Izquierda Asturiana, que foi en coalición con Izquierda Xunida nes últimes eleiciones autonómiques y municipales d’Asturies acaba de facer pública la so postura en rellación a les negociaciones del estatutu d’autonomía d’Asturies pa consiguir la oficialidá. IAS sostién que “ye intolerable que se pierda la meyor oportunidá histórica” p’aprobar la oficialidá y fai un llamamientu a toos a consiguir un alcuerdu. IAS reconoz que les demandes fiscales de Foro son un elementu ideolóxicu y simbólicu “non solo pa la derecha asturiana, sinon pa les fuerces d’esquierda qu’históricamente punxeron el focu na capacidá impositiva como ferramienta de distribución social y garantía pal caltenimientu de la rede de servicios públicos”.
Pocu impautu económicu nes cuentes del impuestu de Foro
Fala tamién el partíu d’izquierdes de FSA, Podemos y IX “son sabedores del calter más simbólicu que real de la repercusión que tendría una rebaxa nes cargues recaudatories derivaes del Impuestu de Sucesiones” que califica en términos de liquidez real de “chocolate del loro”. Los asturianistes d’izquierdes solliñen que “La intransixencia amosada por Foro contrasta cola honestidá cola que reconocen que necesiten una «victoria simbólica» como esta que-yos dea aire de cara a un futuru viable como alternativa política”.
Tamién fala del pocu impautu real que tendría la reforma que pide Foro pos IAS considera que “Les diferencies na carga impositiva ente comunidaes tán pendientes d’una harmonización fiscal que va ser pautada dende les los poderes del Estáu”, a xuiciu de los asturianistes d’izquierdes, el resultáu diba ser que la efectividá real de la reforma que propón Foro tien “una llende temporal mui curtia” colo que’l gastu o déficit que pue suponer “ye tovía más reducíu”.
D’esta posición política d’IAS, facíase ecu una campaña en redes na que’l partíu llanza la pregunta: “¿Por nun-y dar una victoria táctica a Foro vamos da-y una estratéxica a Vox?” que resume bien la so posición y dexa bien claro qu’amás de los derechos, al sistema políticu asturianu interésa-y un Foro fuerte en cuenta d’un Vox fuerte.
