Siempres remembraremos a Platón pol so mitu de los homes apresaos nun covarón (“República”, Llibru VII). Dientru la cuevona había namái un falsu mundiu de solombres, pura apariencia que los cautivos percibíen al traviés los sos sintíos. Mentantu, fora’l covarón, énte la lluz d’un fueu, los homes del esterior movíen oxetos pertenecientes a la braera rialidá, que la lluz proyeutaba en forma solombres na muria interior de la cuevona. Nesta allegoría los apresaos creyíen que les solombres yeren l’auténtica rialidá; sicasí ésa sólo taba fora’l covarón, a la lluz del sol, en manes de los homes del esterior.
Nel momentu presente del conflictu llingüisticu n’Asturies, tolos homes del presidente Barbón faen por convertir la nuesa patria na viva escena del mitu’l covarón. El repartu papeles nesta representación ye la propia de los pueblos ensin llibertá: Asturies confiná nel covarón; fora, los homes del esterior son los del presidente.
Nos primeros y llargos tiempos del conflictu, a los homes del esterior (primero franquistes, llueu “socialistes” del PSOE) valió-yos con tener Asturies pesllá nel covarón, ñegándo-y ensin más los drechos llingüísticos. Asturies pasó asina 40 años con Franco y otros 40 años col PSOE. 80 años de represión española, de prohibición direuta del calter oficial de la llingua d’Asturies, de ñegación d’un drechu básicu y universal de presones y pueblos.
Pero los continuadores de la represión llingüística de Franco, los homes del réxime español del 78, finaron reconociendo internamente que la represión direuta yera difícil de caltener y xustificar nuna dómina na que nel esterior surde la simbiosis sociopodemita. Y que, amás, una represión llingüística visible ya inacabable xeneraba una fienda social con dalgunes repercusiones elleutorales dañibles pal réxime.
Asina ye comu Barbón, pervistíu con sayes de filósofu ateniense, entama nel esterior un congresu onde la españolísima FSA-PSOE, con él de cabezaleru, diseña’l procesu pa, ensin lliberar Asturies, somorguiala dafechu nel mitu’l covarón.
En 2017 Barbón punxo en marcha la primer escenificación de la nuea cosmogonía platónica del PSOE.
En 2017 Barbón punxo en marcha la primer escenificación de la nuea cosmogonía platónica del PSOE. Los sos homes del esterior asitiaron énte’l fueu un primer oxetu de la rialidá braera. Cola so proyeición en forma solombra dientru la cuevona, la xente apresao creyó ver que’l 32 Congresu de la FSA-PSOE aprebaba defender la oficialidá l’asturianu. Sicasí, en 2019 cuandu Barbón s’invistió comu “princeps” del so “Principado”, unvió a la conseyera Berta Piñán a la prensa y foi ella mesma la que desplicó cuálu yera l’oxetu rial que los homes del esterior punxeren énte’l fueu. Nun yera la oficialidá, reconoció, nesta llexisllatura sólo tendríen ente manes la “normalización” del debate’n materia de conflictu llingüisticu y la formulación del “modelu d’oficialidá” que podíen defender nel futuru. Ehí tenemos una primer perversion visual, sensorial, que’l PSOE quinxo prevocar utilizando’l mitu’l covarón y l’ansiedá de munchos asturianos por ser llibres y tener una llingua oficial.
Nel mesmu 2019 Barbón punxo en marcha la segunda escenificación d’esa nuea cosmogonía platónica del PSOE. Lo qu’entós los presos creyeron ver nes solombres que llegaron al covarón foi que la banda drecha del movimientu antiasturianu (PP y Vox) torgaba a la conseyera Berta Piñán l’usu la llingua na Xunta Xeneral. Por embargu, l’oxetu rial que la banda esquierda del movimientu antiasturianu (PSOE y adláteres) punxo énte’l fueu foi otru mui estremáu: ordenaron a la conseyera qu’arrenunciare a falar n’asturianu, porque si ella quinxere podía facelo; pero asina dientru la cuevona daquién podía creyer qu’una drecha mala torgaba drechos y qu’un “poli bonu” d’esquierdes vendría poner orde.
Xustamente, asina cuayó la tercer escenificación de la nuea cosmogonía plátónica del PSOE, puesta enriba les tables nesti branu de 2020. El PSOE y los sos pigarres aprebaron camudar el Reglamentu la Xunta Xeneral, p’amestar que se pue usar l’asturianu ellí dientru. Dalgo interesante pero non imprescindible, porque ye daqué que yá garantiza la llexisllación vixente: la mísere Llei 1/1998, de 23 de marzu, d’Usu y Promoción del asturianu (BOE n. 103, de 30 d’abril de 1998), nel puntu primeru del so artículu 4, diz que “tolos ciudadanos tienen drechu a emplegar l’asturianu y a espresase nelli, de pallabra y por escritu”; y nel so puntu segundu afita que “Sedrá valible a tolos efeutos l’usu l’asturianu nes comunicaciones orales y escrites de los ciudadanos col ´Principado` d’Asturies”. Esto ye, Berta Piñán nun faló n’asturianu porque a la banda esquierda del movimientu antiasturianu convenía-y quedar de “poli bonu” y dexar el papel de “malu” sólo pa la banda drecha. Asina, poniendo énte’l fueu una reforma interesante pero non imprescindible d’esi Reglamentu, llograron que dientru’l covarón se viere un periódicu sovencionáu qu’entitulaba “L’asturianu sedrá llingua oficial na Xunta Xeneral”. Proyeutóse dientru la cuevona la imax d’una oficialidá parcial, que ye dafechamente falsa. L’asturianu nun tien reconocíu’l calter de llingua oficial en dengún llugar xeográficu nin ámbetu sociopolíticu, a nun ser nel territoriu hermanu de Miranda do Douro (Portugal); l’estáu español y la normativa que los partíos españoles tienen vixente sólo da pa reconocer l’asturianu comu una llingua esistente y parcialmente permitía, pero non oficial.
Nun vamos afondar más en cómu’l mitu platónicu afeuta al conflictu llingüísticu n’Asturies. Vendrán darréu nuees escenificaciones que yá tán guionizaes: el Conseyu Asesor de Política Llingüística n’Asturies, los enriedos col Conseyu de Llingües Oficiales nel estáu español, el Plan de Normalización Llingüística del Conceyu Xixón, etc.
Pero fasta que los partíos españoles nun reconozan nun BOPA la oficialidá de la llingua d’Asturies nes mesmes condiciones que l’euskera, el catalán y el gallegu, el procedimientu cosmogónicu sedrá siempres el mesmu: los homes de Barbón nel esterior pondrán oxetos raros énte’l fueu pa que la xente preso nel covarón creya ver oficialidá onde nun hai más que solombres falses.
Y ¿por qué esi esfuerciu gubernamental en proyeutar solombres falses d’oficialidá dientru la cuevona? Precisamente porque’l conflictu lligüísticu n’Asturies ta mui vivu y porque l’esfuerciu exemplar y descomanáu de les muyeres y homes zarraos nel covarón ta llogrando que la salía de toos al esterior tea más cerque. ¡Puxu y a por ello!
