TESTU: PABLO TEXÓN
Imaxinen una cuarentena que nun tome cuarenta díes, sinón cuarenta años: multipliquen cada día de los que lleven zarraos en casa por 365, ye bien bono de facer. Albidren una escepcionalidá duradera, una democracia con tara y miren pa la semeya. Ehí lo tienen. Una foto random de la postdictadura, con Estación del Norte de fondu (acarretando tonelaes non de fierro, sinón del so símbolu químicu), de cualquier añu, una/ún cualquiera, menos d’esti, claro, en que l’airón de la Historia esborrió el Día de les Lletres (y tolo demás).
¿Aguarden/aguardamos los de la semeya la vuelta a l’ANORMALIDÁ (con prefixu gafu)? Ta visto que non. Los derechos, cuando tán confinaos, acaben amontalgando, apodreciendo adulces y fai-yos falta la ventolera esperanzada del futuru pa vivir. A ello vamos. Seique na foto podemos ver la figura d’Abel proyectada como solombra de Caín, pero ser culpables namás ha sirvir pa buscar con más puxu que nunca la xusticia.
