La escritora maliaya María Teresa Villaverde “Tuxa”, poco sospechosa de formar parte de contubernios socialcomunistes, confesaba nuna carta en versu empobinada al so primu qu’andaba mediu namoriscada d’un sacristán pero que nun s’adeterminaba a afitar la relación. “Además, como ye viudu, témo-y a la cencerrada”, dicía.
Nel diccionariu de l’ALLA recuéyese pal términu “Pandorga” ente otres les aceiciones que vienen darréu: Cencerrada, aición y efeutu de ruxir cencerros, oxetos metálicos [pa molestar a una persona viuda o vieya qu’acaba casase] / Conxuntu de mazcaritos [que salen per Pentecostés]. Confieso que nun sabía lo que yera’l Pentecostés, y restolando pela rede enteréme que ye’l resultáu, talo que munches cellebraciones cristianes, d’un sincretismu deriváu d’un episodiu natural, l’amaurecer de los primeros frutos, y de que tien llugar per estes feches. La traducción que fai‘l cristianismu de la collecha ye l’apaición del espíritu santu, qu’envede a quitar la fame vien a reforciar dellos aspeutos éticos o morales de los sos siguidores. Siempres hebio clases.
Ye sabío que daqué cosa qu’estrema al xéneru humanu del restu de los seres del planeta ye la so capacidad d’historización y de construcción de rellatos. Ello nun quier dicir que nun tea suxetu, lo mesmo qu’el restu de criatures, a otres lleis que gobiernen l’universu y que quiciabes la evolución del conocimientu humanu entá nun seya quien a desplicar. La raza humana ye feble, y d’ello provién l’impulsu atávicu de dir a la gueta de preseos pa defendese de lo desconocío, pa reforciase o pa dominar la naturaleza.
Según la segunda aceición, paez ser que les comparses que salen per Pentecostés (primer noticia que tengo) empleguen recursos asemeyaos a los de les mazcaraes d’iviernu pa la so puesta n’escena, talos que la vistimienta, muñecos, símbolos o l’espaciu sonoru. Y esos mesmos recursos úsense, casualmente, nes pandorgues, práutiques coercitives ya intimidatories exentes de tou componente relixosu o místicu, coles que se trata de denunciar comportamientos de persones que, según el criteriu d’otres, frañen supuestos tabúes sociales; ehi ta’l testimoniu de “Tuxa”.
Nun fai falta ser mui avispáu pa decatase del paralelismu de les pandorgues coles agresives tremolines qu’estos díes s’encargaron de degradar impunemente énte los nuesos güeyos el modestu grau de civilización al que llegó la nuesa sociedá. Pero’l ritmu vital que marquen la xeometría y l’aritmética universal nun torga la esistencia de cierta evolución al respeutu de los rituales ancestrales, ya inclusive al respeutu del so equivalente cristianu.
La palabra d’aniciu griegu Agón tien delles aceiciones; emplégase pa denomar al conflictu de les traxedies griegues, por casu. Dalgunos estudiosos aplíquenla pa definir les griesques que s’entamaben davezu ente bandes rivales de los pueblos pa rematar “catárticamente” determinaes fiestes. Dientro d’estos agones, el ruíu ye un factor perimportante p’armar grupu y p’amedranar. Como nel fútbol, otru catárticu y agónicu exemplu. Pero yá quixeren los prepotentes apóstoles de l’anovada ya inquisitorial pandorga qu’esi preséu coercitivu que tan emplegando tuviera la más mínima dimensión antropolóxica o mística. Y d’otra miente, ta claro tamién cual ye’l tabú que que se pretende frañar; un gobiernu formáu por una rellación inalmisible pal so pensamientu medieval, y contrariu al de los sos cavernarios y elitistes intereses particulares. Como la de “Tuxa” por refrescar por quien nun debía.
El tabú ye daqué que camuda col tiempu. Quien diba monta-y una pandorga güei a la probe “Tuxa”. La sociedá por suerte evoluciona y ye abondo más tolerante. Pero igual con otros temes nun hai tanta permisividá. Nesti cau, paez que la falta de conexón y d’empatía cola colectividá, la relatividá del conceutu “tabú”, l’entafarramientu semióticu de los símbolos, y la contaminación del espaciu sonoru, lloñe de buscar xusticia, folixa o d’amosar allegría pola llegada del santu espíritu, queden espeyaes nuna especie de comparsa onde l’odiu, naguando pola apaición d’un espíritu reaccionariu y esterminador, se pasea impunemente agresivu nun Mercedes con xófer. Ye too fachada. D’esta manera, la pandorga que la élite plantega a la democracia, el so intentu de coacción, de represión, d’amenacia, queda en patética farsa vacía de conteníu.
Nun me paez que de denguna manera la élite vocinglera vaya cuestionase que’l so comportamientu tea venceyáu colos ciclos naturales. Igual nun tien ná que ver; pero toi seguru (amás vien agora San Xuan) que dalgunos de los individuos que participen nesa triba de trafuelgos taríen encantaos d’empobinar a los que nun pensaren como ellos a la foguera, poques gracies. Nun diba ser la primer vez. El modus operandi medieval, magar que residual, entá tien cierta vixencia. A la foguera, al potru de tortura, al garrote vil o al paredón. Nostante, oxalá que n’acabando esta pasión pentecostina de frutos podres, los astros determinen que na viniente foguera de San Xuan puea arrefundiase allá tolo que sobre –magar qu’haya ser nun planu anímicu, o inclusive virtual. Ente ello, per un llau l’andancia del COVID con tolos sos gafientos efeutos; y per otru, la plaga de la poco santa compaña, colos sos pantasmes de l’amenaza, la intransixencia, el resentimientu, l’odiu o la ira.
Otra cosa sedría que dalgún de los socios de la pandorgable rellación gubernamental dicidiera recular, como “Tuxa”. Nun me paez, nun tien traza; pero eso yá sedría parte del rellatu del viaxe a la escuridá qu’entama tres del Beltaine.
