Conecta con nosotras

Opinión

25 de mayu: cultura de resistencia como identidá política asturiana

Una identidá abierta en tiempos de pandemia ultraderechista, una cultura de resistencia a la que s’amesta la cuestión de clas.

Suena Testify, de la banda californiana Rage Against the Machine. Tom Morello ximielga les cuerdes de la so guitarra “Soul power” -el puxu l’alma- y dexa’l protagonismu a la voz de Zack de la Rocha, qu’espeta: “Who controls the past (now), controls the future. Who controls the present (now), controls the past.” [quien controla’l pasáu (agora), controla’l futuru. Quien controla’l presente (agora), controla’l pasáu]. Toa una declaración d’intenciones, garrada de la novela 1984 d’Orwell, que vienen mui al casu a la de falar de cómo remanen los fechos históricos -emponderándolos, tapeciéndolos o trafullándolos- a conveniencia los seutores qu’ostenten el poder políticu pa caltener la so hexemonía y esparder “el so sentíu común” na sociedá.

[Spoiler]: esti nun ye’l típicu articulín clónicu de tolos años sobre’l 25 de mayu de 1808 nel que se fala sobre la importancia hestórica d’esti día nel qu’Asturies proclamóse soberana, declaró la guerra al imperiu de la so dómina -el napoleónicu-, creó un Exércitu Defensivu Asturianu y Xovellanos diseñaba la bandera asturiana tal y como la conocemos anguaño. Y too ello, amás, texío al traviés d’un procesu políticu nel que les clases populares tuvieron un protagonismu definitivu, emburriando a les instituciones tradicionales del pueblu asturianu a tomar una decisión dura que probablemente nun queríen tomar los sos dirixentes d’estracción social aventaxada. El papel de los estudiantes de la Universidá d’Uviéu, los trabayadores de la Fábrica d’Armes y de muyeres como Xuaca Bobela o Marica Andayón -esta última, por cierto, que vestía con montera picona y ropa de paisanu, desafiando les convenciones patriarcales- foi definitivu y, como yá se tien dicho, fai qu’Asturies entrare pela puerta grande na modernidá. Pa entender la so trescendencia, na historia d’Asturies y d’Europa, nun s’ha dexar de lleer l’imprescindible “La revolución de Mayu de 1808 o l’aniciu de la historia contemporánea d’Asturies” (Trabe, 2008) de Faustino Zapico, un llibru que tendría que tar en toles biblioteques escolares y ser un manual de referencia nel enseñu asturianu.

212 años dempués d’aquellos fechos, que namás reivindica con conteníu tresformador l’asturianismu políticu -en solitú- dende la dómina de Conceyu Bable nos 70, Asturies sigue ensin atopar el so sitiu nel mundu y, amás, la so hestoriografía sigue remanada y mansuñada pol complexu d’inferioridá, l’autoodiu y el servilismu políticu.

Por más que faigan por qu’encaxe, la realidá ye que la construcción de la identidá española nun concasa nada bien cola realidá material de lo asturiano. A la mayor parte de la sociedá asturiana esto ríncha-y, anque nun faiga d’ello un fechu a analizar políticamente y actuar en consecuencia, imaxinando y construyendo una Asturies alternativa, segura de sigo mesma. Nun fai falta más que sentir les impresiones que de nós, d’Asturies, tienen en munches ocasiones observadores non condicionaos/es pola hexemonía educativa, política y mediática del estáu -turistes, estudiantes d’intercambiu- pa decatase d’ello.

Non, Asturies cuadra mal nel turboproyeutu identitariu español del paella, toros y sol, por más que l’arroz con bugre trunfe nes sidreríes de los puertos, El Bibiu acueya una feria subvencionada y el cambiu climáticu faiga que tengamos, cada vegada, menos orbayu.

Amás, por si daquién lo escaeciere, el momentu políticu en tol estáu español, con una oposición ultra-ultraderechista echada a la cai a protestar pola deriva bolchevique-separatista del gobiernu de PSOE-UP, en plena pandemia torna a recordar, una vegada más, la naturaleza del proyeutu y los símbolos de los que remanen la identidá española, más alló de los goles d’Iniesta: una bandera usada como fetiche, fecha unidá de destín universal, que denota clasismu, machismu, autoritarismu, pasáu imperial y presente racista, fobies a la llibertá y diversidá sexual y l’odiu a les llingües ya identidaes del estáu. D’otra banda, conxuguen esti sentimientu, en paralelo, col desaniciu y venta a cachos de la patria pal porgüeyu de los empresarios amiguinos a costa de los derechos sociales, el bienvivir del pueblu y les condiciones llaborales de les trabayadores. Asina, nun ye casualidá que los movimientos d’ultraderecha caltrien menos nos territorios del estáu nos que l’españolismu tien menos vitalidá. ¿Qué resignificación progresista y democrática se va facer de too ello?

A esta identidá rancia, pre y, especialmente, posfranquista, opónse-y una identidá asturiana que se debate ente dos corrientes más menos mitificaes qu’a vegaes entemécense. Per un llau, la construcción nacionalista de xustificación española basada nel mitu de “la Reconquista”, inexistente enantes del sieglu XIX, que fai d’Asturies el trubiecu d’España, con unes contradicciones argumentales tan grandes como intrascendentes a la hora d’instalase nel imaxinariu de la población. Esi “Asturias es España…y lo demás tierra conquistada” que, de facto, sorraya la diferencia ente “Asturies” y “lo demás”, fechu dogma políticu que blinca penriba d’un proyeutu de referencia mediterránea ayén a la propia idea de lo asturiano. Per otru llau, la construcción de la idea d’una Asturies indómita ya insumisa, autónoma, que cuando ta n’apuru tira pel camín del mediu, resistente a los imperios de cada dómina: los romanos, los musulmanes, los reis castellanos, los franceses, los fascistes y el franquismu; una cultura de resistencia a la que s’amesta la cuestión de clas nel últimu sieglu y que tamién conforma una parte importante de la identidá del ser asturianos y asturianes.

Y asina tamos, metanes d’una pandemia global que va traer una crisis económica y política mui fonda, con un gobiernu asturianu que namás fai política posturera en Twitter y un gobiernu estatal que ta siendo atacáu por proponer midíes tímidamente socialdemócrates a manes d’una oligarquía fecha ultraderecha -siempre nacionalista- que tamién sal a les cais del nuesu país a ximielgar les sos rojigualdes y los sos collares nos sos coches de gama alta col riesgu de que pudieren seducir a una parte les clases populares.

Nun se m’ocurre meyor manera de confrontar a la ultraderecha dende l’Asturies de güei que’l contraponer a esi españolismu de búnker ultramontanu les connotaciones -non necesariamente oxetives- de la identidá asturiana; una identidá de corte abiertu, inclusivu, solidariu, qu’inda caltién unos mínimos seutores públicos como reflexu d’un pasáu recién de lluches obreres, progresista, que remite a una xestión caltenible y humana del mediu ensin arrenunciar a lo industrial, que tien una bandera y simboloxía popularizaes pol asturianismu, presente en toles lluches y reivindicaciones sindicales, nel imaxinariu coleutivu y en tolos eventos populares de manera espontánea.

Ente la retafila de coses que podemos deprender de los fechos d’aquel 25 de mayu de 1808, una d’elles podría ser el decatanos, de que’l pueblu asturianu tuvo, hestóricamente, la capacidá d’autodeterminase y movilizase cuando les condiciones sociales se tornaben emerxencia, emburriando con tol puxu de la cai a los que manden, siempre acobardaos, a tomar decisiones que nun queríen o nun s’atrevíen a tomar. Puxar por (auto)reconocenos como asturianes y asturianos pa defender los nuesos derechos y presentanos al mundu n’igualdá a otros pueblos dende la solidaridá, la collaboración mutua y l’internacionalismu ye, anguaño, poner un cordón sanitariu escontra la intolerancia, el fanatismu y l’odiu de la pantasma nacionalista y autoritaria que percuerre l’estáu español y el continente. Lluchar el presente pa que nun nos controlen el futuru.

Iyán Glez.
Escrito por

Iyán Glez, (1985, Uviéu) // Xeólogu, docente de secundaria y militante soberanista

1 Comentario

1 Comentario

  1. Antón Fuertes Rodríguez

    25 mayo 2020 a las 22:49

    Toi d´alcuerdu Iyán. Prestame muncho lléete. Hai muncho que facer nesti País nuesu.

Responder

Tu dirección de correo electrónico no será publicada. Los campos obligatorios están marcados con *

Lo más leído

El revolucionario asturiano que imaginó unos Estados Unidos de España

Cultura

“Hay que meterles el miedo en el cuerpo de una puñetera vez”, dice Canteli sobre las elecciones gallegas

Actualidad

La nueva normalidad

Opinión

“Una huelga de fame empieza el día que la abandonas”

Entrevistas

Asociación Cultural Nortes de Asturias © 2020 · Centradas en la periferia

Nortes en redes