El partíu asturianista Aína, que na reciente Asamblea Nacional Estraordinaria decidió nun presentase a estes elecciones xenerales, ta acabante d’espublizar un documentu colos 10 compromisos que-yos esixen a los políticos y polítiques que salgan escoyíos de les elecciones d’esti domingu.
Esti decálogu, que xurde de la mesma Asamblea Nacional na que’l partíu decidió nun presentase, ta empobinada a defender «los intereses d’Asturies y del pueblu asturianu perriba de los del propiu partíu», como se formula nel puntu 1.
Los diez compromisos qu’Aína plantega a les formaciones polítiques asturianes que tengan representación nel Congresu de magar el 23 de xunetu tan «rellacionaos con estremaes competencies del Estáu». Esti decálogu, asina, tien una formulación concreta: esíxese a los diputaos que defendan mídies como «l’aumentu d’inversiones n’Asturies, el fin del peaxe del Güerna, la meyora del tresporte de cercaníes, la llucha escontra les violencies machistes o l’apuesta pola salú mental».
Aína considera qu’estos compromisos constituyen los «pegoyos básicos pa la defensa d’Asturies nel Congresu y nel Senáu» y, poro, unviáronlos a tolos partíos democráticos que se presenten a los comicios.
