L’estrunfín enfocicáu -pa entender esi nome, habrán de tar solertes les nueses llectores a les prósimes novedáes d’Ediciones Radagast- de Llugones bailló ayeri al compás de los primeros soníos del ‘reggae’. Porque ellí, a solamente unos metros de la estatua que vixila con xestu de repunancia l’accesu a Llugones pero tamién al polígonu industrial Puente Nora, L’Economatu Discos y Ximiélgalo Radio Show entamaron la sesión Jamaican Oldies, cola presencia del DJ Ronald Koeman, miembro de Ram Jam London y d’eses ‘lleendes urbanes’ qu’un día colaron d’Asturies p’agora volver, per primer vegada y de momentu cabera, a pinchar lo meyor del rocksteady, del roots y del early reggae.
El DJ compartió escenario na fábrica de Cerveza Cotoya con Raúl Economatu y Miguina Selektah, los ‘alias’ de Raúl García y Miguel Rodríguez, al respective almes máter de la tienda de vinilos de música xamaicana, punk y oi! L’Economatu y del radioshow Ximiélgalo, que tolos martes, a partir de les 20.30 hores, fae mover los cadriles a Asturies dende les ondes llibres de la histórica emisora Radio Kras.
La cervecera asturiana, una de les pioneres nel mundu artesanal asturianu, foi la encargada de regar l’eventu con una cerveza fresco, salío del tanque recién, d’estilu english pale ale, que foi fechu n’esclusiva pa Jamaican Oldies y que bien llueu va poder tastiase tan solo nunos pocos establecimientos. Demientres el conciertu, acababa de madurar yá nos tanques una nueva remesa de la marca, nesti casu una rye stout que, de xuru, va llevar nel cuerpo la enerxía trensmitía por toa una tarde de bona música na que se dieron cita unes cincuenta persones.
