Conecta con nosotras

Pensamiento Post-corona

Llealtá federal y coronavirus

Pal xacobinismu nestos conflictos ente alministraciones ye l’Alministración central la que siempre tien la razón.

Xixón. foto: Iván G. Fernández.

La crisis de coronavirus ta poniendo sobro la mesa los dos grandes problemes no tocante a la descentralización del sistema sanitariu: la falta de coordinación ente comunidaes autónomes y alministración central, y les desigualdaes territoriales na calidá de la sanidá pública.

Pa planteganos estos dos grandes problemes, tenemos de partir de daqué que nun suel tenese en cuenta: que tanto l’Alministración central como les CC.AA. son Estáu. Y ye qu’anque munches veces se fale de l’Alministración central y del Estáu como si fueren lo mesmo, el nuesu sistema constitucional nun da mayor calter estatal a l’Alministración central qu’a les CC.AA. Ello ye que ye’l mesmu sistema constitucional el que garantiza l’autonomía política de les mentaes CC.AA. Asina, los problemes de coordinación na actuación nun se dan ente Estáu y comunidaes, sinón ente dos alministraciones del mesmu Estáu español.

La Constitución creó un confusu y complicáu sistema que fai qu’anque una Comunidá detente una competencia, como ye’l casu de la sanidá, l’Alministración central siga con una amplia influencia sobre esta al traviés de les lleis marcu y la competencia “absoluta” en materia económico. A esti abaruyamientu alministrativu amiéstase l’otru gran problema: el financiamientu. La inmensa mayoría de la clase política española coincide en que’l sistema de repartu de recursos ente les distintes CC.AA. ye inxustu. D’esti análisis escluyimos, ta claro, al País Vascu y Navarra, que cunten col so propiu sistema de financiamientu.

Los problemes de coordinación na actuación nun se dan ente Estáu y comunidaes, sinón ente dos alministraciones del mesmu Estáu español

A estos dos problemes, alministrativu y presupuestariu, hai qu’añedir d’últimes la cuestión de la rivalidá política. En tolos niveles alministrativos los partíos usen les sos competencies pa desgatar al rival. Ensin unes llendes constitucionales clares ente les competencies d’una y otra alministración, con grandes diferencies de financiamientu entre CC.AA., y con un competición política desamarrada ente alministraciones de distintu color políticu, yera difícil que la resultancia fuera otra que la que tamos viendo. Lo que ta asocediendo en Madrid ye’l meyor exemplu d’ello.

Pal xacobinismu común a la mayor parte de la derecha y l’esquierda estatal, nestos conflictos ente alministraciones ye l’Alministración central la que por dalgún estrañu azar siempre tien la razón, y son les egoístes decisiones polítiques de les CC.AA. les que lo enzanquen tou y ruempen la igualdá ente lo muncho español y bien español. Sicasí, si entendemos la igualdá como’l derechu de tolos habitantes del Estáu español a tener accesu al mesmu nivel de prestación de servicios públicos, nun taría mal empezar per afitar nos problemes de les zones rurales y la España vaciada. Amás, si entendemos la igualdá como la capacidá de toes y toos pa decidir sobre’l nuesu ámbitu territorial más cercanu, vamos tar entá centrando más el tiru. La igualdá nun ye uniformidá, de la mesma manera que la llibertá nun ye decidir toes y toos lo mesmo, sinón tener la capacidá de decidir.

En virtú de la llibertá de les autonomíes p’autogobernarse ye llexítimo q’una comunidá retaye en salú y bienestar, ya invierta en tauromaquia, anque eso tenga resultancies desastroses. Sicasí, eses decisiones munches vegaes nun repercuten solo sobre los mesmos habitantes de la comunidá, sinón que tamién tienen efectos sobre’l conxuntu del territoriu estatal. ¿Cómo fixeron nuna república federal como Alemaña pa resolver esi equilibriu? La xurisprudencia constitucional alemana denominó llealtá federal, términu por cierto asumíu pol Tribunal Constitucional español, al fechu de que l’Estáu Central y los lander non solo tienen de cumplir les sos obligaciones constitucionales, sinón que tamién tienen de faelo teniendo en cuenta l’efectu de les sos decisiones sobre los demás, calteniendo nes sos relaciones una actitú amistosa que sía favorable a los intereses de landers y Alministración central. Por desgracia, n’España tamos bien llueñe d’esa llealtá federal tan necesaria, anque ello cueste la vida de miles de persones que nun van preguntar si la culpa ye d’unu, d’otru o de toos.

Comentarios
Advertisement

Lo más leído

“OTEA no nos representa, aquí autónomos y trabajadores vamos de la mano”

Actualidad

Celia Viada rescata los negativos de la fotógrafa republicana Benjamina Miyar

Cultura

Vauste: sesenta despidos y una fábrica partida en dos

Actualidad

Un tuit de Bayona ofreciendo contratos estables indigna a las enfermeras de Cabueñes

Actualidad

Asociación Cultural Nortes de Asturias © 2020 · Centradas en la periferia

Nortes en redes