Facéi casu: afinái la oreya al pasar per ellí. Inda resuena, na plaza la catedral d’Uviéu, l’ecu d’una de les mayores movilizaciones pola oficialidá del asturianu de la historia. La llexislatura pasada abrió y peslló, en falso, una reforma estatutaria que descarriló hai bien poco, tres d’un ciclu de movilización históricu nel que les cais d’Asturies vieron un emburrión social que, paecía, diba ser el postreru p’algamar esi estatus d’oficialidá que permitiere defender el patrimoniu llingüísticu del país y abrir esta tierra a una nueva cultura política. Superábase, paecía, por fin, una etapa nel procesu d’avance social que fexo camudar les postures de la mayoría de los partíos del sistema políticu asturianu hacia la realidá llingüística asturiana… pero nun foi abondo.
En xineru de 2022, el bloquéu que se xenerare al introducir Foro nel discutiniu, de manera fuina, la cuestión fiscal pa dexar avanzar el camín hacia la oficialidá facía que’l procesu s’empantanare. Dempués de llegar a esti puntu, una ufierta de Podemos nesi sen desbloquiaba la situación pa Foro y FSA siendo, a la fin, Izquierda Unida quien se negare a aldericar sobre una propuesta que’l restu de grupos taba d’alcuerdu con tratar: una idea que taba centrada na reforma de dellos tramos del IRPF, de les donaciones y de l’adquisición de vivienda. Llevantada de la mesa la coalición, entós, fracasaba l’intentu caberu y los 3/5 necesarios pa desendolcar esti estatutu nuevu desaniciábense de cualquier horizonte. Quedaben per delantre unes nueves eleiciones nes qu’IU aseguraba que se diba poder lluchar por una xeometría parllamentaria que permitiere tornar a negociar esta cuestión pero, como taba claro pol contestu asturianu y estatal, nun foi asina: de 26 diputaos progresistes + 1 de Foro necesarios pa la reforma pasamos a los 23 + 1, polo que los cambios nel estatutu asturianu dependeríen, en tou casu, d’un Partíu Popular que sigue a la griesca pol espaciu políticu perdíu con VOX.
A lo llargo de tola campaña eleutoral, Convocatoria por Asturies, la nueva estratexa eleutoral d’Izquierda Unida xunto a Más País y a Izquierda Asturiana, fexo declaraciones nesti mesmu mediu, per boca del Coordinador de la primera de les formaciones, afalando’l proceder de la coalición naquella negociación: “Izquierda Unida dijo ‘hasta aquí hemos llegado’: no podemos seguir hablando de fiscalidad a cambio de un derecho como es la oficialidad”. Paecía que s’abría, d’ehí p’alantre, una dómina nueva de coherencia política d’esi espaciu eleutoralista nel que les concesiones p’algamar determinaes polítiques yá nun suplíen el desdibuxamientu de les llinies coloraes plantegaes. Esto ye, por exemplu: la idea de que la fiscalidá nun se toca.
Al traviés de los medios de comunicación y del conseyeru de Facienda, Guillermo Peláez, conocemos una propuesta asumida poles formaciones que roblen el gobiernu de PSOE-Convocatoria por Asturies y que, baxo’l títulu de “deducciones fiscales” fai anuncia d’una perda de 57 millones d’€ pa les arques públiques, axustando IRPF, Socesiones y Donaciones y Tresmisiones Patrimoniales y Actos Xurídicos. Con ello, xenérense una serie de bonificaciones cásique clóniques a les que se punxeren enriba la mesa hai dellos meses pa desbloquiar la reforma estatutaria, no tocante a la compra de vivienda nes zones rurales, nel arrendamientu a xente mozo, nes donaciones hasta los 150.000€ coles que, en fin, apelando a la progresividá na tresferencia de dineru contante y sonante, Asturies va xenerar una recaldación menor. Recordemos, en contraste, qu’acordies colos propios cálculos d’IU, el costu de la propuesta de desbloquéu estatutariu yera de 30 millones d’€, ensin tocar l’impuestu de socesiones, probablemente l’impuestu más xustu de tolos que se m’ocurren. Nesta ocasión falamos d’una perda esperada de 57 millones.
Resumiendo y centrando l’alderique en términos políticos y económicos: una propuesta que provocó, hai bien poco, qu’Izquierda Unida fuere fondamente coherente colos sos posicionamientos políticos y se llevantare d’una mesa de negociación estatutaria ye, unos meses dempués, asumida ensin mermurar nuna formulación homologable cuando Izquierda Unida cogobierna’l país col PSOE y asume una macroconseyería d’Ordenación de Territoriu, Urbanismu, Vivienda y Derechos Ciudadanos, con un amenorgamientu inda mayor de la recaldación fiscal que se xenera n’Asturies y que, como toes sabemos, sostién les polítiques públiques del país.
¿Cómo podríemos calificar esti proceder, arriendes de les declaraciones del conseyeru Zapico enantes de selo? Vamos ver, si queremos enfocalo de manera bien intencionada, podíemos llamalo “gran torpeza política”: tragar con una midida non deseada ensin réditu políticu dalu, cuando se pudo tener esa ganancia social a la d’asumila hai menos de dos años. D’otra banda, si facemos otru análisis, “un gran engañu”: nega-y la oportunidá de sobrevivencia a un idioma y el desendolcu económicu que vien arriendes d’ello nuna reforma estatutaria cuando se ta fuera del sillón con una midida política que, llueu, sí s’asume cuando se ta sentáu enriba d’él. A la fin: si esta reforma fiscal nun yera tan negativa ¿por qué nun se defendió na reforma estatutuaria? Y, si lo ye pero constitúi un peaxe obligatoriu p’algamar otros llogros… ¿por qué pa unes coses sí, tar nel gobiernu, y pa otres non, dotar a Asturies d’un estatutu que nos ufra una nueva cultura política asturiana? ¿Por qué s’usa la sentencia “la fiscalidá nun se toca” en según qué casu?
La política ye un arte nel que la correllación de fuerces permite facer palanca p’algamar unos oxetivos estratéxicos qu’un partíu considera prioritarios; depende de los actores, determinar por qué causes paga la pena asumir contradicciones y por cuáles, les qu’anque se lleven en programa, se pue sacar músculu de coherencia. Normalmente, nestes coses, ye más cenciello ser coherentes cuando nun se tien especial interés nelles. Paez ser qu’hai munches actividaes que son susceptibles de ser bonificaes n’Asturies pa la izquierda plural que nos gobierna: pero l’asturianu nunca nun ye una d’elles. Arrequexada como cosa menor, como cuestión que, si ye a coste políticu cero, asúmese a la baxa siempre: perdiéndose, adulces, anque la oportunidá histórica de 2022 fuere marafundiada ensin xustificación.
La política del país, esa que nos dexa ensin 57 millones de recaldación pa poder facer polítiques públiques a cambiu de nada. Bono, sí: a cambiu d’una macroconseyería de la que podremos falar bien llargo nesta llexislatura. ¡Qué falta d’aire nuevo, de capacidá pa facer política útil y de compromisu con Asturies y la so xente!
