La hestoria del feminismu asturianu, pa nota

La llibrería Trabe, d’Uviéu’, acoyó la presentación de la versión n’asturianu del xuegu de mesa ‘Feminismos Reunidos’.

Recomendados

Arantza Margolles
Arantza Margolles
Es historiadora.

Mil doscientes entrugues pa poner a prueba los nuesos conocimientos de feminismu son les qu’asoleya esti particular ‘Trivial’ ñacíu, orixinalmente, nel añu 2016 por iniciativa del ‘podcast’ Sangre Fucsia y qu’agora llega na so versión asturiana, con 300 entrugues propies. Presentóse ayer na llibrería Trabe, n’Uviéu cuntando cola presencia de Pilar Cartón, qu’ente otres muyeres participó na redaición de les entrugues, y Esther Prieto, traductora al asturianu del xuegu y responsable de Trabe, la editorial encargada de la maquetación.

Nesti particular xuegu de mesa nun son quesinos lo que’l xugador o xugadora tien de conseguir algamar, sinon muyeres o coleutivos d’elles: l’AFA (Asociación Feminista d’Asturies); Ana Cano, primera presidenta muyer de la Academia de la Llingua Asturiana; les escritores Xosefa de Xovellanos y Rosario Acuña; Begoña Sánchez, hestórica feminista asturiana; o la revolucionaria Aida Lafuente. El xuegu promete hores de diversión al cambiu de solamente diez euros (la so edición nun busca beneficios, sinon solo costear los gastos xeneráos pola su espublización) y el retu de percorrer la hestoria de la muyer y del feminismu asturianos dende’l sieglu X hasta anguaño. Tóo por mediu de seis categoríes propies: Cai, Cultura, Cuerpos, Historia, Drechos y Academia.

Semeya: Alisa Guerrero

Cartón reivindicó ayer la figura de les más de quinientes muyeres asturianes que va dellos años recopiló nuna base de datos (anguaño ‘online’) un grupu coordináu por la socióloga Sandra Dema y Carmen Suárez, del grupu GENESYS. D’esi trabayu, fecho na su mayor parte en base a los datos amosáos por obres diverses espublizáes nel sieglu XX como la Gran Enciclopedia Asturiana, partió en tiempos de pandemia la idega de ‘personalizar’ el xuegu de Feminismos Reunidos. Esi oxetivu, qu’agora se materializa, pudo algamase col trabayu desinteresáu de Pilar Cartón, Sandra Dema, Melania Fraga, María García, Carmen Suárez, Cristina Suárez, María Jesús Villaverde, Esther Prieto, Beatriz Redondo y de la tristemente desaparecía Begoña Sánchez, quien nun pudo ver el trabayu finalizáu.

Flor Tejo y Mila Garzo. Semeya: Alisa Guerrero

Visibilizar a les muyeres asturianes pa contrarrestar los prexuicios acarreáos d’una educación qu’ocultaba los sos nomes ye lo qu’esti grupu de muyeres y AFA persiguen. “Alcordáivos de lo que pasaba con Rosalía de Castro o Emilia Pardo Bazán, que mos decíen: bonu, ya estudiamos a Varela y tóos estos, así qu’estes, ná, ¡pa nota!”. El colectivu asoleyó inclusive un email pa correxir cualesquier errata que pudiere haber nestes 300 entrugues o proponer dalguna más de cara a una posible segunda edición: feminismosreunidosafa@gmail.com El xuegu, que puede comprase nes llibreríes collaboraores, va tener tovía una presentación más, pal prósimu 24 de febreru, en La Revoltosa de Xixón. ¿Atréveste a sacar nota?

Actualidad