Tengo qu’empezar diciendo que la inspiración pa escribir esti artículu débo-yla al periodista Xuan Cándano, que nuna d’eses píldores certeres que suel soltar na so cuenta de Twitter escribió ayeri esto: “Agora que va colar de la Xunta Xeneral Ignacio Blanco y qu’a Vox fálta-y un candidatu p’Asturies, Santiago Abascal debería pensar nel arzobispu Sanz Montes como sustitutu”. Soscribo la propuesta de Xuan, nun se m’ocurre un candidatu más afayadizu pa defender nes urnes los postulaos del partíu d’estrema derecha.
Pero vamos por partes… Lo primero ye agradece-y a Ignacio Blanco Urizar (el so segundu apellíu ye euskaldún, qué perceguera pa un españolista ultra) les rises qu’echamos viéndolu soltar patoxaes, una tres otra, dende la tribuna d’oradores del Parlamentu asturianu esta llexislatura. Nun tener mieu a facer el ridículu y mentir con descaru son dos de les señes d’identidá de la ultraderecha, equí y en cualesquier llugar del mundu onde la so presencia contamina la vida parllamentaria. Blanco yera nuevo nesto, pero yá llevaba tiempu faciendo’l calentamientu como secretariu del Club de los Vienres, una reciella d’imitadores tresnochos y d’almiradores malfollaos d’aquel facheríu estáunidense representáu pol Tea Party, que quedó pa prau cola llegada de Donald Trump, más bestia, más xabaz y más babayu que toos ellos xuntos.
Ignacio Blanco Urizar (cítolu colos dos apellíos, pa que-y joda la so ascendencia vasca y euskaldún) dio’l saltu a la política partidista con Vox, que se presentó a les elecciones a la Xunta Xeneral en 2019 a pesar de que’l partíu franquista nun reconoz la “España de les autonomíes”. Pa chupar del tetu sí que la reconocen: Blanco y la so correlixonaria Sara Álvarez Rouco lleven tres años y mediu cobrando relixosamente (nunca meyor dicho nel casu de persones nacionalcatóliques como elles) d’un Parlamentu, l’asturianu, que si dependiera d’ellos nun diba esistir, diba tar prohibíu.
Ignacio Blanco, como digo, déxonos momentos y semeyes mui simpátiques nestos tres años y mediu. Una d’elles foi aquella imaxe grotesca, y la llectura grosera que quiso facer d’ella, cola montera picona, que ye un símbolu d’Asturies muncho más dignu, respetable y decente que tolo que pueda representar esa España aponzoñada de Vox y de Blanco. Sicasí, yo quédome cola cara de neñu piju reviciáu que punxo’l diputáu ultra’l día que lu obligó a abandonar l’hemiciclu del Parlamentu asturianu una diputada feminista y d’izquierdes. Nuria Rodríguez, de Podemos Asturies, yá denunciara el “humor cuñadista” de Blanco por ún de los sos comentarios machistes; ya achantara al voceru de Vox cuando ella se negó a repetir en castellanu una intervención que ficiera n’asturianu. Nuria llogró que marcharan, él y Sara Álvarez Rouco, dos veces de la sede parllamentaria: una porque se negó a traducir el so discursu al castellanu y otra porque los llamó fascistes, y la diputada negóse a retirar siquiera una coma del so discursu.
Ignacio Blanco foi’l responsable de la llamentable campaña de valles publicitaries contrataes por Vox nes qu’insultaben a Adrián Pumares, diputáu de Foro, pol so apoyu a la oficialidá (dempués vimos que Pumares y Foro nun teníen intención d’apoyar la oficialidá, burlláronse de toes y de tolos falantes d’esta llingua). A Blanco dio-y tamién por toca-y los güevos al alcalde de Bimenes, l’asturianista Aitor García, pola desapaición d’una bandera española, pero Aitor yá tien los güevos afumaos pol fumu de milenta batalles y nun s’echó atrás, llevólu a xuiciu por inxuries.
Blanco anunció que dexa los sos cargos de voceru parllamentariu y de presidente de Vox n’Asturies. Fai mutis pel foru con un descomanáu escándalu financieru pisándo-y los calcaños, como informó Nortes, pero él tovía tien la desvergüenza de retrucar que “nel mio trabayu como alministrador concursal salvé más emplegos que Barbón”. Al marxe de la so ideoloxía, que ye infumable pa cualesquier persona con dos deos de frente y con un mínimu de decencia, Blanco foi amás un políticu mediocre. En Vox siguen “prietas las filas, recias, marciales”, como dicía la lletra del Frente de Juventudes falanxista, y quizás habríen d’apostar como relevu por un personaxe de más sonadía y con más predicamentu. Naide meyor pa esa xera que monseñor Jesús Sanz Montes, arzobispu de la diócesis d’Uviéu, comisariu pontificiu de Lumen Dei y bocachancla, ente otres coses.
El preláu, al que-y pica’l niqui (meyor dicho, l’alzacuellos) cada vez que-y ponen un micrófonu delantre, echó a pacer la llingua otra vuelta estos díes. ¿Qué tocaba nesta ocasión? Nesta ocasión quiciás tocaba facer un llamáu a la paz, al amor y a toos sentimientos que suel comercializar el catolicismu en feches como estes, pero l’arzobispu quixo más espotricar contra’l Gobiernu socialcomunista. “Esto empieza a paecer una dictadura”, diz él, que nunca condenó la dictadura franquista. De la pedofilia yá dixo que nun ye un delitu clerical, qu’afecta a tola sociedá; ye dicir, la Ilesia católica, de la qu’él ye representante, nun tien que pidir perdón (a fin de cuentes, el perdón ye un sentimientu cristianu y el cristianismu yá ta pasáu de moda mesmamente pa los cristianos).
Monseñor Sanz Montes refuga la memoria democrática; va poco prohibió un discretu homenaxe a un republicanu enterráu nun cementeriu parroquial asturianu. Monseñor Sanz Montes nun cree nos derechos del colectivu LGTBI; echa pestes contra los que, según él, atenten contra’l modelu de familia tradicional. Monseñor Sanz Montes ye un facha de la cabeza a los pies. Monseñor Sanz Montes habría de dar un pasu alantre y presentase como lo que ye: un bon candidatu pa la estrema derecha que tien señaldá d’esa España .
