Según cuenten los responsables de la nueva llibrería Matadero Uno d’Uviéu —los editores, escritores y llibreros Jorge Salvador Galindo, Leticia Sánchez Ruiz, Natalia González y Luciano Hevia— mentes facíen les reformes nel antiguu llocal d’Ojanguren, picaba a la puerta muncha xente namás pa agradece-yos la reapertura.
Los nuevos llibreros son, asina, bien conscientes d’esti patrimoniu qu’hereden: al cabu y al fin, el de so ye l’espaciu que demientres décades ocupara la llibrería Ojanguren, aquella onde Leopoldo Alas «Clarín» acudía no namás pa proveese de volúmenes sinón tamién a cobrar les sos collaboraciones nes revistes lliteraries de Madrid.
La inauguración de Matadero Uno (Plaza de Riego, 1), que tuvo llugar cortando la cinta colorada y convidando a moscovites el xueves 2 de payares, foi namás ún de los finxos d’estes últimes selmanes. D’una mano, foi la culminación del trabayu de reforma de l’antigua llibrería, qu’emprendieron los propios llibreros: la obra fixéronla ellos, sacante la instalación eléctrica: suelos, paredes, techu, pladur, pintura…, y ello esplica que, acordies con Natalia González, heba tantu cansanciu como ilusión.
Pero, de la otra mano, agora entama un periodu con una programación cultural bien intensa pa celebrar l’apertura del negociu, no que va ser ún de los rasgos más característicos de la nueva iniciativa: Matadero Uno cuenta con un espaciu na primer planta empobináu a la realización d’actos culturales.
Allá van poder presenciase, por exemplu, el vienres 3 de payares un alcuentru coles editoriales Sajalín y Malastierras, dos, de los sellos independientes más potentes e interesantes del mercáu actual que, ente otres coses, dieron a conocer n’España les obres de Chris Offutt y Edward Bunker; un alcuentru sobre lliteratura y mina con Aitana Castaño, Noemí Sabugal y Juan Ponte el martes 7 de payares, o la presentación d’El columpio, el llibru de la renomada cuentista Cristina Fernández Cubas, que ta acabante de ganar el Premiu Nacional de les Lletres, el xueves 9 de payares.
Arriendes d’esto, según rellata Jorge Salvador Galindo, otru de los aspectos más novedosos de Matadero Uno va ser la defensa del fondu de la llibrería: «lo que mos debería diferenciar ye’l fondu. Vamos apostar non namás poles novedaes, sinón tamién polos llibros nos que creyemos, y vamos facer un apueste fuerte poles editoriales independientes y más desconocíes. Buceamos nos catálogos d’esti tipu d’editoriales y queremos teneles siempre equí».
A ello debe sumase tamién el posicionamientu de la nueva llibrería no que fai a la lliteratura n’asturianu. Acordies con Natalia González, «nós decidimos apostar pola integración de la lliteratura n’asturianu: consultámoslo con editores y autores de lliteratura n’asturianu, y mirando pa fuera, pa sitios como Galicia o Cataluña —onde les llingües propies tán más normalizaes—, vimos que lo normal ye que tu vayas a la sección de llliteratura fantástica y veas Tolkien n’asturianu y Tolkien en castellanu».
Rescamplen, nesti sentíu, les consecuencies beneficioses del plantegamientu pal ensayu n’asturianu: «si vas a lliteratura sobre cine y ves el llibru de Damián Barreiro vas mercalu porque t’interesa’l tema, y igual si tuviere na sección d’asturianu della xente nun llegaría a él».
