Rodrigo Cuevas y l’Asturies con Remangu

Lo que necesita Asturies ye autoestima colectiva, enterrar complexos y garrar d'una vez el timón del so propiu futuru.

Recomendados

Xuan Cándano
Xuan Cándano
San Esteban de Bocamar (1959). Periodista. Redactor en RTVE-Asturias. Fundador y exdirector de Atlántica XXII. Es autor de "El Pacto de Santoña" (Madrid, 2006)

“Yo pensaba que esta España no existía”, dicía-y Évole a Rodrigo Cuevas nel programa que’l catalán-y dedicó al asturianu, na terrazuca de Casa Maribel, en Piloña, mientres nel chigre taben de folixa cantando, bailando y bebiendo sidra. Nun sabía’l comunicador catalán qu’existía esi mundu creativu y modernu de xente mozo que nun dexó los pueblos o volvió a vivir nellos. Tampoco munchos asturianos, mesmamente esa clase media aspiracional que vive nes ciudaes o nes villes y que quier escaecer la cultura y los modos de vida de los pas o de los güelos, porque n’Asturies cuasi toos venimos del verde, más que del urbanu asfaltu.

Esa que descubrió Évole, de la que Rodrigo Cuevas ye’l meyor embaxador, ye una Asturies moza y dinámica que rescata o inventa sectores productivos y ta enfotada na cultura tradicional pa da-y una vuelta y adaptala a la modernidá, como se fizo cola gaita, que yá nun ye un instrumentu de vieyos acompañaos al tambor; o cola sidra, cada vez meyor y con más palos pa ufierta-y al cliente.

Jordi Évole y Rodrigo Cuevas.

Ye una Asturies viva, pero invisible pa los poderes, pa les alministraciones y pa bona parte de los asturianos. Como la llingua asturiana na que falen Rodrigo y los sos collacios. “Canto nuna llingua que nun existe”, dicía Chus Pedro nos conciertos de la despidida de Nuberu. Dizlo Milio Rodríguez Cueto nel final de los sos artículos.

“Ye una Asturies viva, pero invisible pa los poderes, pa les alministraciones y pa bona parte de los asturianos”

Ye esta otra Asturies moza que contrasta cola de “las leyendas urbanas” de Tini Areces. Son xente d´eses mesmes xeneraciones mui bien formaes, les más preparaes de la historia d’Asturies, pero los que se negaron a salir de la so tierra y se busquen la vida nella. Y fáenlo emprendiendo y creando empreses, nes zones urbanes y nes rurales, onde la so presencia nótase más nun mundu en peligru de supervivencia, como la llingua, pola caída demográfica. En NORTES, tamién a costa del programa de Évole, Diego Díaz citaba delles d’eses iniciatives. L’Apiaderu d’El Remediu (Nava), un centru cultural alternativu. El Tenderete, un mercáu llocal en Cabranes, onde los neorrulares asitiaos nel conceyu frenaron la caída demográfica y evitaron el pieslle de la escuela. Ye’l mesmo conceyu nel que María Arce fai un fanzín con un nome que da pistes del conteníu: La Nueva Paisana. Casa Narciso en Teberga, l’últimu templu de la modernidá qu’abrió’l gran Jose Lata nun chigre guapísimu del sieglu XIX. La Xata la Rifa, el personaxe al que y-da vida Mónica Cofiño colos sos espectáculos itinerantes. Mediu Güeyu, un festival que lleva música y cine a Llugás (Villaviciosa). Bocanegra, l’asociación cultural que monta unos conciertos ablucantes en Valles (Piloña). Y hai bastantes más bendites llocures d’esa mena na zona rural asturiana.

María Arce, con el tercer número de ‘La Nueva Paisana’, en Villanueva de Cabranes. FOTO: Luis Sevilla

El llibru qu’espublicé va poco con Hoja de Lata, una d’eses empreses d’emprendedores mozos ya ilustraos, titúlase No hay país, títulu afitáu na debilidá de la sociedá civil asturiana y la falta d’un proyectu colectivu n’Asturies. Pero pol alderique públicu que ta provocando, que se ve nes presentaciones, ta visto que nun hai país, pero sí ganes de facelu. En dalgunes d’elles hai muncha presencia d’esta xente mozo que, fartuco del discursu oficial de crisis y decadencia que ya lo tien aburrío, ta faciendo país con pequeñes iniciatives, pasando de subvenciones y de llamentaciones. Son xeneraciones nueves que yá pasaron páxina. Nun tienen señaldá pola Asturies que medró cola minería y el sector públicu, de munchu fumu y grandes factoríes industriales, que nun van volver. Viven n’otra distinta, con una economía moderna onde’l sector priváu sustituyó a la vieya Inilandia y el poder sindical, que mandaba sobre’l políticu, tamién pasó a la historia. Y nunca dicen “ye lo que hai”, esa frase que resume en tres pallabres la desidia, la resignación y la pereza intelectual, que tantos males provoquen n’Asturies, porque xustifiquen l’inmovilismu. Son xente gayolero y optimista que tira de “puru remangu”, que ye como se llama la empresa d’Enar Areces y Xicu Ariza asitiada en Xixón, que fai unes orixinales camisetes coles que muestren con arguyu y faen bien visible esi espíritu y esi soplu d’aire fresco. Son l’Asturies con remangu.

Xicu Ariza y Enar Areces. Foto: David Aguilar Sánchez

Son xente que nació cola autonomía asturiana, o más tarde na mayoría de los casos, y que descubre d’ónde vien, davezu con rabia, lleendo “No hay país”, porque naide nun-yos lo esplicó nes aules, que siguen trancaes a la historia d’Asturies. Nel llibru cuento cómo Asturies foi la primera comunidá que accedió a l’autonomía pela vía lenta, con un estatutu probe y condicionáu pola intervención de Madrid y la resaca del 23-F, que traxo un recorte nel desendolque autonómicu. Les costures d’esi traxe autonómicu col que se vistió Asturies en 1981, estrenchu y apertáu, frayaron cuantayá y l’estatutu quedó pequeñu y asfixante cuatro décades dempués. La sociedá camudó dafechu y agora somos los asturianos los que tenemos decidir el nuesu destín, porque yá nun somos una comunidá subsidiada y dependiente que tolo tenga qu’esperar del Estáu o de la Unión Europea. El fracasu de la reforma del estatutu, que debería dir muncho más allá de la cooficialidá, foi una gran victoria de la estrema derecha y d’esta Asturies inmovilista y vieya llantada nel pasáu.

Fiesta de La Cara B en Casa Narciso. Foto: Fotográfica Oviedo.

Asturies nun puede siguir mirando a Madrid o a Bruseles, esperándolo too de más allá del Payares o del otru llau de la mar, como nel canciu de Llan de Cubel. Nin de les obres públiques, esa obsesión decimonónica que vien de un aislamientu que yá nun existe. Nin de les inversiones foriates, por mui bienveníes que seyan, que tienen una importancia que naide dulda, porque Arcelor sigue siendo’l corazón industrial d’Asturies. Necesita músculu propio, un texíu industrial de pequeñes y medianes empreses como’l que tien el País Vascu, que ye’l so referente socioeconómicu na Cornisa Cantábrica por razones históriques.

Asturies diluyóse n‘España cola democracia y col estáu de les autonomíes, renunciando a la so personalidá y a les sos capacidaes. Y con ello perdió Asturies, que refugó munches de les sos fortaleces y afogó munches de les sos enerxíes; y tamién España, que yá nun aprovecha lo que foi un motor de desarrollu y riqueza. Nun se trata d’ufiertar la receta del nacionalismu nin hai n’Asturies amenaza secesionista, porque nun sostién, ni lu fairá nunca, un conflictu col Estáu. Lo que necesita Asturies ye autoestima colectiva, enterrar complexos y garrar d’una vez el timón del so propiu futuru. Fálta-y remangu, como’l d’esa xente mozo qu’Évole nun sabía qu’existía. Que ye inda invisible, tamién pa munchos asturianos, como esos pueblos nos que viven, tapecíos ente valles y montañes cuando los cubre la nublina. Y que rescamplen, guapos, lluminosos y vivos, cuando sal el sol y vuelve a apaecer el paraísu.     

Actualidad