Acordies cola agrupación uvieína del partíu asturianista Aína, «l’ociu y los espacios de cultura na ciudá nun tán al altor pa dar un serviciu mínimu a la so población nin permiten qu’Uviéu ufra oportunidaes atractives d’espardimientu».
Nun día simbólicu como’l martes de campu, que venceya Uviéu cola so historia medieval, Aína espubliza un comunicáu nel que fai por señalar dalgunos de los que consideren los problemes principales del proyectu cultural y de xestión del consistoriu uvieín: «edificios abandonaos, marafundios nos que s’enterraron millones d’euros a coste públicu y que nun funcionen, solares, cases vacíes, nula posibilidá de desendolcar proyeutos culturales y d’ociu a los que sí acceden otros conceyos y pa toles edaes…».
El partíu asturianista, que celebró hai dellos díes el so primer mitin, refuga tamién les respuestes que da’l gobiernu del conceyu d’Uviéu a les quexes de los vecinos: «por cada denuncia vecinal», afirma, l’ayuntamientu respuende con «fumo consistorial».
Ente los grandes fracasos de la xestión del gobiernu que lidera Alfredo Canteli taríen dalgunos como la especulación cola Fábrica de Gas, «una de les ayalgues patrimoniales d’Uviéu» o los terrenos del vieyu institutu de San Llázaro; el proyectu yá valtáu de derribu de l‘edificiu de la Malatería; l’ausencia d’espacios culturales en La Florida – Les Campes y La Corredoria, «los dos barrios con más crecimientu y mayor concentración de xente mozo d’Uviéu» y, por supuestu, la falta de protección del granible patrimoniu industrial que constitúi la Fábrica de la Vega.
La esixencia que fai Aína, que puede consultase completa nel comunicáu de la so web, ye que se faga’l conceyu «más vivible», asina como «que s’abra a nueves espresiones culturales y d’ociu interxeneracional, onde la mocedá pueda realizase y onde lo público xuegue a favor de la calidá de vida de les que vivimos y trabayamos equí».
