La escayencia del mediu rural asturianu ye común a la de bona parte del mediu rural de la UE, anque con efectos y intensidá variable. Los habitantes lexítimos del ámbitu rural asturianu merecen que se los atienda, pa que terminemos con décades d’abandonu y males polítiques, que los tán condenando a la desapaición y con ellos, de pasu, a toos nós como pueblu. La vida nos pueblos ye anguaño poco más que la vida nun decoráu afayaizu pal cine y pa les redes sociales. La xente del mediu rural ta fartuco de midíes tomaes polu qu’ellos perciben como unos burócrates que nin los entienden, nin los escuchen, nin tampoco nun saben lo que precisen. Esta fartura ta llegando a la llende y más mos val poner solución a esti asuntu si nun queremos llamentar depués les sos consecuencies. Les movilizaciones de va poco nun son más que la pica de llanza d’un sentir xeneralizáu de que, d’un lláu la Unión europea, d’otru les polítiques estatales y pa rematar les autonómiques, tán acabando col sector primariu, sobremanera por nun tar pensaes pal casu específicu y diferenciáu d’Asturies. L’agricultura y la ganadería asturiana son minifundistes, danse nun entornu dispersu y de monte y pocu tienen que ver con otres rialidaes pa les que sí que parez que tán pensaes toles iniciatives que vienen de Bruxelles. Les polítiques europées y estatales tuvieron, y tienen, un impactu demoledor nel campu asturianu. La hestoria d’estes polítiques ye la hestoria d’un maltratu. El campu asturianu ye una de les puertes peles qu’entra la ultraderecha, pretendiendo apoderase de lo qu’un día foi’l corazón de la vida, la economía y la cultura propia de Asturies, la seña de la so propia identidá como pueblu. A la fin, eses xeneraciones maltrataes somos tamién nós mesmos.
Les polítiques europees torguen a costafecha una vía de desenvolvimientu pa la ganadería y l’agricultura asturianes. Si atendemos al modelu global, européu y español, d’esplotación, tresformación, distribución y consumu, los planes fueron na dirección de favorecer a les redes de distribución de les grandes empreses alimentaries, faciendo de menos a los productos locales, que xeneren fenómenos como dende los asocedíos en Francia cola deslocalización de los terratenientes, asitiaos agora n’África, a les consecuencies nefastes de l’aplicación de la PAC, como la multiplicación de grandes superficies de capital foriatu, qu’amás d’emprobecer al campu, xeneren vezos de vida y ociu deocastraos y que nel casu singular d’Asturies contribúin de manera acelerada al so fin como cultura reconocible.
Hai una necesidá imperiosa, que tien de selo tamién pa Convocatoria por Asturies como axente qu’aspira a ser hexemónicu na esquierda asturiana, y ye la de nun arrenunciar, como sí paez que fixeron otros sectores de la autodenominada esquierda, a dar la batalla dialéctica, a ser una muria de contención contra la narrativa de la derecha que se ta apoderando de los habitantes del campu. Les polítiques europees y les del Reinu d’España nun tán afeches a los intereses específicos del nuesu sector primariu y van empobinaes a enterralu. Dende sectores de la neo-esquierda paez que se fixeron cálculos puramente electorales, buscando’l votu d’un target urbanu, que ye onde vive la mayoría de la población asturiana, arrenunciando, poro, a la batalla de les idees pa tornar a les dereches y ufiertar un futuru vidable pa’l mediu rural. Convocatoria por Asturies ten de ser consciente de que tou esti asuntu tesciende más allá de la so propia responsabilidá pa con Asturies. Una y bona, lo que ta en xuegu ye muncho más; trátase, de fondu, d’articular un proyectu européu de soberanía alimentaria que va directamente contra les redes del mercantilismu más transnacional.
Si queremos tornar esta realidá hai que facer cambios fondos en trés exes d’actuación, que son: el turismu, la rellación del campu asturianu cola fauna xabaz y la fiscalidá del mediu rural. En rellación col turismu ye necesario que toles actuaciones que se fagan nel ámbitu rural tengan a lo primero en cuenta les necesidaes d’infraestructures y servicios de los habitantes permanentes, pasando periba de los intereses turísticos, qu’hasta agora tán ponéndose per delantre. A mediu y llargu plazu tenemos que camudar el modelu de turismu individualista, d’esplotación del territoriu, individualista y discriminatoriu pa colos ciudadanos d’Asturies, que tienen derechu al esfrute de la so mesma tierra, de la que se sienten ca vuelta más espulsaos, por un modelu de turismu popular y colectivu, más enraigonáu na nuestra tradición recién, que pue aportar más a la economía y a la sociedá asturiana. N’Izquierda Asturiana (IAS) proponemos nun cayer nel tópicu de “turismu de calidá” frente a “masificación” porque nun se trata de maximizar la rentabilidá apostando por un modelu elitista o clasista de turistes de gran poder alquisitivu, sinon de convertir Asturies nun llugar de turismu responsable.
Pa esto precísase una orientación política clara dende l’Alministración con voluntá de tomar cartes pa que nun seyan los propietarios hosteleros los únicos directores de la esplotación de los recursos. Ye responsabilidá histórica de CxA algamar el necesariu consensu colos socios de Gobiernu y, en tou casu forciar al máximo’l nuestru campu d’actuación como responsables de la regulación del territoriu.
Hai otru tema que cuntamos que nun ye menor y amás tien consecuencies directes de tipu políticu: El sentimientu d’agraviu por parte de la xente qu’habita permanentemente’l campu y tamién polos sos descendientes, habitantes estacionales y ocasionales de les sos propiedades nel rural. Efectivamente, vese como mui inxusto la inversión en comunicaciones, servicios y facilidades que prioricen al visitante, forasteru, turista o empresariu turísticu cuando venimos de décades d’un abandonu, deliberáu o non, que ta nel orixe del éxodu y la decadencia de los pueblos. Si lo que queremos ye atayar de verdá’l despoblamientu, nun se pue facer a costa de tresplantar población. La manera de rentabilizar la población rural, dispersa y policéntrica tradicional ye qu’ésta suponga trabayu nel territoriu y la so conservación, vistos como valores en sí mesmos, favoreciendo a esa mesma población con ventaxes a la hora de valorizar les sos producciones.
Nel apartáu de la rellación que los asturianos tenemos cola fauna xabaz han de tenese en cuenta primero les necesidaes de l’agricultura y la ganadería estensiva d’Asturies, qu’históricamente son sostenibles y que miren pol entornu. Precisamos un cuerpu públicu de Guardería que cense y controle les especies, curiando la so preservación y garantizando la seguridá de les actividaes agrícoles y ganaderes. Cada día que pasa ensin resolvese esto aumenten los votos de la ultraderecha nel campu asturianu. Esta ye una piedra de toque, al menos una de les claves más crítiques, que puen cambiar el paradigma actual por otru que faga que la xente que vive permanentemente nel y del mediu rural nun mos siga dando’l llombu y nos mire con simpatía.
No que toca a la fiscalidá hai que resaltar que’l gobiernu tien competencies nel tramu autonómicu del IRPF, y polo tantu puen facese actuaciones yá mesmo. Nun pue pagar lo mesmo polos servicios el que los tien al llau de casa porque vive nuna ciudá que que quien viva nun conceyu de 2.000 habitantes, por poner un exemplu. Ye posible establecer coutes diferenciaes pa servicios que se xestionen a través de les mancomunidaes o que dependen del Principáu, como’l consorciu d’agues, la recoyida de basura y otros cánones municipales, en función de la dispersión.
Al mesmu tiempo, cada día queda más patente el desbordamientu de los servicios públicos municipales en delles époques del añu pola masificación turística. L’exemplu más doliosu ye quiciás el de les carencies sanitaries, pero l’afectación ye de toles infraestuctures (víes de comunicación, comercios, saneamientu, ocupación d’espacios). Por eso tamos a favor d’establecer cuotes turístiques de recaudación dende les alministraciones públiques, pensaes y empobinaes pa paliar les consecuencies del aumentu de población nes époques turístiques. Esti ye un tema urxente que nun se pue dexar de llau.
Estes reflexiones formen parte d’un documentu más ampliu qu’IAS apurre nel contestu del debate sobre’l pautu social pol mediu rural asturianu. La viabilidá económica del nuestru agru, lo mesmo que de l’actividá pesquera tradicional tien que pasar imperiosamente per una reformulación y adaptación a les necesidaes y peculiaridaes del país. Si nun reconocemos la nuestra singularidá tocantes a poblamientu, usos ancestrales, culturales y xeográficos y siguimos contemplando impasibles cómo s’apliquen midíes pensaes pa un contestu ayenu como’l de medianos y grandes propietarios, propiu de la meseta y el sur d’España, nun vamos ser quien d’entender y polo tanto nunca vamos aprovechar les potencialidaes d’un territoriu como’l nuestru. Como dixo una vegada un destacáu trabayador del nunca bien pagáu SERIDA: “Asturies ye ún de los pocos sitios del mundu onde crez la yerba 10 meses al añu”.
