promotores más destacaos de la Wikipedia n’asturianu. Ye tamién un home de partíu que mos tresllada firme la negativa d’IX a negociar cualquier tipu d’alcuerdu que contenga la pallabra “fiscal” pa consiguir la oficialidá.

¿En qué situación tán agora les negociaciones estatutaries coles otres trés fuercies que tán a favor de reformar l’Estatutu?

El resultáu de les negociaciones ta siendo públicu. Hasta agora, hai trés fuercies que tamos a favor de la oficialidá, sumamos 26 diputaos, y hai una fuercia que ye Foru Asturies que tien un diputáu y que ta poniendo condiciones previes pa negociar la reforma del Estatutu.

¿El fechu de que les negociaciones tean siendo públiques nun-y paez que ye un síntoma de que tán diendo mal?

Son públiques hasta ciertu puntu, nuna negociación siempre hai alcuentros más discretos, pero l’estáu de la mesma treslladóse con tresparencia: Foro plantegó una serie de condiciones previes, ente elles los trés quintos pa la Llei que desarrolle la oficialidá, ya IX acepta 9 de les 12: el 75%. Apellamos a la voluntá d’abordar les negociaciones dende la lóxica de les mesmes y non dende posiciones maximalistes, a centranos nos conteníos propios de la reforma y non en cuestiones ayenes a la mesma.

Falamos de qu’una de les condiciones pa reformar de Foru yera tocar el tema de la fiscalidá. Foru fixo una propuesta de baxar mediu puntu los 4 primeros tramos del IRPF. ¿Por qué nun hai una contrapropuesta d’IU a esta propuesta?  Por exemplu, aceptar la baxada de los dos primeros tramos.

Nós de mano nun aceptamos l’argumentu de la derecha de que ye bono baxar impuestos. Apostamos por una redistribución de la riqueza y por una progresividá del sistema fiscal.

Víctor Suárez. Semeya: Iván G. Fernández

¿Y por exemplu xustamente nesa llinia, una contrapropuesta que seya baxar los dos primeros tramos y xubir el quintu y sestu (a los que más ganen)?

La propuesta de baxar los cuatro primeros tramos supón baxar los impuestos al 60% de los contribuyentes. Y, amás, trataríase de baxar mediu puntu a cada tramu por igual, dalgo que va en contra de la progresividá y de lo qu’entendemos qu’habría ser un sistema fiscal xustu.

¿Nun sedría más lóxico facer una contrapropuesta faciendo un sistema más progresivu en cuenta de zarrase a falar d’ello?

Dende Izquierda Xunida, d’ente esi 75% d’alcuerdu que plantegamos a Foro, yá aceptamos afondar nuna de les propuestes en materia de fiscalidá, concretamente a la fiscalidá diferenciada pa la zona rural y a menores de 35 años, por exemplu. Dalgo que va en llinia d’un tipu de sistema fiscal européu. Pero, repito, nun vamos entrar nel discursu de que baxar impuestos ye bono. Nós en tou casu falaríemos d’una xuba d’impuestos a los tramos más altos porque los servicios públicos hai que pagalos y páguense con impuestos. Sedría obsceno falar agora d’una baxada d’impuestos cuando tenemos dificultaes na atención primaria.

¿Baxar los impuestos a una persona que cobre menos de 1.200 llimpios al mes, por casu, los tramos 1 y 2 nun sedría una política d’izquierdes?

Insisto. Tamos énte una cuestión política de fondu, hemos de respetar la metodoloxía y centranos yá nos conteníos de la reforma estatutaria. Nun tamos negociando una reforma del sistema fiscal, nin axendes polítiques particulares, trátase de reformar l’Estatutu d’Autonomía d’Asturies.

L’otru día nuna entrevista a esti mediu Adrián Pumares dixo qu’ellos nun asumíen los plazos del calendariu y que sobre manera más que nada porque él considera que pa él ye inconcebible que’l parllamentu español refugue una propuesta de reforma del estatutu que tenga los 3/5 del parllamentu asturianu.  ¿Tamos énte una situación de riesgu de que nun s’apruebe l’estatutu por falta de tiempu?

Dende’l principiu de les negociaciones, desque s’abrió’l procesu, lo que plantegamos foi que yera necesario qu’amás de fixar una serie de reuniones hubiere un calendariu tope. Una fecha na qu’acabáremos de falar de la reforma y la rexistráremos. Porque calculáremos que sinón nun daría tiempu a aprobala na Xunta y a que s’aprobare nel Congresu. Entendemos que si va más alló del 31 de xineru esta reforma nun llegaría a tiempu a les Cortes y, por tanto, podríemos tar énte una reforma fallida.

Entrúgo-y directamente sobre lo qu’Adrián Pumares considera inconcebible. ¿Cree qu’hai riesgu de que Les Cortes enmendaren o reformularen lo que s’aprobó n’Asturies al puntu de dexalo irreconocible?

Con una ultraderecha crecida como tamos viendo y un PP plegáu completamente al so discursu nun sedría tan inconcebible.

“Nun podemos siguir ensin reconocer los drechos que marcó la Constitución va cuarenta años”

Agora que fala usté de la ultraderecha. Consideraría que depués de la campaña que fixo la ultraderecha escontra la oficialidá y de señalamientu del propiu diputáu de Foro Asturies en dos tipos de valles distintes repartíes por tola xeografía… ¿El nun consiguir la oficialidá sedría un trunfu de la estrema derecha?

Sedría un trunfu de los intolerantes. Nun podemos siguir ensin reconocer los drechos que marcó la Constitución va cuarenta años. Tenemos la ilusionante oportunidá de facelo con un consensu mui considerable y nun podemos perder esta oportunidá histórica.

Esta semana salía un artículu de Rafael Palacios y Sofía Castañón na prensa nel que dexaben entrever qu’hai una bona sintonía ente IX y Podemos. ¿Tán coordinándose nestes negociaciones o cada organización va pela so cuenta?

Como sabe hebo un cambiu de direición en Podemos Asturies y no tocante a les negociaciones lo qu’hai agora mesmo ye un bloque d’izquierdes que tenemos una postura común no que fai a nun facer una reforma del sistema fiscal.

Víctor Suárez. Semeya: David Aguilar Sánchez

¿Amás de la oficialidá hai dalguna otra cosa enriba la mesa que se tea plantegando per parte de tolos grupos nes qu’heba alcuerdu?

Hasta agora, daes les condiciones previes d’una de les partes de la mesa negociadora, solo se trataron cuestiones ayenes a la reforma del estatutu sacante esti artículu 4. Esperamos que se reconduzan les negociaciones nos términos que deberíen de dase, que ye falar de les cuestiones propies del estatutu.

¿Cómo sedría l’Estatutu ideal d’IX si namás dependiere de vós? Dalguna de les propuestes que vusté fixo en prensa naquel artículu.

Desque s’abrió la reforma del estatutu IX plantegó que nun díbemos aceptar enguedeyos nin tampoco díbemos poner condiciones y que les nueses propuestes diben ser aquelles que sumaren los consensos necesarios pa que salga alantre. La única propuesta na qu’IX ye inamovible ye na oficialidá. El restu son totalmente negociables. Nun vamos poner condiciones pa l’aprobación del estatutu.

¿La nacionalidá histórica sedría un oxetivu d’IX?

La nacionalidá histórica vien tando nos programes d’IX y nel casu de qu’hubiere consensu coles demás partes, obviamente sí.

Hai una proposición mui concreta del artículu 4 de la FSA que cambiaría una serie de coses respeuto de lo que se faló nun principiu. ¿Qué-y paez la proposición de redaición d’artículu de la FSA?

Na llinia de lo que vengo esponiendo, IX nun va plantegar impedimentos a l’aprobación d’esi artículu 4 si llega’l casu. Pese a que podamos facer matizaciones a esa redaición, lo importante ye que s’apruebe’l derechu de los falantes d’asturianu y eonaviegu per aciu de la oficialidá y que seya la llei posterior la que desarrolle en qué se sustenta esi derechu.

Falen de los servicios sociales como razón pa negase a una xuba d’impuestos. ¿Cuálos son los servicios sociales que plantega IX? ¿Sedría posible una Renta Básica Universal Autonómica?

Nós venimos defendiendo midíes nesi sentíu que nun son exautamente una RBU pero sí que consiguimos y defendemos el salariu social. Tolo que seya avanzar nesi salariu social y neses midíes sedría bienvenío. Los impuestos paguen los servicios sociales que toos entendemos básicos como la educación, la sanidá, les ayudes escontra la probitú y la esclusión social y nun podemos poner na balanza’l negociar un sistema fiscal que ponga en peligru esi modelu social.

¿Cómo ta la situación ente IX y Podemos Asturies? ¿Vamos ver una coalición como yá la viemos a nivel del estáu o européu?

Recientemente tuvimos un conceyu cola coordinadora autonómica nueva, Sofía Castañón, y les rellaciones son bones. Ye pronto pa falar d’aliances electorales con cualquier organización política.

Actualidad

2 COMENTARIOS

  1. Las propuestas de Foro caducan antes que el Actimel. No tienen más recorrido que la aprobación del Estatuto y pueden ser luego inminentemente revertidas. Incluyo pudieran ser vuestra campaña electoral. Si andáis buscando como sacarle las mayucas del fuéu a Barbón “demostrándovos inflexibles ante les medides neoliberales” entos decidelo a les clares. La Reforma tien que salir agora sí o sí, sin entar pensando en relatillos de mercadillos.

  2. Hai que apuntar al máximu techu competencial. Nun entiendo por qué nun s’acaba d’incluyir nel Estatutu d’Autonomía la competencia en Prisiones como yá ficieron exitosamente Cataluña y Euskadi, y como tamién recueyen los estatutos d’Andalucía y Navarra. Y con ello, la craeción de la figura a nivel autonómicu del Curiador del Pueblu, que tantes CCAA tienen yá funcionando nel so territoriu.

DEJA UNA RESPUESTA

Por favor ingrese su comentario!
Por favor ingrese su nombre aquí