Va pocos domingos, nuna d’eses visites tan avezaes a los estadios de fútbol d’Asturies, viví una d’eses anéudotes que paga la pena cuntar. Toes y toos sabemos que, por desgracia, son munches les persones que se tresformen cuando ven volar un balón, evolucionando dende la tranquilidá hasta l’enfadu más absolutu, acompañáu davezu d’unos cuantos insultos. Habríemos reflexonar sobre estos fechos tan habituales, pero nun ye esi l’oxetivu del artículo qu’escribo. Aquella mañana, en cuenta d’insultar al llinia, un aficionáu dedicó-y un axetivu más suavín. Poco conforme con esi árbitru que nun llevantaba la bandera, el rapaz provocó les rises de bona parte del públicu col so comentariu. ¡Irrelevante! Eso-y gritó. Según esti aficionáu, el llinia nun merecía otru calificativu teniendo en cuenta lo poco que taba participando nel partíu.
Estos díes anuncióse qué persones diben formar parte del Conseyu de Ministros (y Ministres) pa esta llexislatura qu’entra. Podríen facese munchos comentarios sobre quién ta nesti Gobiernu y qué razones esisten pa les incorporaciones y los ceses, pero hai dalgo que me llama más l’atención y que nun ta rellacionao colos nomes, sinón col orixe. Ente les 22 persones -amás del Presidente- que van tar nel Gobiernu del Estáu, nun hai nengún asturianu o asturiana.
El problema nun ta na falta de persones asturianes nel Gobiernu
Esti fechu, en principiu, podía nun tener mayor importancia, podía quedar nun apunte al final d’una páxina de periódicu. Nun va tanto que tuvimos una asturiana col cargu de Ministra como María Luisa Carcedo. Hasta cuntemos con un Vicepresidente como Francisco Álvarez Cascos presumiendo d’oríxenes asturianos nos sos años nel Congresu los Diputaos.
El problema nun ta na falta de persones asturianes nel Gobiernu. Cascos, por casu, nun miraba pola nuestra tierra anque fuere asturianu; con atender pa los sos intereses tenía bastante. Non, la cuestión nun son los nomes, ye’l significáu d’esos nomes. Paez imposible imaxinar un Gobiernu del Estáu ensin persones de Cataluña, Madrid o Andalucía. Dalgunos por razones polítiques, otros pol pesu de la población: hai una retafila de territorios que siempre van tener representación nes instituciones más importantes del Estáu.
L’ausencia d’Asturies nel Conseyu de Ministros (y Ministres) tien dos significaos bien claros y rellacionaos colo anterior: el númberu d’asturianos y asturianes nun ye mui grande –dalgo que yá sabíemos- y la nuestra relevancia política ye mínima, cuasi ridícula.
Mientres tanto, les voces que salen dende Asturies nun griten pa reivindicar la nuestra esistencia. El Gobiernu, con Adrián Barbón como cabezaleru, fala muncho y actúa más bien poco: el so deber paez defender lo que decida Pedro Sánchez, ensin importar si se va sentir a Asturies o si nun nos van tener en cuenta. Nel otru llau, anque bien cerca, el Presidente nuevu del PP d’Asturies, Álvaro Queipo, paez que quier sacar la nuestra bandera y enarboliala como diba tiempu que’l so partíu nun facía. Eso sí, namás que pa criticar l’amnistía. Paez que nun saben defender Asturies si nun ye mirando pa otros llugares.
Nin Gobiernu nin oposición falen d’Asturies, quieren más echar el tiempu discutiendo d’una llei competencia del Congresu. Lo que nos afeuta, la perda de población, la falta d’oportunidaes pa la mocedá, les infraestructures deficientes; nada d’eso tien espaciu nos sos discursos, completos yá con asuntos políticos de Madrid o Cataluña.
Dalguién pue lleer estes llinies y pensar que nun tienen sentíu. Falo de la irrelevancia d’Asturies pola nuestra ausencia del Conseyu de Ministros (y Ministres) cuando’l País Vascu tampoco nun va tener representación nesi muérganu. La diferencia, que nun ye pequeña, vémosla en que los vascos y vasques yá cunten con ferramientes polítiques que defenden los sos intereses. Quiciás ye eso lo que necesitamos, una ferramienta pa llevantar la voz y apostar pola nuestra tierra y la nuestra xente. Ensin Ministerios, pero con poder y presencia, con categoría, con relevancia. Nun puedo acabar ensin volver a les primeres pallabres y al fútbol. Hai esperanza. Hasta que nun suena’l xiblatu, el partíu nun termina. Vienme a la mente esi cantar tantes veces repetíu: otra vez en Primera quiero vete xugar.
