Si dalgo nun se-yos puede negar a los cuatro socios de la nueva llibrería Matadero Uno, na Plaza de Riego, ye’l so amor pola lliteratura. Esto —que nun ye tan frecuente como pudiere paecer nes lletres asturianes— rescampla nel casu de Jorge Salvador Galindo (escritor y editor de Pez de Plata), Natalia González Menéndez (llibrera y gaitera), Leticia Sánchez Ruiz (novelista y profesora de talleres d’escritura) y Luciano Hevia Noriega (llibreru especializáu n’ensayu). Y ello ye que ye necesario pa emprender un proyectu ambiciosu y tresformador como’l que quier ser Matadero Uno.
Esti espaciu aspira a continuar una tradición llibresca que vien yá dende’l sieglu XIX: como señala Natalia González Menéndez «en 1856 abrió les puertes la Librería Martínez, que naciendo na cai Cimadevilla pronto se treslladó a la Plaza de Riego», y que foi un proyectu clave pa l’actividá lliteraria de la dómina: «Clarín confiaba en Juan Martínez pa facer llegar les sos publicaciones periódiques a Madrid y el llibreru del Antiguu anticipába-y los cobros». Depués vieno’l cambiu: la descendencia de Martínez continuó cola llibrería hasta que nos años 30 «la familia Ojanguren se fai con ella, cambiándo-y tamién el nome. En 1956, cumpliendo la llibrería cien años, Julio Rojo queda al mandu del negociu familiar, que capitaneará hasta’l momentu de su muerte. Distintos llocales, distintes ubicaciones, decenes de llibreros».
Los cuatro socios de Matadero Uno pretenden agora que los llibros nun marchen d’un llocal con tanta historia como’l de la plaza de Riego, y qu’ufre amás bien de posibilidaes: Matadero Uno va cuntar con 300 metros cuadraos nos que va haber espaciu pa la venta de llibros, pero tamién pal almacenaxe y pa los eventos lliterarios. Según rellaten a NORTES, la quieren que la llibrería sía «un llugar d’alcuentru y cellebración, acercar a los llectores a los llibros que necesitaben y inda nun lo sabíen, convertir Uviéu nuna ciudá si cabe más lliteraria».
Pero, arriendes d’ello, los fundadores d’esta llibrería tienen intención d’aportar coses nueves al ecosistema cultural de la ciudá: anque, evidentemente, quieren sumase al «al texíu cultural y llibreru yá esistente, formando sinerxes, complementando y xuniéndonos coles demás llibreríes d’Uviéu y d’Asturies» porque vienen «a sumar», la so propuesta tien novedaes de munchu valir. Asina, «Matadero Uno va apostar pol fondu, la lliteratura de calidá y les editoriales independientes. Destinaremos un espaciu con bastante capacidá d’asistentes pa realizar presentaciones, alcuentros, cineclubs, cursos, clubes de llectura y munches otres sorpreses».
Ente estes novedaes ta, amás del enfotu nes editoriales y nos proyectos independientes, el procuru pa cola lliteratura en llingua asturiana. Nun país nel que la lliteratura asturiana ocupa munches veces un requexu folclóricu —salvando escepciones como la propia llibrería Trabe (Uviéu), Paradiso (Xixón) o La Llocura (Mieres)—, Matadero Uno parte d’un procesu de reflexón al respecto: «decidimos apostar pola integración de la lliteratura n’asturianu cola lliteratura en castellán. Creemos que ye un pasu hacia la normalización, un tratamientu que vemos en munchos otros llugares nos que conviven distintes llingües, y que n’Asturies tovía nun se probó. Tenemos llibros n’asturianu de munchísima calidá que pensamos que pueden llegar a más xente sacándolos de la estantería del “guetu” y integrándolos na temática en cuestión».
La llibrería, que va abrir les sos puertes na seronda, garra’l nome de la novela Mataderu 5, del escritor americanu Kurt Vonnegut, no que ye un xestu enllenu de significáu: acordies con Luciano, Natalia, Leticia y Jorge, la de Vonnegut «ye una novela orixinal, rompedora, que xune coses tan aparentemente dispares como la más lloca fantasía cola más pura realidá, amás de ser divertía y conmovedora. Y así queremos que seya la nuestra llibrería».
